Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 10

Njave Wai

Njave Wai

NASIA tii yɛ ndɛndei hu, ti yɛɛ a lee ta ti ma gbiisia gbua tuŋ. Tii yɛ lani la tuŋ kɛ njavi a wa lɔ. Kɛnga pɛiŋ ti yɛɛ a Noani yɛlɛ i lee kpɛlɛ ma ji ti waani ndɛndei hu. Kɛɛ hu ii guani ti gbeilɔ a yɛlɛ la. Bi kɔɔ gbee?

Wati na ti lii ii yɛ ma, njei tatoilɔ a wa la. Njei yɛɛ a wa sɔpɔsɔpɔ sia lee njei a yɛ bi wumba faji hu ba pote. Tɔnya mia vui Noa yɛ a nde. Kɛɛ numu gbi ii ya guni aa jɔkɔ ndɛndei hu, gbɛva see Jɛhova yɛ nda gbɔunga kpauŋ.

Ye njei yɛɛ a yei, a kɔti wawaisia gikilɛ, a ngulisia wukpua tao himia hu yɛ a gindɛ. Hu ii guani kɛ i tatonga a ndɔɛ wumbu la. Nungeisia ti luwailɔ wa kɛ ti tatonga a lɛ la ngiyisia ya. A yɛɛ a nyande ina ti yɛ woloilɔ Noa ma, kɔ ti jɔkɔ ndɛndei hu a wati na ndawongɔ. Kɛɛ na leengɔ yɛla naa.

Njei wailɔ foo 40 va kɛ kpindi 40, kɛ i venga. Hu ii guani kɛ njei ngiye wawaisia gbi ma gbɔinga. Sia lee Ngewɔ ndeni la himia i wueni. Nungei nasia kɛ fuhaiŋ nasia kpɛlɛ tii yɛ ndɛndei hu, ti haailɔ. Kɛɛ nasia kinii ti yɛ ndɛndei hu, ti mabawoilɔ.

Noa tia ngi lengeisia ti ngenge yekpe wa lɔ wueni ji ti ndɛndei na gbatɛni. Ye ndɛndei ji heilɔ njei ya. Ji njei hu leeni, fuli tatoilɔ a gbua la. Kɛɛ njei mia yɛ ndunyi kpɛlɛ ma wumbungɔ, bɛɛ gbɛogbɛ yeka lɔ kɛ lee ndɛndei na yɛ heini njei ya.

Nɛfilisia tii ya yɛna nunga ya gbalɛ va. Ti kpɛlɛ ti haailɔ tia ti njeni kɛ nunga nyamui yepekeisia kpɛlɛ. Kɛɛ gbɛ mia wueni a ti kɛkɛni?

Bi kɔɔ lɔ kɛ nɛfili jisia ti kɛkɛni tii yɛni a nuuvunga. Fale, sia lee njei tatoni a ndunyi ma wumbu la, ti maika luwuisia wumbuilɔ kɛ ti yamanga ngelegohu. Kɛɛ Ngewɔ ii ya lumani kɔ ti hu i kpɔ a ngi maika yekpisia. Ti woteni naa a Setana nda maikeisia lɔ. Baibui ti lolilɔ a ngafa nyamuisia.

Ngewɔ pieilɔ naa fɛfei i vɛ ndunyi ma kɛ njei tatonga a bɛli la. Ngawu lɔɔlu leengɔ woma, ndɛndei liilɔ i loo ngiye wa yia ya. Hu ii guani kɛ Noa tia ngi mableisia ti tatonga a ngiyisia wumba lɔ la.

Noa ŋɔni lɛlɛi yia looilɔ kɔ i kɔɔ ina njei bɛlinga. Ye ŋɔni ji yɛɛ a li a yama, gbɛva see hinda gbi ii yɛna hei va na.

Na woma, i ŋɔni yepekei looilɔ. Kɛɛ ji ta bɛ lini, i leeteeilɔ haŋ kɛ i yamanga, gbɛva see ii hinda gbi lɔni hei va na. Noa ye ŋɔni ji looilɔ gbɔma, kɛɛ ji naa i yɛ wama, ndaa wundi yɛɛ ngi la. Noa kɔɔilɔ naa kɛ njei lɔ bɛlima, kɛɛ i ye ŋɔni ji looilɔ gbɔma. Kɛɛ wati ji naa, ii ya yamani.

Ngewɔ ndeilɔ naa Noa ma yɛɛ: ‘Gbua ndɛndɛ wai hu wua bi mabla, kɛ fuhaiŋsia.’ Ti yɛɛ ndɛndei na hu i lee fo yia ma. Bii gii la kɛ ti gohunɛilɔ wa ji ti gbuani ti tɔ kɛ numu nyamu gbii yana?