Skip to content

Skip to secondary menu

Jehova Witnes

Melpa

Nim Ik Kupa Ei Pilin E?

Nim Ik Kupa Ei Pilin E?

NAMBA ik kupa ei? Ik ou mat wamp mbu ndi waltetmen mbu. Taim mat ken nim ya askim i etpa mbu nga peten ko:

  • God ndi ten kupa pelpa kandpa etem nda?
  • El na mintil nui ugl mbu pora nimba mna?
  • Wamp korum e, epta etem mel nant?
  • Wamp korung mbu kanda kinmin nda?
  • Na beten namba eteptamba, God ndi kum temba?
  • Laip ila amamas kandep timb mel nant?

Askim kigl nga, bekim mbu nil kandek tin? Nim wamp elpa elpa wultin nda, ik bekim eng mbu elpa elpa ba. Lotu etemin wamp o rup etemin bunga bekim mbu elpa elpa. Bekim mat akep kongun em da, wote kanda natmba.

Buk tenta tila mint bekim mendpugl kigl petem. Ik kupa nga buk. Jisas Krais ndi God ken beten etpa i nitim: ‘Nim nga ik ei ama kupa.’ (Jon 17:17) Ik ei akep Baibel netemen. Ogla askim kigl nga Baibel ila bekim kun kupa kigl, pepa mana oronga ila petim nim kanda kanin.

God Ndi Ten Kupa Pelpa Kandpa Etem Nda?

A man surrounded by a crowd of people

IK EI NAMBTANGA WALTETMEN: Ya mui ila wamp etpa mintil ngi ugl na etpa rui ugl mbu peka rorum. Lotu pugli ndi mintil tetmen ugl mbu, God nga laik ei nek lainim entetmen.

BAIBEL NDI I NETEM: God ndi ugl kit ti ama natetem. Jop 34:10 (Buk Baibel) ndi netem: “God Rondoggl Mbu Nga Pugl Wo ei ndi, wamp etpa rui ugl mbu ama kanda iti natmba.” God ndi wamp mbu nga ugl kai mbu entmba. Ei nga, Jisas ndi beten i etek itai nitim: ‘Ten nga mugl kona Wuta o! Nim nga…wamp tepa mumuk rui ugl ei wangga! Mugl kona ila nim nga man ik petmen ei mel, ya mui kona mbila i ku itamin!’ (Matyu 6:9, 10) God ndi ten nga putem ugl ei mandapa tetem. Ei nga nimba ken ugl ou ti itim ei, elim nga laik untnga pitim ei etpa kupa entemba.—Jon 3:16.

Ila ya kani ku Stat 1:26-28, “Buk Baibel”; Jeims 1:13; ken 1 Pita 5:6, 7.

El Na Mintil Nui Ugl Mbu Pora Nimba Mna?

Soldiers

IK EI NAMBTANGA WALTETMEN: El mbu ent wamp laip mam ti tepa onum. Ten pui ugl mintigl ngi mbu ndi tenim.

BAIBEL NDI I NETEM: God ndi waket ya mui ila moglpa kundi ugl ei, elim ndi pintimb nitim. Elim nga wamp rup iti ugl ei, heven nga gavman ila, wamp “el ruing ugl mbu lainim iti niting,” ei kelik “el rormin mel mbu tek panakongun iting mel mim iting.” (Aisaia 2:4, Buk Baibel) God ndi wamp etpa rui ugl ken mintil nui ugl kigl pora ndumba. Baibel ndi i netem: ‘ “Wamp mbu nga mong mbila, ka nu mana [om] mbu, Got ndi, kil ngumba. Ei ken, wamp kugli ugl ei ken, mbun mindil orum tek, ka iti ugl mbu pora nimba. Ugl unt nga mbu [akep nga etpa rui ugl ken mintil nui ugl kigl kunta ku], pora nimba, wote ti natemba,” nitim.’—Repelesen 21:3, 4.

Ila ya kani ku Song 37:10, 11; 46:9, “Buk Baibel”; ken Maika 4:1-4, “Buk Baibel.”

Wamp Korum E, Epta Etem Mel Nant?

A cemetery

IK EI NAMBTANGA WALTETMEN: Lotu pugli ndi wamp lainim entek, wamp kormin ei nga rukur orunga ila mel ti kont morum netemen. Wamp mat bilip i etek etmin, wamp kui mbu ndi wamp kont mbu etek kit munding nek, wamp kit mbu God ndi ndip kaglangga mintigl nok mint mugling.

BAIBEL NDI I NETEM: Wamp kormin eken, kont mugli ugl ei pora netem. Saveman 9:5 (Buk Baibel) i netem: “Wamp korung mbu numan ti pili natetmen.” Wamp korung mbu ik pilik, kandek, nek iti naptemen, ei nga, wamp kont mbu etek kit kep, tek rapundek iti niting.—Song 146:3, 4, Buk Baibel.

Ila ya kani ku Stat 3:19, “Buk Baibel” ken Saveman 9:6, 10, “Buk Baibel.”

Wamp Korung Mbu Kanda Kinmin Nda?

A child grieving the death of a loved one

IK EI NAMBTANGA WALTETMEN: Ten nga wamp numan ngurmen mbu ken laip amamas etpen, moglpun mint bin numan ei petmen. Ei nga, ten nga wamp numan ngurmen korung mbu kinamin ka netemen.

