Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 23

Fɛlo Hengailɔ

Fɛlo Hengailɔ

FO FELE leengɔ woma ji ndɔ wotebla ti mahumui gbuani kpindi wɛlei bu, Josɛfi yɛ tuŋ na. Ye ndɔ wotemui na lemailɔ Josɛfi ma. Kpindi yia ma, Fɛlo henga fele wueilɔ kɛɛ ii yɛ kɔɔ gbɔɔ ye mbui le. Bia ngi lɔ ma laani jii hu? Ji ngee woni, Fɛlo i ngi nɛmahuleeblei nasia loilɔ ti yɛ Iijipt kɛ i ye hengeisia hugɛnga a tie. Kɛɛ ti kpɛlɛ tii gui ta ye mbui hugɛ a Fɛlo.

Ndɔ wotemui gii lɔ naa a Josɛfi. Kɛ i ndenga Fɛlo ma yɛɛ: ‘Ji ngi yɛ kpindi wɛlei bu, kena yia yɛɛ na nahi a hengei ye mbui hugɛ.’ Gama kɛ Fɛlo pienga ti Josɛfi gbua kpindi wɛlei bu.

Fɛlo ngi hengeisia hugɛilɔ naa a Josɛfi yɛɛ: ‘Nya hengei hu, ngi nika wɔfila lɔilɔ nahi ti wɔlɔngɔ wa, kɛ ngi wɔfila lɔnga gbɔma nahi ti ganyangɔ wa. Kɛ ngi tɔnga nika ganyangɔ wɔfilei nasia ti nika wɔlɔngɔ wɔfilei nasia gbɔli.’

‘Hengei ye fele yii hu, ngi mba dala wɔfila lɔilɔ ti gbɔku, ti hitingɔ tao ti gbekpengɔ. Kɛ ngi mba dala wɔfila lɔnga nahi ti logbongɔ tao ti wopongɔ. Kɛ ye mba dala logbongoisia ti ye mba dala yekpengoisia gbɔlinga.’

Josɛfi ndeilɔ naa Fɛlo ma yɛɛ: ‘Henga fili jisia kpɛlɛ ye mbui yakpe. Nika wɔlɔngɔ wɔfilei nasia, kɛ mba hitingɔ wɔfilei nasia kpɛlɛ ti loni fo wɔfila lɔ va. Mɛhɛ a gboto lɔ Iijipt lɔlei ji hu fo wɔfila va. Na woma, mɛhɛ yekpe ɛɛ yɛ na fo wɔfila va.’

Na woma, Josɛfi ndeilɔ Fɛlo ma yɛɛ: ‘Loko loo nɛmahuleemɔ yia ma, kɔ i yaa mɛhɛ lɛma fo wɔfilei jisia gohu nahi mɛhɛ a gboto. Kɔ we nunga ta haa a ndɔlɛ fo wɔfilei nasia gohu nahi mɛhɛ yekpe ɛɛ yɛ na mɛ va.’

Fɛlo gohunɛilɔ na ma Josɛfi ndeni, kɛ i loko loonga Josɛfi ma kɔ i yaa mɛhɛ lɛma. Fɛlo Josɛfi woteilɔ a numu wa Iijipt lɔlei hu.

Fo wayakpa leengɔ woma ji mɛhɛ hindei gbɔuni, Josɛfi hinga 10 lɔilɔ ta wa. Bii kɔɔ lɔ yeni mia yɛla a tie? Ngi ndee waisia mia. Ti kɛkɛ Jekɔb mia ti looni Iijipt, ji mɛhɛ yɛ gbɔyɔ ma ti yeya Kenaan. Josɛfi ngi ndeengeisia gɔɔilɔ kɛɛ tia tii ngi gɔɔni. Bi kɔɔ lɔ gbɛva le? Gbɛva see Josɛfi yɛ lakpanga tao mayi na yɛ ngi ma i yɛ gba.

Josɛfi gii lɔ a hengei nasia i yɛ pieni ngi glongoi hu, kɛ ngi ndeengeisia ta wɛɛ lɔ ngi gɔɔ bu. Ba gii lɔ a na mu yɛ kaani? Josɛfi tɔilɔ naa kɛ Ngewɔ mia ngi yoyoni Iijipt, tao kɛ hinda yekpe va mia Ngewɔ ngi yoyoni na. Gbɔɔ bi giingɔ la Josɛfi pieni na woma? Mu tɔ lɛ.