Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 52

Gidiɔn tia Ngi Gɔgɔbla 300 Sia

Gidiɔn tia Ngi Gɔgɔbla 300 Sia

BIA tɔ ma gbɔɔ wuema pisoi ji hu? Isuɛl gɔgɔbleisia lɔ. Hingei jisia bi ti lɔ ma ti wɛɛni, ti njei lɔ gbɔi ma. Gidiɔn mia looni ti mahu a ti gbee sia ti ye njei gbɔi ma la. Ta bɛ yɛni a kitileemɔ yia lɔ Isuɛl.

Nungei jisia gbee lɛ tiŋ bi tɔ sia ti ye njei gbɔi ma la. Ti lɛnga ti wui wɛɛni njei hu lɔ ta kpɔi. Kɛɛ ye ngla njei wuinga ngi yeya kpɔi va, kɔ we i gu i ngi gblanga gbekpe. Nyandengɔ ji kini ji njei gbɔi ma hi, gbɛva see Jɛhova ndeilɔ Gidiɔn ma yɛ i hingei nasia lee wumbu ti yaa njei gbɔi ma ta ti gblanga gbekpe li va kɔgɔmi. Kɛɛ i ye nasia ya gama ta ti wuisia wɛɛ njei hu kpɔi va. Mu tɔ lɛ gbɛva le.

Kpundɛ wa Isuɛlbleisia malilɔ gbɔma. Bi kɔɔ gbɛva le? Ajifa tii yɛ a wolo Jɛhova ma. Fale, Jɛhova ti waailɔ Midianbleisia yeya, tao ti yɛɛ a ti mɔnɛ. Na pieilɔ Isuɛlbleisia ti wɔɔ Jɛhova gama kɔ i gbɔ ti ma, tao i ti wo mɛilɔ.

Jɛhova ndeilɔ Gidiɔn ma yɛ i kɔgɔbla lɛma. Kɛ Gidiɔn kɔgɔbla lɛnga ma nahi ti gungɔ a 32,000. Kɛɛ kɔgɔblei nasia kungɔ Isuɛlbleisia ti lapi a tie ti jika mia yɛla a 135,000. Kɛɛ Jɛhova ndeilɔ Gidiɔn ma yɛɛ: ‘Bi gɔgɔbla ti gbotongɔ wa le.’ Gbɛva mia Jɛhova na leni?

Gbɛva see, ina Isuɛlbleisia ti guilɔ ti juwuisia ma, ta gii lɔ la kɛ Jɛhova yana a gbɔ ti ma, kɛɛ kɛ ti nda gbayei mia pieni ti guni ti ma. Fale, Jɛhova ndeilɔ Gidiɔn ma yɛɛ: ‘Nde hingei nasia kpɛlɛ ma nduwei ti hu kɔ ti yama.’ Ji Gidiɔn ji leni, hinga ti 22,000 mia ti yamani. Kɛ ti 10,000 ti longa lapi va a kɔgɔbla 135,000.

Kɛɛ, Jɛhova ndeilɔ gbɔma Gidiɔn ma yɛɛ: ‘Kɔgɔbla ti gbotongoi tuŋ bi yeya.’ Fale, Jɛhova ndeilɔ Gidiɔn ma kɔ kɔgɔblei nasia ti longa, ti li njei la ti njei gbɔi. Numui na gbi lee a ngi wui wɛɛ njei hu kpɔi va, i ngi ya gama. Na woma, kɔgɔbla ti 300 mia ti loni. Kɛ Jɛhova lahedi wumbunga yɛɛ: ‘Wua kɔgɔbla 300 jisia mia nga wu juwuisia waa wu yeya.’

Ji wati foni koi gɔ va, Gidiɔn ngi gɔgɔbleisia gɔlɛkɔlɛilɔ na sawa, kɛ i bulisia vefenga ti wɛ kɛ pɔɔvei hɛmui hu. A kpindi liei, ti kpɛlɛ ti lilɔ ti mia gala ti juwuisia ti yɛ na, kɛ ti buli vɛnga, ti pɔɔvei woo, kɛ ti yee gula tɛɛ: ‘Jɛhova gɔbowei kɛ Gidiɔn ndei!’ Ji ti juwuisia ti wuni jii hu, ti hu wuilɔ, kɛ ti luwaa. Na woma, ti hu vayailɔ kɛ ti leenga a pimi. Isuɛlbleisia ti guilɔ ti ma.