Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 49

Fuli Ii Yeini

Fuli Ii Yeini

JƆSUA lɔ lɛ pisoi ji hu. Bi kɔɔ lɔ gbɔɔ i ndema? I ndema lɔ yɛɛ: ‘Fuli baa yei!’ Tao fuli ii yeini klobɛɛ va. I loilɔ looni haŋ kpindi ii wɛɛni. Jɛhova mia pieni na i wue. Kɛɛ mu tɔ lɛ naa gbɛva mia Jɔsua ii yɛ loni fuli ii yei.

Maha nyamu lɔɔlui nasia ti gbuailɔ Kenaan lɔlei hu ti wa ti kɔ wɛɛ Gibiɔnbleisia ma. Fale Gibiɔnbleisia ti numu yia looilɔ Jɔsua gama ti nde tɛɛ: ‘Kɔnɛ le, wa kaka bi mu mabawo, gbɛva see mahangei nasia kpɛlɛ ti Kenaan lɔlei hu, ti waa ti kɔ wɛɛnga bi bɔilupuisia ma.’

Gama, kɛ Jɔsua tia ngi gɔgɔbleisia ti ya Gibiɔn. Ti jiailɔ a kpindi na pii li va Gibiɔn. Ji ti foni na, maha lɔɔlui nasia tia ti gɔgɔbleisia ti luwailɔ kɛ ti leenga a pimi. Kɛ Jɛhova pienga kɔtu wawaisia ti gbua ngelegohu ti gulakula ti ma ti ti waa. Nasia kɔtu wawaisia ti ti waani, ti yɛ leeni nasia ma Jɔsua gɔgɔbleisia ti ti waani.

Jɔsua tɔilɔ naa kɛ fuli wama yei ma. Na wuenga kpindi a wɛɛ lɔ tao ngi juwuisia gboto ma ti ma a bawo lɔ. Na va mia Jɔsua hɛni Jɛhova gama kɛ i ndenga yɛɛ: ‘Fuli baa yei.’ Tao Jɛhova woloilɔ Jɔsua ma, fuli ii yeini. Ji pieilɔ ti gu ti ti juwuisia kpɛlɛ waa.

Kɛɛ maha nyamuisia ti yɛɛ na tuŋ nahi ti juyangɔ a Ngewɔ mableisia. Fo weita gohu, Jɔsua tia ngi gɔgɔbleisia ti guilɔ ti maha 31 waa. Na woma, Jɔsua Kenaan lɔlei gɔɛkɔɛilɔ Isuɛl gɛnyɛwuisia luahu.

Fo gboto leengɔ woma Jɔsua haailɔ. Ngi vui yɛni a fo 110 lɔ. A wati na Jɔsua tia ngi ndiamuisia ti yɛ ndɛvui hu, nunga ti yɛɛ a Jɛhova liima hindei wue. Kɛɛ sia lee ti haani, Isuɛlbleisia ti tatoilɔ a hinda nyamuisia wue la kɛ ti wilinga kpundɛ wa hu. Wati na mia ti longɔ yɛla Ngewɔ i gbɔ ti ma.