Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 14

Ngewɔ Eblaham Lanayei Hugɔilɔ

Ngewɔ Eblaham Lanayei Hugɔilɔ

BIA tɔ ma na Eblaham pie ma pisoi ji hu? Mbowei lɔ ngi yeya, tao bi tɔa bɛ ngi longɔ i ngi lui waa. Gbɛva mia ngi longɔ i na wue? Pɛiŋ mua yaa yɛpɛ kɔlongɔ na ma, mu tɔ lɛ sia tia Seela ti ye ndui ji majɔɔni.

Ba gii lɔ a na Ngewɔ ndeni ti ma kɛ a pie lɔ ti ndo majɔɔ? Kɛɛ Eblaham tia Seela ti wovangɔ wa yɛla ndo le va. Kɛ nahu gbi, Eblaham langɔ la yɛla kɛ na gbi lee Ngewɔ ndenga, a pie lɔ. Mu tɔ lɛ naa gbɔɔ wueni.

Ji Ngewɔ ndeni yɛ a pie lɔ ti ndo majɔɔ, fo yia mia leeni kɛ Seela ndui lenga nahi ngi biyei mia a Aisak. A wati na, Eblaham gungɔ yɛla a fo 100, Seela fo 90. I wueilɔ sia lee Ngewɔ ndeni la.

Kɛɛ ji Aisak lakpani, Jɛhova Eblaham lanayei hugɔilɔ. I Eblaham looilɔ kɛ Eblaham lumanga yɛɛ: ‘Nya gbe!’ Kɛ Ngewɔ ndenga ngi ma yɛɛ: ‘Aisak wumbu bi hiindolo yiakpi, bi li ngiye yia ya nga kɛ a bie. Bi fonga na, ngi waa bi ngi gbua a saa.’

Na woteni a ndinyani ma hinda wa lɔ Eblaham gama, gbɛva see ngi longɔ wa yɛla a ngi lui. Tao gii la kɛ Ngewɔ yɛ ndenga Eblaham ma yɛ a Kenaan ve lɔ ngi laa lengeisia wɛ. Kɛɛ ji a ye wue ina Aisak haailɔ? Sia bɛ Eblaham ii yɛ kɔɔ na Ngewɔ longɔ i pie, kɛɛ tuŋ i woloilɔ ngi ma.

Ji i foni ye ngiyi ya, i saa gbuami looilɔ, kɛ i kɔwuisia landanga mahu, na woma kɛ i Aisak yiinga i ngi la mahu. Kɛ i mbowei gbuanga kɔ i ngi lui waa. Gama, kɛ Ngewɔ maikei ngi lolinga yɛɛ: ‘Eblaham, Eblaham!’ Kɛ Eblaham lumanga yɛɛ: ‘Nya gbe!’

Kɛ Ngewɔ ndenga ngi ma yɛɛ: ‘Baa loko la ndupui na ma tao baa kpalɛ gbii la ngi ma. Ngi kɔɔnga naa kɛ bi langɔ a nge, ajifa bii nya gomani a bi hiindolo yiakpi.’

Bia bii gii la kɛ lanaya wa mia a na Eblaham kɛni Ngewɔ hu? Ngi langɔ la yɛla kɛ hinda gbi ii na nahi Jɛhova ɛɛ gu a pie. Tao ngi langɔ la yɛla kɛ ina bɛ Aisak yɛ haailɔ, Jɛhova a gulɔ i ngi wu hei hu. Kɛɛ Ngewɔ ii yɛ loni Eblaham i Aisak waa. Fale, i mbalei yoyoilɔ kɔ Eblaham i kpua a saa.