Kuaʼan-ní nu̱u̱ iyo

Kuaʼan-ní nu̱u̱ índice

 LECCIÓN 5

¿Na jáʼa kuu ja ni saʼa Yandios Ñuʼun?

¿Na jáʼa kuu ja ni saʼa Yandios Ñuʼun?

1. ¿Nakú ni saʼa Yandios Ñuʼun?

Vii tuni ni saʼa Jeová Ñuʼun tágua ku̱ú kuteku-yo. Ta ni saʼa-Ya Adán ji Eva, ñayí xinañuʼun, ma sú andɨvɨ́ ni jeʼe-Ya tágua ka nakaya̱-de ñukua. Chi Yandios ja ni saʼa-Ya nda ángel tágua ka kuteku andɨvɨ́ (Job 38:4, 7). Jeová ni jeʼe-Ya ɨn ñuʼun vii ja ni nani Edén nu̱u̱ teé xinañuʼun (Génesis 2:15-17). Suni ni jeʼe-Ya tuʼun nu̱u̱ teé yaʼa ji nu̱u̱ nda seʼe-de tágua ku̱ú ka kuteku-de nɨkani nu̱u̱ Ñuʼun. Kaʼvi-ní Hechos 17:26 ji 1 Juan 2:17.

Ja ñukua de jaku ni̱ nu̱u̱ Ñuʼun yaʼa ni kuu ñuʼun vii Edén. Adán ji Eva kánuu ja ka koo seʼe-de tágua ka saʼa chitú-de ñuuyɨvɨ́ de jaku jaku ka ndasaʼa kaʼnu-de ñuʼun vii ñukua (Génesis 1:28). Ñuʼun yaʼa nɨkani kuu nu̱u̱ kundee nda ñayí, de ma naa kuiti̱. Biblia kachi: “Ni saʼa-Ya ñuʼun nu̱u̱ koo-ji; nduu na ku̱ú skanda, kúsá sukua koo nɨkani” (Salmo 104:5).

2. ¿Nakú nduu kuu mita Ñuʼun yaʼa ɨn ñuʼun vii?

Sɨkɨ ja Adán ji Eva nduu ni kandija-de nu̱u̱ Yandios ni tava̱-Ya ndúu̱-de nu̱u̱ ñuʼun Edén (Génesis 3:23, 24). Ja ñukua kuu ja ni naa Ñuʼun Vii xinañuʼun, de nchaʼa ka na koo ja kuu ndasaʼa vaʼa Ñuʼun yaʼa. Biblia kachi: “Ñuʼun yaʼa ni je’e nu̱u̱ ndaʼá ja ju’vi” (Job 9:24).

Nusaá de, ¿a ni sndoo̱ Jeová tuʼun ja kúni-Ya saʼa-Ya jín ñuuyɨvɨ́? Nduu, chi maa-Ya kuu ja ndakui tuni ka de ndɨʼɨ kuu ja ku̱ú saʼa-Ya (Isaías 45:18). De ichi nu̱u̱, Yandios saʼa-Ya ja kuteku ñayí nɨkani ta ni jani ini-Ya ja ku̱ú nde xinañuʼun. Kaʼvi-ní Mateo 5:5.

3. ¿Na̱sa ndu̱u̱ nu̱u̱ ñuʼun yaʼa ɨn Ñuʼun Vii?

Jesús, Rey Reino Yandios, ndasaʼa-de Ñuʼun yaʼa ɨn ñuʼun vii. Suu-de jín nda ángel xnaa ndɨʼɨ ñayí ja kɨtɨ̱ ini ndeʼe Yandios nu̱u̱ guerra Armagedón. De ñukua de kasi̱-de Tachi Juʼvi  nu̱u̱ ɨn mil kuiya, ángel ndevaʼa ini ja ni saʼa ja Adán ji Eva ma kandija-de nu̱u̱ Yandios. Nda ñayí ja ka satiñu nu̱u̱-Ya ka kuteku-ji kɨvɨ ja xnaa-Ya ja ndevaʼa, chi Jesús koto-de ji chuʼun ichi-de nda, de ja sándiʼi kundee sii ñayí nɨkani nu̱u̱ ɨn Ñuʼun Vii. Kaʼvi-ní Apocalipsis (Revelación) 20:1-3 ji 21:3, 4.

4. ¿Na tiempo ndɨʼɨ tundoʼo?

¿Na tiempo xnaa Yandios ja ndevaʼa? Jesús ni jeʼe-de ɨn “seña” tágua kuni-yo na tiempo vakuñati ja kuu yaʼa. Nda tundoʼo ja iyo mita, ku̱ú saʼa ja ma kuteku ka ñayí, yaʼa steʼen ja ndee-yo nda kɨvɨ ja kachi Biblia ja nani “nda kivi kuandiʼi”. Kaʼvi-ní 2 Timoteo 3:1 ji Lucas 21:7-14.

Nu̱u̱ ɨn mil kuiya ja tatuni Jesús nu̱u̱ Ñuʼun nde andɨvɨ́, jaku jaku xnaa-de nda ja saʼa ja ndoʼo-yo (Isaías 9:6, 7; 11:9). Ma sú maa ni̱ rey kuu-de, chi suni ku̱ú-de ɨn sutu kuñaʼnu, de xndóo-de kuachi nda ñayí ja kutoo-ji Yandios. De sukua, Yandios kuatiñu-Ya Jesús tágua xnaa-Ya ja yɨɨ ñayí, kue̱ʼe̱ ji ja ji̱ʼi̱. Biblia kachi: “De ni̱ ɨn ñayí kachi-ji:‛Kúʼu̱-ni’” (Isaías 33:24). Kaʼvi-ní 1 Corintios 15:26.

5. ¿Nde kuu ja ku̱ú ka kuteku nu̱u̱ ɨn Ñuʼun Vii?

Nu̱u̱ Salón del Reino kuu kuni-ní nda ñayí ja ka kutoo-ji Yandios de ka kúni-ji ka kutuʼva-ji saʼa-ji ja taʼa̱n ini-Ya

Nda ñayí ja kandija-ji nu̱u̱ Yandios ka kuteku-ji nu̱u̱ Ñuʼun Vii (1 Juan 2:17). Jesús ni ndetiñu-de nda ñayí ja ni ndiki̱ nu̱u̱-de ja na ka nandukú nda ñayí ja vaʼa anu-ji tágua sukua de ni̱ʼi̱n-ji ja ndakuataʼvi Ya-ji. Mita, Jeová saʼa tuʼva-Ya kuaʼa tuni millón ñayí ja ku̱ú kuteku-ji nu̱u̱ ɨn Ñuʼun Vii (Sofonías 2:3). Nda ñayí ja ndutútú-ji ini nda Salón del Reino nda testigo Jeová —nu̱u̱ ndaka ñayí veʼe ja ka satiñu-ji nu̱u̱ Yandios— ka kutuʼva-de ka kuu-de ɨn yɨɨ́ ji ɨn ta̱tá vaʼa tágua ka kuni-de na̱sa chindee nda tuʼun vaʼa ja taji Biblia. Kaʼvi-ní Apocalipsis 15:4.