BAIBEL NDI I NETEM: Wamp korong mbu rut nik ogla mugling. Jisas ndi promis itim, ‘on kona ila petmin wamp mbu ekit uing.’ (Jon 5:28, 29) God ndi wamp itim ei, ya mui kona Paradais ila muglamin nimba itim. Ei nga wamp korong kigl ya mui kona Paradais ila altpa mugling. Wamp ik teng ndung mbu, kui peng kandek ti natek, kumbkum moglk mint ping. Baibel ndi i netem: “Wamp ugl kun kai etemin mbu, God ndi ya mui ei nganka uglnga mugling.”—Song 37:29, Buk Baibel.

Ila ya kani ku Jop 14:14, 15, “Buk Baibel”; Luk 7:11-17; ken Aposel 24:15.

Na Beten Namba Eteptamba, God Ndi Kum Temba?

A man praying

IK EI NAMBTANGA WALTETMEN: Lotu mbila pika, wamp beten etemin. Wamp pugli ndi petmen ei, enenimnga beten etemin mbu nga bekim mat ti natetmen mel etim.

BAIBEL NDI I NETEM: Jisas ndi ten beten lainim entpa, pilik kongtuk: ‘Ik mong pugl pinipi mat, ou nduk ninani.’ (Matyu 6:7) Ei nga ten ik mong nimen mbu altpa altpa ni nenemin. God ndi tenenga beten imin mbu pilanga nda, tenenga beten mbu elim nga numan putem emel kanda etanga. I imin ndam, God nga numan putem ei kandep timin. 1 Jon 5:14 ndi i netem: ‘Elim ken mel ti, mawa imen ndam, [God] nga numan putem ei mel pep ropa nimen mel, ei ngumba.’

Ila ya kani ku Song 65:2, “Buk Baibel”; Jon 14:6, 14; ken 1 Jon 3:22.

Laip Ila Amamas Kandep Timb Mel Nant?

A woman searching for happiness by reading the Bible

IK EI NAMBTANGA WALTETMEN: Wamp ou dupa ndi ku moni, biknem, king orunga smat iti ugl mbu ndi, enenim etpa amamas etmba nek petmin. I nek ugl mbila pep rok kandermin eken, amamas ti ila tei natetem.

BAIBEL NDI I NETEM: Jisas ndi amamas timin e, i etpa nitem: ‘God nga ugl mbu nga kapgla iti natilinga, kel rundi rundi mormin wamp mbu, kai pileing [amamas iting].’ (Matyu 5:3) God pelip kun etpen, ugl kun kai mbu entmba ei nga kurmin ila, amamas kupa kandep timin. God pelpa kun iti ugl ei, Baibel ila kandek tin. Ik ei pilik kun in nda, nim ugl ou mna kel mbu piliken bi nduin. Ten nga laip ila nga disisen imen o, ugl imen mbu pora Baibel ei ndi oradum nda, ten nga laip ei ama kapugla etemba.—Luk 11:28.

Ila ya kani ku Sindaun 3:5, 6, 13-18, “Buk Baibel” ken 1 Timoti 6:9, 10.

Ik askim 6-pla kigl nga, ya kigl, Baibel nga bekim onunga kuragl. Nim ik ei nga mat ou dupa pelmba nekin pen mon? Nim wamp i iti ti nda ‘God nga ugl mbu nga kapgla iti natilinga, kel rundi rundi mormin’ nim kanda pilin. Nim askim i iti mat peten ko: ‘God ndi ten kupa pelpa kandpa etem nda, nambgl elinga ugl kit na mintil nui ugl mbu kandepa kui elinga pepa mint punum? Nanga femili moglk kai munding mel nant?’ Askim mat kep, ogla askim kigl nga bekim mendpugl kigl, Baibel ila kandep timin.

E kandek kelek, Baibel rit iti natetmen. Baibel ila ik pugli petem nek, kanda pelep tinitmin nek petmen. Nim bekim mbu kandep timb nek pin nda, wamp ti nim helpim tangga e? Jehova Witnes kigl ndi nim i etek helpim nguing.

Namba 1 helpim, buk Tru Tru Baibel i Tok Wanem? ei ndi wamp kanda helpim etmba, Baibel ila askim ou mbu nga bekim mbu kanda kandek ting. Namba 2 helpim, fri Baibel stadi. Jehova Witnes wamp ti elim Baibel stadi etem ti, nim ken wik mbila taim onunga kotla, Baibel stadi intingil. Wamp milion mam ti, Baibel stadi ila helpim tetemen. Stadi etung wamp pugli ndi i netmen: “Na ik kupa ei kandep tint!”

Ei ama ugl mendpugl e. Baibel ik kupa ei ndi wamp korong mbu tepa ou dui, ugl minngin pi ken mundmong iti ugl mbu ten etpa fri entetem. Amamas etpen ugl kai mbu timin ei nga numan enim. Jisas ndi i nitim: ‘Enim ik kupa ei, pilik ting. Wote ik kupa ei ndi, enim etpa [fri] tangga.’—Jon 8:32.

1. A man learning what the Bible teaches; 2. A woman learning what the Bible teaches