Nëjkx parë xyʼixët diʼib tmëminy

Nëjkx mä myiny tukëʼëyë titulo

 ËXPËJKËN 75

Jesus yˈijxmatsyëty ja Mëjkuˈu

Jesus yˈijxmatsyëty ja Mëjkuˈu

Ko Jesus nyëbajtääy, ta ja Diosë myëjääw ojts yajnëjkxyëty mä ja lugäärë äänëˈëk tëtsëˈëkpë. Kyaj kyaaky 40 xyëëw, päätyë nety jyantsy yuˈoogyëty. Ta nyimiinë ja Mëjkuˈu parë yˈijxmatsäˈänyëty. Tim jawyiin duˈun yˈanmääyë: “Pën jantsy yëˈë Dios mˈuˈunkˈäjtëp, yajjëmbitë tyäˈädë tsää extëmë tsäjpkaaky”. Perë Jesus ta yˈatsoowëmbijty, extëm tuk pëky jyënaˈanyë Diosë jyaaybyajtën: “Jääybyety yˈity ko jäˈäy kyaj mbäät yëˈëyë tnijukyˈatyë käˈäy ukën. Nan tsojkëp tmëdoowˈitët wiˈixë Jyobaa jyënaˈany”.

Ta jatëgokë Mëjkuˈu tˈijxmäjtsyë Jesus ko tˈanmääy: “Pën jantsy yëˈë Dios mˈuˈunkˈäjtëp, okkupujnax mä tyäˈädë templë diˈib jantsy këjxm. Jääybyety yˈity ko Dios yëˈë kyaxaambyë yˈanklës parë kyaj wiˈix mjatët”. Perë Jesus yëˈë jatëgok ojts ttukäjpxpety ja Diosë jyaaybyajtën ko jyënany: “Jääybyety yˈity ko kyaj xyˈijxmatsëdë Jyobaa”.

Myëdëgëkˈok, ta ja Satanás ttukˈijxy tukëˈëyë ja anaˈamën ets ja mëjˈäjtën diˈib yä naxwiiny ets tˈanmääy: “Mmoˈoyaampy tukëˈëyë tyäˈädë anaˈamdakn etsë mëjˈäjtën pën xyˈawdäjtpëts jeˈeyë tëgok”. Perë Jesus ta tˈatsooy: “¡Winwäˈktutkëts Satanás! Jääybyety yˈity ko yëˈëyë mbäät yaˈˈawdatyë Jyobaa”.

Ta ja Mëjkuˈu ojts nyijkxy, ets ta myiindë ja anklës parë dyajkääy dyaˈuktë Jesus. Ets ok, ta Jesus ojts tkäjpxwaˈkxy ja oybyë ayuk diˈib nyimaytyakypyë Diosë yˈAnaˈam Kyutujkën. Yëˈë ja tuunk diˈibë Jyobaa tuknipëjkë ko myiiny yä naxwiiny. Ja jäˈäyëty jyantsy yˈoymyëdoowdë wiˈixë Jesus yaˈëxpëjky ets ojts pyanëjkxëdë oytyim määjëty.

“Ko [Satanás] yˈandaˈaky, kyëˈëm jaˈa yëˈë kyajxypy, jaˈa ko andakp yëˈë, es yëˈë yajtsondak ja andakën” (Fwank 8:44).