Kuaʼan-ní nu̱u̱ iyo

Kuaʼan-ní nu̱u̱ índice

 LECCIÓN 9

¿Na̱sa kuu koo sii ini nda ñayí veʼe?

¿Na̱sa kuu koo sii ini nda ñayí veʼe?

1. ¿Nakú kánuu ja tandaʼa ñayí nu̱u̱ ley?

Jeová, Yandios sii ini nu̱u̱ ja vaji ndɨʼɨ tuʼun vaʼa, kúni-Ya ja ndɨʼɨ ñayí veʼe koo sii ini-ji (1 Timoteo 1:11). Maa-Ya ni jani ini-Ya nde xinañuʼun ja tandaʼa ñayí. Ja tandaʼa ñayí nu̱u̱ ley saʼa ja koo sii ini ji koo vaʼa nda seʼe ji nda ta̱tá. Nda ñayí ja kúni-ji kandija-ji nu̱u̱ Yandios kánuu tandaʼa-ji tanu kachi nu̱u̱ ley. Kaʼvi-ní Lucas 2:1, 4, 5.

Ja jani xini Yandios sɨkɨ ja tandaʼa kuu ja ɨn teé ji ɨn ñaʼan kánuu kundee ndúu̱-de nɨkani. Kúni-Ya ja yɨɨ́ ji ñasɨʼɨ ma stáʼvi nu̱u̱ taʼan-de (Hebreos 13:4). Jeová nduu taʼa̱n kuiti̱ ini-Ya ja kusíín nda ñayí ja ni tandaʼa (Malaquías 2:16). De vese sukua, jeʼe-Ya tuʼun ja kusíín taʼan-ji ji tandaʼa-ji inka ji̱chi nu nde ɨn-ji ni kɨ̱vɨnduu jín inka ñayí. Kaʼvi-ní Mateo 19:3-6, 9.

2. ¿Na̱sa jiniñuʼun ja kundeka taʼan yɨɨ́ ji ñasɨʼɨ?

Jeová ni saʼa-Ya teé ji ñaʼan tágua ka chindee taʼan-ji ta ka tandaʼa-ji (Mateo 19:4, 5). Yɨɨ́ kuu xini nu̱u̱ ñayí veʼe, de suu-de kuu ja xinañuʼun ja kani xini-de na̱sa ni̱ʼi̱n-de ndɨʼɨ ja jiniñuʼun ja kuu ñayí veʼe-de, ji steʼen-de sɨkɨ tuʼun Yandios nu̱u̱ ñayí veʼe-de. Yɨɨ́ kánuu sndoo̱-de jaku nda ja taʼa̱n ini-de, sɨkɨ ja kutoo-de ñasɨʼɨ-de. Nda ñayí ja ni tandaʼa jiniñuʼun kundaʼvi ini-ji ji koo yɨñuʼún nu̱u̱ taʼan-ji. Sɨkɨ ja ndúu̱-de ka kuu-de ñayí kuachi kánuu ja ka kutuʼva-de kunee kaʼnu ini nu̱u̱ taʼan-de tágua ku̱ú ka kundee sii-de. Kaʼvi-ní Efesios 4:31, 32; 5:22-25, 33, ji 1 Pedro 3:7.

3. ¿Naguá ku̱ú ja saʼa nda ñayí ja ni tandaʼa ja nduu ndee sii-ji?

Nu ɨn ñayí ja ni tandaʼa de iyo tundoʼo nu̱u̱-ji, jiniñuʼun ja chuʼun ini nda-ji tágua kundaʼvi ini nu̱u̱ taʼan-ji (1 Corintios  13:4, 5). Tuʼun Yandios nduu kaʼan ja ñayí ja ni tandaʼa-ji ka kundee síín taʼan-ji tágua sukua de kuu ndasaʼa vaʼa tundoʼo ja iyo nu̱u̱ nda-ji. Kaʼvi-ní 1 Corintios 7:10-13.

4. ¿Naguá kúni Yandios ja ku̱ú nda seʼe?

Jeová kúni-Ya ja nda seʼe ka koo sii ini-ji. Ñukua kuu ja steʼen-Ya na̱sa saʼa-ji tágua kuu koo sii ini-ji ta kua̱chi-ji. De suni kúni-Ya ja na ka kundiki̱-ji nda tuʼun ndíchi ji kuatiñu vaʼa nda-ji ndɨʼɨ ja vaʼa ja jini nda ta̱tá-ji (Colosenses 3:20). Suni kúni-Ya ja na kuni-ji na̱sa vii kuu ja satiñu-ji nu̱u̱ Yandios ji nu̱u̱ Seʼe yɨɨ́-Ya. Kaʼvi-ní 2 Timoteo 3:14, 15 ji Mateo 19:13-15.

5. ¿Na̱sa kuu chindee nda ta̱tá nu̱u̱ nda seʼe-de tágua kundee sii ini nda-ji?

Nda ta̱tá kánuu ja ndukú-de ja kaji-ji, saʼma-ji ji ɨn veʼe nu̱u̱ kundee-ji (1 Timoteo 5:8). Ma sú yaʼa ni̱ kuu ja saʼa-de. Suni kánuu ja steʼen-de ja kundaʼvi ini-ji Yandios de saʼa-ji tanu saʼa-Ya (Efesios 6:4). Nu nda ta̱tá ka steʼen-de ja ka kundaʼvi ini-de Yandios, ja yaʼa saʼa ja jinú anu-ji saʼa-ji tanu saʼa nda ta̱tá-ji. Nu ka kutuʼva-ji ja yoso nu̱u̱ Tuʼun Yandios ku̱ú saʼa ja kani vaʼa xini-ji. Biblia kachi: “Israel kunini-ro chi: Jeová Yandios-yo kuu matuʼun Jeová. De kánuu kundaʼvi ini-ro Jeová Yandios maa-ro jín ndɨʼɨ anu-ro jín ndɨʼɨ ja kuu maa-ro jín ndɨʼɨ fuerza-ro. De nda tuʼun yaʼa ja tetiñu-ni nu̱u̱-ro mita kánuu ja koo ini anu-ro; de kánuu ja steʼen-ro nu̱u̱ seʼe-ro de ndakani-ro nu̱u̱-ji ta ndee-ro veʼe-ro ji ta jika-ro ichi ji ta kiʼin-ro kusun-ro ji ta nako̱o-ro” (Deuteronomio 6:4-7). Kaʼvi-ní 2 Timoteo 3:15.

Nda seʼe ka jiniñuʼun-ji ja nda ta̱tá kaʼan-de tuʼun chindee nu̱u̱-ji ji kaʼan-de tuʼun ja saʼa ja na koo sii ini-ji nu saʼa vaʼa-ji ɨn tiñu. Iyo ta jiniñuʼun ja nda ta̱tá kaʼan-de nu̱u̱ seʼe-de ji kani de-ji, de sukua ku̱ú ka̱ji vaʼa-ji ichi kiʼin-ji tágua ma kɨ̱vɨ-ji nu̱u̱ tundoʼo (Proverbios 22:15). De vese sukua kuu, ma ku̱ú kani xée̱n de-ji. Kaʼvi-ní Colosenses 3:21.

Nda testigo Jeová ni ka tava̱-de kuaʼa tutu ja kuu chindee nu̱u̱ nda ta̱tá ji nda seʼe. De ndɨʼɨ yoso nu̱u̱ Tutu Yandios. Kaʼvi-ní 2 Timoteo 3:16.