Nëjkx parë xyʼixët diʼib tmëminy

Nëjkx mä myiny tukëʼëyë titulo

 ËXPËJKËN 72

Yaˈkpëtsëmyë Jesus

Yaˈkpëtsëmyë Jesus

José mëdë María jam tsyënääytyë Nazaret mëdë Jesus etsë wiinkpë yˈuˈunk yˈënäˈk. José tsajts jëˈtp ijty parë tˈixyë familyë. Nan tyukniˈˈijxë fyamilyë pënën Jyobaa etsë yˈanaˈamën. Xëmë ijty nyëjkxtë mä ja sinagoogë parë tˈawdattë Dios ets nan nëjkxtëp ijty jëmëjt jëmëjt Jerusalén parë ttundë Paskë.

Ko netyë Jesusë jyëmëjt mäjmajtsk, ta ja fyamilyë ojts nyëjkxtë Jerusalén extëm xëmë ttundë. Mä tadë käjpn, mayjyaˈayë nety jam të jyäˈttë parë ttunäˈändë ja Paskë xëëw. Ko jyëjpkëjxy, ta José mëdë María ojts jyëmbijnëdë jatëgok, ets wyinmääytyë ko Jesus tam nyijkxy mët ja myëguˈuktëjk. Per ko tˈëxtääytyë, kyaj mä tpattë.

Ta jatëgok jyëmbijttë Jerusalén ets tëgëk xëëw tˈëxtääytyë ja yˈuˈunk. Taanëmë net tpattë mä ja templë. Tapë netyë Jesus yˈuˈunyë itkujky mä ja yaˈëxpëjkpëty, yajxon tmëdoowˈity ets tijaty tjantsy yajtëy. Ja yaˈëxpëjkpëty monyˈijx monyjäˈäwëdë wiˈixë Jesus tnimaytyaˈaky tijaty, pääty nanduˈun tijaty dyajtëëwdë Jesus, ets duˈunyë wyëˈëmëtyaaytyë  extëmë Jesus yˈatsoowëmbijtëdë. Ta tpëjktë kuentë ko Jesus wäˈäts tjaygyukë Jyobaa yˈanaˈamën.

José mëdë María të nety tjantsy nyimay tjantsy nyidäjtë ja yˈuˈunk. María ta jyënany: “Tsyulë, ta njantsy ëxtäˈäytyë oytyim määjëty. ¿Mä nety muum mjëdity?”. Jesus ta yˈatsooy: “¿Ti këdii nety xynyijawëdë ko yäts mbäät nyajpääty mätsë nDeetyë tyëjk?”.

Jesus ta jyëmbijty mëdë tyääk tyeety jam Nazaret. Jamë José ttukniˈˈijxë Jesus wiˈix tsyats jyëëdët. ¿Wiˈix xyˈokpawinmay yˈënäˈkˈäjtyë Jesus? Ko yaˈkˈadëtsy, ta mas niˈigyë jyëmbijty kuwijy. Päätyë Dios etsë jäˈäyëty niˈigyë tsyojkëdë.

“Kots ndunyë mtsojkën, Dios miyë, yëˈëjëts ndukxondakypy, etsë mley yˈity njodoty nwinmäˈänyotyëts” (Salmo 40:8).