Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 5

Ti Tatoilɔ a Mɔnɛ La

Ti Tatoilɔ a Mɔnɛ La

JI NGEWƆ Adam tia Iv gbɛni katei na hu, mɔnɛ gboto lailɔ ti ma. Ti tatoilɔ a yenge la kɔ ti gu ti la mɛhɛ ma. Ngali wuisia ti valeilɔ kpoto ndɔgboi hu. Ji mia ti maini ji ti Ngewɔ layei gbuani hu.

Ye na nyamungɔ i lee kpɛlɛ ma, ti baailɔ a kunafɔ lɛvui. Gii la kɛ Ngewɔ ndeilɔ ti ma yɛ ti ngulu yia ye nguwei mɛnga ta haa lɔ. Tao fuli na lee ti mɛni ti tatoilɔ a wova la kloklo haŋ kɛ ti haanga. Kpowa hinda wa mia a na ti pieni!

Ji Ngewɔ ti gbɛni katei na hu, ta mia ti tatoni a ndenga le la. Ji kɛ ma lɔ kɛ ti lengeisia bɛ ta wova lɔ, kɛ ti haanga.

Ina Adam tia Iv ti yɛ woloilɔ Jɛhova ma, tia ti lengeisia ta yɛɛ wɔɔ a yɛ ndunyi ji hu a kohunɛ kunafɔ va. Muɛ yɛ a higbɛ, muɛ yɛ a wova, tao muɛ yɛ a haa.

Ngewɔ longɔ mu yɛ ndunyi ji hu a kohunɛ kunafɔ va. Tao i ndea kɛ na a wue lɔ foo yia ma. Ndunyi hu a nyande lɔ a wati na, tao numui kpɛlɛ a yɛɛ na a kahugbua. Tao ndiamɔyia yekpe a yɛɛ numui kpɛlɛ luahu kɛ Ngewɔ.

Ndiamɔyia gbi ii ya yɛ Ngewɔ tia Iv luahu, na va mia kpalɛ gboto lani ngi ma ji i yɛ a ndenga le. Bii gii la kɛ jifa Iv Jɛhova layei gbuani hu na va mia kpalei ji kpɛlɛ lani ngi ma?

Adam tia Iv ti ndenga gboto leilɔ. Ti ti haala lui loilɔ a Keen, kɛ ti ye poma yi loinga a Ebɛl. Mu tɔ lɛ gbɔɔ wueni ti luahu.