Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 35

Jɛhova Ngi Jaweisia Veilɔ Isuɛlbleisia Wɛ

Jɛhova Ngi Jaweisia Veilɔ Isuɛlbleisia Wɛ

JI ISUƐLBLEISIA ti gbuani Iijipt, i yɛ kinii gu ma a ngawu fele lɔ, ta mia ti foni ngiye yia ma ta toli a Saina, ɔɔ Holɛb. Na mia Jɛhova yɛ yɛpɛni Mojisi gama kpɔvoi na hu ngɔmbui houni ma. Isuɛlbleisia ti heilɔ na kulo wati huguangɔ va.

Ji ti foni ngiyi ji ma, Mojisi ti loilɔ ye mbui kɛ ta lɛnga ye ngiyi ya. Ye ngiyi ji ya mia Jɛhova ndeni na Mojisi ma yɛ ngi longɔ Isuɛlbleisia ti ngi wo mɛini, tao ti wote a ngi nda nunga. Ji Mojisi hitɛni, i hugɛilɔ a Isuɛlbleisia na Jɛhova ndenga ngi ma. Kɛ ti kpɛlɛ ti ndenga tɛ ta wolo lɔ Jɛhova ma, gbɛva see ti longɔ yɛla ti wote a ngi nunga.

Na woma, Jɛhova kabandema hinda wueilɔ. I pieilɔ ngili i yia, tao nduli i gbua ngiyi ya. Kɛ i yɛpɛnga ti gama i nde yɛɛ: ‘Nya lɔ Jɛhova a nge, wu Yewɔi na wu gbuani Iijipt.’ Kɛ i sawa venga ti wɛ yɛɛ: ‘Ii gui wu ngewɔ yeka gbi vɛi i baa nya ma.’

I baa na ma, i sawa taalu veilɔ gbɔma ti wɛ. Isuɛlbleisia ti luwailɔ ji Ngewɔ yɛ a yɛpɛ ti gama, kɛ ti ndenga Mojisi ma tɛɛ: ‘Kɔnɛ le, bia yɛpɛ mu gama, pie Jɛhova i gbe a yɛpɛ la mu gama, gbɛva see mu luwangoi kɔ mua haa.’

Na woma, Jɛhova ndeilɔ Mojisi ma yɛɛ: ‘Lɛ ngiyi ya ngi kɔtu mahawangɔ fele ve bi wɛ na ngi nya jaweisia nyɛinga ma kɔ nunga ti jia la.’ Fale Mojisi lɛilɔ gbɔma ngiyi ya. Tao i yɛlɔ na foo 40 va kɛ kpindi 40.

Ngewɔ sawa gboto veilɔ Isuɛlbleisia wɛ tao Mojisi ti kpɛlɛ nyɛilɔ. Sawei nasia Ngewɔ yɛ nyɛinga kɔtu mahawangɔ fili nasia ma, i ti veilɔ gbɔma Mojisi wɛ. Sawa puu mia yɛ ye kɔti jisia ma. Na mua toi a Ngewɔ Jawa Puuisia.

Sia lee Ngewɔ Jawa Puuisia ti na, sawei yepekei nasia bɛ Ngewɔ feni Isuɛlbleisia wɛ ti gbekpengɔ wa yɛla. Ye sawei jisia ye ngla lɔ a ji: ‘Kungɔ bi lo a Jɛhova bi Yewɔi a bi lii gbi, a bi nɛmahui gbi, a bi lɛvui gbi kɛ bi gbayei gbi.’ Yepekei lɔ a ji: ‘Kungɔ bi lo a bi heimui sia bi longɔ la a biakpe.’ Ngewɔ lui, Yesu Klisti ndeilɔ yɛ sawa fili jisia mia ti looni saweisia kpɛlɛ gulɔ Jɛhova feni Isuɛlbleisia wɛ. Mu wama kaa wue ma kɔlongɔ Ngewɔ lui ma kɛ na i nunga gaani la.