Nëjkx parë xyʼixët diʼib tmëminy

Nëjkx mä myiny tukëʼëyë titulo

 ËXPËJKËN 11

¿Wiˈix xypyudëjkëmë Biiblyë kyäjpxwijën?

¿Wiˈix xypyudëjkëmë Biiblyë kyäjpxwijën?

1. ¿Tiko nyajtëgoyˈäjtëm ets pën xytyuˈumoˈoyëm?

¿Wiˈixë Biiblyë kyäjpxwijën xypyudëjkëm parë nnaygyuentˈäjtëm? (SALMO 36:9)

Jyobaa diˈib nDeetyˈäjtëm ets diˈib të xyajkojëm niˈigyë wyijˈyëty, xytsyojkëm ets naytyukjotmaytyuunëp mët ëtsäjtëm. Yëˈë kyaj ojts xyajkojëm parë këˈëm nnaytyuˈumoˈoyëm (Jeremías 10:23). Ëtsäjtëm, ntsojkëm etsë Dios xytyuˈumoˈoyëm, duˈun extëmë ënäˈkuˈunk ttseky etsë tyääk tyeety tyuˈumoˈoyëdët (Isaías 48:17, 18). Biiblyë nanduˈun xytyuˈumoˈoyëmë kyäjpxwijën, pes yëˈë diˈibë Dios të xytyukumäˈäyëm. Käjpxë 2 Timotee 3:16.

Jyobaa yˈanaˈamën etsë kyäjpxwijën xytyukniˈˈijxëm parë oy njukyˈäjtëm, nan nyigajpxypy wiˈix nbatëmë kunuˈkxën diˈib miimp xëmëkyëjxm. Ets kom yëˈë të xyajkojëm, pääty oy ko ngupëjkëm xondaˈakyˈää xondaˈakyjyot ets yëˈë xytyuˈumoˈoyëm. Käjpxë Salmo 19:7, 11 etsë Diˈibʉ Jatanʉp (Apocalipsis) 4:11.

2. ¿Tidën yˈandijpy Biiblyë kyäjpxwijën?

Biiblyë kyäjpxwijën yëˈë ja tëyˈäjtën diˈib mbäät xypyudëjkëm parë nnijäˈäwëm wiˈix tijaty nduˈunëm. Etsë anaˈamën yëˈë ko ttimnigajpxy wiˈix meerë yajtunäˈäny (Deuteronomio 22:8). Parë njaygyujkëm wiˈix mbäät nbanëjkxëm tuˈuk tuˈugë käjpxwijën ko nbatëm tuˈugë jotmay, tsojkëbë jot winmäˈäny nyajtuˈunëm (Proverbios 2:10-12). Extëm nˈokpëjtakëm, Biiblyë jyënaˈany ko jukyˈäjtën yëˈë diˈibë Dios të xytyukumäˈäyëm. Tyäˈädë käjpxwijën mbäät xypyudëjkëm parë nnaygyuentˈäjtëm mä nduˈunëm, mä jëën tëjk ets mä nëˈëyoˈoy nduˈuyoˈoyëm. Käjpxë Apostʉlʉty 17:28.

 3. ¿Diˈibë majtskë käjpxwijën jëjpˈam?

Jesus majtsk pekyë käjpxwijën ojts tnigajpxy. Tim jawyiin yëˈko Dios ojts xyajkojëm parë nˈixyˈäjtëm, ntsojkëm ets nmëduˈunëm xëmë. Tsojkëbë tyäˈädë käjpxwijën nmëdäjtëm winmäˈänyoty ko ti ndunäˈänëm (Proverbios 3:6). Pënaty kyuytyuundëp, nëjkxëp nyaymyayëdë mëdë Dios ets tpäättët ja jukyˈäjtënë winë xëëbë ets ja jaantsypyë jotkujkˈäjtën. Käjpxë Matewʉ 22:36-38.

Myëmajtskpë käjpxwijën, yëˈë ets oy nnaymyënëjkxëm mëdë wiink jäˈäy (1 Korintʉ 13:4-7). Pën nguytyuˈunëm yëˈë nety nbanëjkxëmë Diosë yˈijxpajtën mä wiˈix jyaˈayˈaty mëdë naxwinyëdë jäˈäy. Käjpxë Matewʉ 7:12 etsë 22:39, 40.

4. ¿Wiˈixë Biiblyë kyäjpxwijën ndukˈoyˈäjtëm?

Biiblyë kyäjpxwijën xypyudëjkëm parë nmëdäjtëmë tsojkën ets nˈijtëm tuˈugyë mëdë familyë (Éfesʉ 4:32; Kolosʉ 3:12, 14). Ets nan mbäät tpudëkë kasäädë jäˈäy parë kyaj nyaymyastuˈudëdët. Käjpxë Génesis 2:24.

Ko nmëmëdoˈojëmë Biiblyë kyäjpxwijën, nan mbäät xypyudëjkëm parë oy nnayjäˈäwëm ets parë nbatëmë tuunk. Extëm nˈokpëjtakëm, näägë jäˈäy yëˈë yajmëdunandëp diˈib pyanëjkxtëbë Biiblyë kyäjpxwijën, diˈib tëyˈäjtën myëët tijaty tyuundëp ets diˈib ijttëp tuumbë jäˈäy (Proverbios 10:4, 26; Ebreeʉsʉty 13:18). Diosë yˈAyuk nan xytyukniˈˈijxëm parë nnayjäˈäwëm jotkujk ko nmëdäjtëm tijaty nyajtëgoyˈäjtëm ets jëjpˈam nbëjtakëm ko mëdë Dios nnaymyaˈayëm. Käjpxë Matewʉ 6:24, 25, 33 etsë 1 Timotee 6:8-10.

Biiblyë kyäjpxwijën nan xypyudëjkëm parë oy mëk nˈijtëm. Extëm ko tniˈanaˈamë parë jäˈäy kyaj nyayajmuktëgoyëdët, mbäät kyuwäˈänyëty parë kyaj yˈayoˈonbäädët ets parë kyaj ti päˈäm pyäädëdët (Proverbios 14:30; 22:24, 25; 23:20). Jyobaa kyaj dyajkuboky ko jäˈäy waanë yˈuuky (Salmo 104:15; 1 Korintʉ 6:10). Biiblyë kyäjpxwijën xypyudëjkëm parë nˈijxëm wiˈix njukyˈäjtëm ets wiˈixë jot winmäˈäny nmëdäjtëm (Salmo 119:97-100). Pënaty jyantsy pyanëjkxtëbë Kristë kyuytyuundëbë Biiblyë kyäjpxwijën, kyaj jeˈeyë parë ttukˈoyˈattët, nanduˈun parë dyajmëjpëtsëmdë Jyobaa. Käjpxë Matewʉ 5:14-16.