Nëjkx parë xyʼixët diʼib tmëminy

Nëjkx mä myiny tukëʼëyë titulo

 ËXPËJKËN 4

Jantsy jotˈambëjk axtë yaˈoˈk ja myëgaˈax

Jantsy jotˈambëjk axtë yaˈoˈk ja myëgaˈax

Ko netyë Adán mëdë Eva të yaˈëxkaxtë mä ja lugäärë tsujpë, ta tmëdäjttë nimayë yˈuˈunk yˈënäˈk. Ja tim jawyiimbë ja txëëwmooytyë Caín, yëˈë kamduump ujtstuump ijty. Ets ja myëmajtskpë yˈuˈunk, ja txëëwmooytyë Abel, yëˈë borreegë kuentˈäjtp ijty.

Tëgok, ta Caín mëdë Abel dyaˈoˈoyëdë tuˈugë wintsëˈkën parë Jyobaa. Jyobaa tyukjotkëdak ja wintsëˈkën diˈibë Abel mooyë, per kyaj ttukjotkëdaky diˈibë Caín yäjk. Päätyë Caín jyantsy jyotˈambëjky. Jyobaa ta yˈanmääyë: “Pën kyaj mjotxeemy, ta xytyunäˈäny diˈib axëëk”. Perë Caín kyaj jyaygyujkë.

Caín niˈigyë tˈanmääyë Abel: “Joˈomdë kamoty”. Ets ko nety jam nimajtsk yajpäättë, ta Caín tnibëdëˈkyë yˈutsy ets  dyaˈoˈky. ¿Ti Jyobaa tyuun? Tyukkumëdoowë Caín, ko ojts tkexy jantsy jagam mä kyaj pënë fyamilyë. Ninäˈä nety mbäät kyajëmbity.

¿Ti tyäˈädë xytyukniˈˈijxëm? Ko pën kyaj tijaty wyimbëtsëmy extëm njatsojkëm, waˈan njotˈambëjkëm. Per pën njäˈäwëm ko niˈigyë njotˈambëjkënë, o jam pën xyˈijxëm ko të njotˈambëjkëm, tsojkëp njotxaˈamëm. Pën kyaj netyë duˈun nduˈunëm, mbäät xymyëmadakëm ja akë, ets tyäˈädë kyaj yˈoyëty.

Abel mëk ttsojkyë Jyobaa ets oy jyaˈayˈajty, pääty xëmë Jyobaa jyamyatsäˈänyëty. Yajjukypyëkanëp ko netyë tyäˈädë naxwinyëdë të jyëmbity extëm tuˈugë lugäärë tsujpë.

“Nëjx jawyiin mnayyajtiˈigyëdë mëdë mmëguˈuk. Net mjëmbitët mä artal es xypyëjtäˈägët ja mwintsëˈkën” (Matewʉ 5:24).