Nëjkx parë xyʼixët diʼib tmëminy

Nëjkx mä myiny tukëʼëyë titulo

 ËXPËJKËN 31

Josué ets ja jäˈäyëty diˈib Gabaón

Josué ets ja jäˈäyëty diˈib Gabaón

Ja wiinkpë nax käjpn diˈib Canaán, nan ojts tnijawëdë wiˈixë nety të jyatyë Jericó gäjpn. Pënatyë nety jam anaˈamdëp, ta ojts nyayajtuˈugyëdë parë tsyiptunäˈändë mët ja israelitëty. Per ja jäˈäyëty diˈib Gabaón, ta wyinmäˈänybyattë tninëjkxäˈändë Josué. Ta ttuktëjkëdë wyit diˈib të tyujknë ets tˈanmääytyë Josué: “Jantsy jagamëts ntsoondë. Tëts nmëdoyˈattë wiˈixë Jyobaa yajnimaytyaˈaky ets tijaty të mdukmëdunëdë ko nety myajpäättë Egipto ets Moab. Pën xytyukwandaktëbëts ko kyajts wiˈix xytyunäˈändë, tats xytyuumbëˈattët”.

Josué ta tmëbëjky ets ttukwandaky ko kyaj wiˈix ttunäˈändë. Per kyumdëgëk xëëw, ta Josué tnijäˈäwë ko kyaj jagam tsyoondë, jaayë tsyoondë Canaán. Päätyë Josué dyajtëëy: “¿Tikots të xywyinˈëëndë?”. Ja jäˈäyëty diˈib Gabaón, ta yˈatsoowdë: “Tsëˈkëdëbëtsë nety. Pes nnijäˈäwëdëbëts ko Jyobaa yëˈë mnitsiptuunëdëp. Tunë mayˈäjtën, këdiits xyaˈooktë”. Josué kyuytyuunë yˈayuk ets kyaj wiˈix ttuundë.

Ko waanë tiempë nyajxy, ta ja nimëgoxkpë rey diˈib Canaán mëdë syoldäädëtëjk tnibëdëˈktë ja jäˈäyëty diˈib Gabaón. Ta Josué mëdë  tsyiptuumbëty tsyoˈondë, tuk tsuˈum ojts tyuˈuyoˈoytyë parë nëjkx dyaˈˈawäˈätspëtsëmäˈändë ja jäˈäyëty diˈib Gabaón. Jakumbom, ta ja tsip tsyondaky. Ta ja jäˈäyëty diˈib Canaán kyaktääytyë, perë Jyobaa ta ojts dyajkäˈäyë tëtsn jantsy mëjatyëty extëmë tsää. Ta netë Josué tˈanmääyë Jyobaa parë duˈunyë ja xëëw dyajwëˈëmët. Ninäˈänëmë nety duˈunyë Xëëw kyawäˈkwëˈëmë. ¿Tiko Josué duˈun tˈanmääyë Jyobaa? Yëˈko myëbëjkypyë nety amumduˈukjot. Ta ja Xëëw duˈunyë ojts wyëˈëmë. Mä tyäˈädë xëëw kyaj ojts kyootsë axtë koonëm ja israelitëty tmëmadaktë ja reyëty diˈib Canaán mët ja tsyiptuumbëty.

“Ko mjënäˈänët oy, yëˈë yˈandijpy ko oy, ko mjënäˈänët kyaj, yëˈë yˈandijpy ko kyaj, yëˈë ko tyäˈädë jam tsyoonyë mä axëëkpë” (Mateo 5:37, TNM).