Kuaʼan-ní nu̱u̱ iyo

Kuaʼan-ní nu̱u̱ índice

 LECCIÓN 11

¿Na̱sa chindee nu̱u̱-yo nda principio ja yoso nu̱u̱ Biblia?

¿Na̱sa chindee nu̱u̱-yo nda principio ja yoso nu̱u̱ Biblia?

1. ¿Nakú jiniñuʼun-yo ichi kiʼin-yo?

¿Na̱sa chindee nda principio ja vaji nu̱u̱ Biblia tágua koto-yo maa-yo? (SALMO 36:9)

Jeová, Ta̱tá-yo ji ja ni saʼa-yo, ndíchi ka-Ya ma sú maa-yo. Suni kundaʼvi ini-Ya ji ndɨʼvɨ ini-Ya ja kuu-yo. Nduu ni saʼa Ya-yo ja koo ji̱ka-yo nu̱u̱-Ya (Jeremías 10:23). Tanu kuu nda suchí luli ja jiniñuʼun-ji ja ta̱tá-ji chuʼun ichi-ji, suni sukua jiniñuʼun-yo ja chuʼun ichi-Ya nda-yo (Isaías 48:17, 18). Nda ichi ja taji nda principio ja vaji nu̱u̱ Biblia kuu ɨn ja vaʼa ja jinimani̱ Yandios nu̱u̱ nda-yo. Kaʼvi-ní 2 Timoteo 3:16.

Nda ley ji principio ja taji Jeová steʼen nu̱u̱-yo na̱sa kundee vaʼa ka-yo de kachi na̱sa ni̱ʼi̱n-yo ja vaʼa ku̱ú-yo nɨkani ichi nu̱u̱. Sɨkɨ ja maa-Ya kuu ja ni saʼa-yo, jiniñuʼun ja kandija sii-yo nu̱u̱ ja kachi-Ya. Kaʼvi-ní Romanos 15:4 ji Apocalipsis (Revelación) 4:11.

2. ¿Naguá kuu nda principio ja vaji nu̱u̱ Biblia?

Nda principio ja vaji nu̱u̱ Biblia kuu tuʼun nda̱a̱ ja chindee nu̱u̱-yo ja kani vaʼa ini-yo na̱sa ka̱ji vaʼa-yo ja saʼa-yo nu̱u̱ sin sin tiñu. De ley kuu ɨn tuʼun ja kachi naguá saʼa-yo nu̱u̱ ɨn ni̱ tiñu (Deuteronomio 22:8). Tágua kuni-yo na̱sa kuatiñu-yo ɨn principio nu̱u̱ ɨn tiñu, jiniñuʼun ja kuatiñu-yo janduni-yo (Proverbios 2:10-12). Tanu kuu, Tutu Yandios steʼen ja ja teku kuu ɨn ja kutaʼvi-yo nu̱u̱ Yandios. Principio yaʼa kánuu chi ku̱ú kuatiñu-yo nu̱u̱ tiñu saʼa-yo, veʼe-yo ji suni ta kee ji̱ka-yo, chi nachuʼun ini-yo ja jiniñuʼun koto-yo maa-yo. Kaʼvi-ní Hechos 17:28.

3. ¿Nde kuu uu principio ja kánuu tuni ka?

Jesús ni kaʼan-de sɨkɨ uu principio ja kánuu tuni ka. Ja xinañuʼun steʼen na jáʼa kuu ja ni jakoo-yo nu̱u̱ ñuʼun: ja kuni-yo Yandios, kundaʼvi ini-yo maa-Ya ji satiñu nda̱a̱-yo nu̱u̱-Ya. Jiniñuʼun ja kuʼun  ini-yo tuʼun yaʼa nu̱u̱ ndɨʼɨ ja saʼa-yo (Proverbios 3:6). Nda ñayí ja kandija tuʼun yaʼa ku̱ú kitaʼan-ji jín Yandios de kenda-ji koo sii ndija ini-ji ji kuteku nɨkani-ji. Kaʼvi-ní Mateo 22:36-38.

Principio uu chindee ja kitaʼan vaʼa-yo jín nda ñayí (1 Corintios 13:4-7). Nu saʼa-yo tuʼun yaʼa, saʼa-yo tanu saʼa Yandios jín nda ñayí. Kaʼvi-ní Mateo 7:12 ji 22:39, 40.

4. ¿Na̱sa chindee nu̱u̱-yo nda principio?

Nda principio ja vaji nu̱u̱ Biblia skanda ini-yo ja kundaʼvi taʼan-yo ji kundee inuú-yo jín ñayí veʼe-yo (Colosenses 3:12-14). Ɨn nda principio yaʼa jito ñayí veʼe, chi kachi ja nda ñayí tandaʼa jiniñuʼun ja kundee nɨkani-ji. Kaʼvi-ní Mateo 19:5.

Nu kandija-yo nda principio ja yoso nu̱u̱ Biblia suni chindee ja koto vaʼa-yo ndatiñu-yo jín ja ndoʼo ini-yo. Iyo nda ñayí ja ndukú-ji ñayí tágua satiñu nu̱u̱-ji, ñayí ja saʼa-ji tanu kaʼan nda principio, ja nduu tikeʼe ndaʼá ji ja satiñu vaʼa-ji (Proverbios 10:4, 26; Hebreos 13:18). De suni, Tuʼun Yandios steʼen nu̱u̱-yo ja koo sii ini-yo jín ndatiñu ja nevaʼa-yo, ji kundɨʼvɨ ka ini-yo kitaʼan vaʼa-yo jín Yandios ma sú jín nda ndatiñu. Kaʼvi-ní Mateo 6:24, 25, 33 ji 1 Timoteo 6:8-10.

Nda principio ja yoso nu̱u̱ Tutu Yandios suni chindee ja koo vaʼa maa-yo, tanu kuu ley Yandios ja kaʼan ja nduu iyo vaʼa ja ji̱ni ñayí, ku̱ú skáku-yo nu̱u̱ kue̱ʼe̱ ji nu̱u̱ tundoʼo xée̱n ja saʼa ja kúu̱-yo (Proverbios 14:30; 22:24, 25; 23:20). Vese Jeová jeʼe-Ya tuʼun ja koʼo-yo ndíxi, nduu taʼa̱n ini-Ya ja ji̱ni-yo (Salmo 104:15; 1 Corintios 6:10). Nda principio ja yoso nu̱u̱ Biblia chindee ja koto-yo ja saʼa-yo ji ja jani xini-yo (Salmo 119:97-100). De nda-yo ja kuu-yo cristiano nda̱a̱, nduu kandija-yo nda tuʼun yaʼa sɨkɨ ja iyo ja kúni-yo ni̱ʼi̱n-yo, chi saʼa-yo sukua tágua koo yɨñuʼún-yo nu̱u̱ Ta̱tá-yo Jeová ja iyo andɨvɨ́. Kaʼvi-ní Mateo 5:14-16.