Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 39

Flaweisia Ti Valeilɔ Ɛlɔn Likpoi Ma

Flaweisia Ti Valeilɔ Ɛlɔn Likpoi Ma

BIA flawei nasia tia nguwei nasia lɔ ma ti valengɔ nguli na ma? Ɛlɔn likpoi mia. Kpindi yakpe mia ti valeni ma! Mu tɔ lɛ naa gbɛva mia na wueni.

Isuɛlbleisia ti leeteeilɔ ŋanya lɔlei hu wati huguangɔ va. Nunga lɛnga ti yɛɛ a gii la kɛ Mojisi ii gui i loo ti gulɔ ɔɔ Ɛlɔn i wote a saagbuamɔ wai. Ye nungei jisia ti yɛni a Kola lɔ tia ngi womableisia nahi ti gungɔ a 250, kɛ Detan tia Abailam. Ye nungei jisia ti kpɛlɛ ti wailɔ Mojisi tia Ɛlɔn gama kɛ ti ndenga tɛɛ: ‘Gbɛva lɔ wu wuɛkpe yalɛnga mu mahu?’

Mojisi ndeilɔ naa Kola tia kpakui nasia ma ti tooni ngi woma yɛɛ: ‘Sina a ngendei, a ngɔmbu hou hakei wumbu wu ngɔmbui wu hu kɛ haiŋ ngu nɛnɛ wu wa Jɛhova gula wɛlei la. Mua tɔ lɔ numui na Jɛhova loko loonga ngi ma.’

Ji ngee woni, Kola tia ngi womableisia nahi ti gungɔ a 250 kɛ nunga yekei nasia bɛ ti yɛ looni ti woma, ti wailɔ Ngewɔ gula wɛlei la. Jɛhova lileeilɔ wa ti ma. Mojisi ndeilɔ naa Isuɛlbleisia ma yɛɛ: ‘A gbua nunga nyamui jisia ti gula wɛlei gblanga. Wua jaa a hani gbi na yɛni a ti woo.’ Nunga ti woloilɔ kɛ ti gbuanga Kola, Detan kɛ Abailamni ti gula wɛleisia gblanga.

Na woma Mojisi ndeilɔ yɛɛ: ‘Pili ji huwue mia wua kɔɔ numui na Jɛhova loko loonga ngi ma. Ndɔlei a lawo lɔ i nunga nyamui jisia kpɛlɛ ma gbɔli.’

Sia lee Mojisi kpɔyɔni a yɛpɛ la, kɛ ndɔɛ lawonga. Kɛ Kola gula wɛlei kɛ ngi mahakeisia gbi ti yeinga ndɔu. Kɛ Detan tia Abailam bɛ kɛ nasia kpɛlɛ ti yɛ ti woma ti yeinga ndɔu, kɛ ndɔɛ gbɔunga ti ma. Ji nunga ti ti wɔɔ wui mɛini ji ti yɛ yeima ndɔu, ti luwailɔ kɛ ti ndenga ngeeya tɛɛ: ‘A mu lee a pimi! Ndɔɛ aa wama mua bɛ gbɔi ma!’

Kɛɛ Kola tia ngi womableisia ti yɛɛ tuŋ looni Ngewɔ gula wɛlei gblanga. Kɛɛ hu ii guani, kɛ Jɛhova ngɔmbui yeinga ti ma kɛ ti kpɛlɛ ti haanga. Na woma, Jɛhova ndeilɔ Ɛlɔn hindo lui ma Ɛlieja kɔ i ngɔmbu wumbu hakei nasia lɛtɛma ti yɛ nasia yeya ti haani, kɔ i kɔbei gbatɛ la saagbuami va. Kɔbei ji a wote a tɔmasei lɔ kɛ Ɛlɔn tia ngi hinga lengeisia mia lee kungɔ ti yɛ a saagbuabla Jɛhova gama.

Kɛɛ Jɛhova longɔ yɛla i kɛ gbalauŋ kɛ Ɛlɔn tia ngi hinga lengeisia mia i loko loonga ti ma kɔ ti wote a saagbuabla. Fale i ndeilɔ Mojisi ma yɛɛ: ‘Pie numu yia i gbua kɛnyɛwu gbi lee hu Isuɛl i wa a ngi likpoi. Kɛɛ Liivai gɛnyɛwui va ta, pie Ɛlɔn i wa a ngi likpoi. Na woma ye tikpoi jisia kpɛlɛ wu Ngewɔ gula wɛɛ bu kayema gaŋaa gɔɔ bu. Numui na ngi loko loonga ngi ma, flaweisia ta vale lɔ ngi likpoi ma.’

Ji ngewoni, Mojisi lilɔ i tikpoisia gama gbee. Kɛ kpe lɛ, flaweisia tia nguweisia ti valengɔ Ɛlɔn nda likpoi ma! Bi tɔnga naa gbɛva mia Jɛhova pieni flaweisia ti vale Ɛlɔn likpoi ma?