Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NDƆMI YE 6

Ndui Ye Kpekpi kɛ Ye Nyamui

Ndui Ye Kpekpi kɛ Ye Nyamui

KEEN tia Ebɛl lɔ lɛ naa. Ti venjɔ ti lakpanga. Keen yɛni a kpaalamɔ lɔ, i yɛ a tuhaiŋsia lɔ hiŋ mɛ va. Sia nyikɔ kuji na, fakai, lumbi kɛ tuhaiŋ yepekeisia.

Ebɛl ta yɛni a mbala mahugbemɔ lɔ. Ngi longɔ yɛla a mbalangeisia ti mahugbe la. I loilɔ ti mahugbe ma haŋ ti gboto.

Foo yia ma, Keen wailɔ kulo a tuhaiŋsia i hini, kɛ Ebɛl waa a mbalei kɔ ti saa gbua Ngewɔ gama. Jɛhova gohunɛilɔ Ebɛl ma kɛ ngi jaahaiŋ. Kɛɛ ngi gohu ii nɛini Keen ma kɛ ngi jaahaiŋ. Bi kɔɔ gbɛva le?

Ii gɛni kɛ Ebɛl nda jaahaiŋ gbekpengɔ yɛla ii lee Keen ndei ma, kɛɛ jifa Ebɛl wuehinda yekpengɔ yɛla na va mia. Ngi longɔ yɛla a Jɛhova kɛ ngi ndii. Kɛɛ Keen ta ngi wuehinda nyamungɔ wa yɛla tao ii yɛ loni a ngi ndii.

Ngewɔ ndeilɔ Keen ma kɔ i ngi wuehindei mahugbe, kɛɛ ii woloni. I lileeilɔ wa jifa Ngewɔ longɔ a Ebɛl i lee ngi ma. Fale, Keen ndeilɔ Ebɛl ma yɛ, ‘wa mu li fidi ya.’ Sia lee Keen tɔni kɛ tia ta felekpe mia ti na, i nguli wumbuilɔ i Ebɛl lee la kɛ i haanga. Hinda yekpe mia a na Keen pieni?

Sia bɛ Ebɛl haani, kɛɛ tuŋ Ngewɔ ii ya lemani ngi ma. Ebɛl wuehinda yekpengɔ wa yɛla, tao Jɛhova ɛɛ lema numui na bonda ma kunafɔ va. Foo yia ma, Jɛhova a Ebɛl wu lɔ hei hu. A wati na Ebɛl ɛɛ ya haa gbɔma, a yɛɛ ndunyi ji ma kunafɔ va. Bi gohu ɛɛ nɛi numui na bonda gɔɔ va?

Kɛɛ Ngewɔ gohu ɛɛ nɛi nungei nasia ma ti wuengɔ sia Keen na. Ngewɔ Keen mɔnɛilɔ ngi ndii waa va. I ngi gbuailɔ ngi mabla ma i ngi yoyo poloŋ hinda yeka. Kɛɛ ji i yɛ lima, i lilɔ a ngi ndee nyahalo yia, kɛ i ngi wotenga a ngi nyahin.

Wati lɛnga leengɔ woma, Keen tia ngi nyahin ti tatoilɔ a ndenga le la. Adam tia Iv ti lenga yepekeisia bɛ ti heinyɔya wueilɔ kɛ ti ndenga lenga. Hu ii lɛmbini kɛ nunga ti gbotonga ndunyi hu. Mu kaa wue lɛ naa kɔlongɔ ti lɛnga ma.