Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 26

Joob Wɔnangɔ Wa Yɛla Ngewɔ Gama

Joob Wɔnangɔ Wa Yɛla Ngewɔ Gama

KINI ji mamanungɔ pisoi ji hu hiye? Ngi biyei mia a Joob. Ngi nyahin mia looni ngi gbla. Bi kɔɔ gbɔɔ i ndema Joob ma? I ndema lɔ ngi ma yɛɛ: ‘Woove Ngewɔ ma bi haa.’ Mu tɔ lɛ naa gbɛva mia i njɛpei ji bonda leni, tao gbɛva mia kpalei lani Joob ma.

Joob yɛni wɔɔ a numu wɔnangɔ wa lɔ tao i yɛ a wolo Jɛhova ma. I yɛ Ɔs lɔ, Kenaan gblanga. Jɛhova loilɔ wa a Joob hinda. Kɛɛ numu yia yɛɛ na nahi ngi juyangɔ a ngie. Bi ye numui na gɔɔ lɔ?

Setana mia. Maika nyamu mia a ngie na ngi juyangɔ a Jɛhova. Sia lee i pieni Adam tia Iv ti woove Jɛhova ma, i giilɔ la kɛ a gulɔ i pie numui kpɛlɛ i woove Jɛhova ma. Kɛɛ, ii guilɔ i na wue? Ɔ-ɔ, ii guni. Gii lɛ a pɔnablei nasia kinii mu kaa wuenga kɔlongɔ ti ma. Ti lolɛ mia ba gu bi ti la gɛ?

Jekɔb tia Josɛfi ti haangoi woma, Joob mia ngi wɔnangɔ yɛla Jɛhova gama i lee numui kpɛlɛ ma yɛ ndunyi hu. Jɛhova longɔ yɛla Setana i kɔɔ kɛ ɛɛ gu aa pie numui kpɛlɛ i woove ngi ma. Fale, i ndeilɔ Setana ma yɛɛ: ‘Joob lɔ lɛ, sia ngi wɔnangɔ la nya gama.’

Kɛ Setana ndenga yɛɛ: ‘A ye pie ɛɛ wɔna bi gama, jifa bi ngi lubanga na va yana. Kɛɛ kpatei na kpɛlɛ gbua lɛ ngi yeya bi tɔ ina ɛɛ woove bi ma.’

Kɛ Jɛhova ndenga ngi ma yɛɛ: ‘Kɛ li, bi kpɛlɛ gbua ngi yeya. Tao na gbi lee bi longɔ bi pie a Joob pie, bi tɔ ina a woove lɔ nya ma. Kɛɛ baa ngi waa.’

Haala, Setana pieilɔ ti Joob nikanga kɛ ngi nyɔmisia huma, kɛ ti ngi mbalanga waanga. Tao i pieilɔ vivi wa i wa, i Joob lenga puuisia waa. Na woma, i higbɛ wa yeilɔ Joob ma. Joob mɔnɛilɔ wa. Na va mia ngi nyahin ndeni ngi ma yɛɛ: ‘Woove Ngewɔ ma bi haa.’ Kɛɛ Joob ii pieni klobɛɛ va. I gbɛɛ na ma, ngi ndiamɔ sawanga ti wailɔ ngi gama, kɛ ti ndenga ngi ma tɛ hinda nyamui mia i pienga. Kɛɛ tuŋ Joob i wooveni Ngewɔ ma.

Ji pieilɔ Jɛhova gohu i nɛɛ wa. Na woma, Jɛhova i Joob lubailɔ sia lee bi tɔ ma la pisoi ji hu. I ngi haleilɔ, i pie Joob i ndenga 10 le, tao i pieilɔ nikanga kɛ nyɔmisia ti gboto Joob yeya i lee ye haala yi ma.

Ba gulɔ bi wɔna a Ngewɔ sia Joob pieni la? Bi na wuenga, a nyande lɔ, gbɛva see Ngewɔ a bi luba lɔ. Ba gulɔ bi yɛna kunafɔ va, ji ndunyi ji a nyande sia lee kata nyandi na hu yɛna Idɛn.