Nëjkx parë xyʼixët diʼib tmëminy

Nëjkx mä myiny tukëʼëyë titulo

 ËXPËJKËN 57

Jyobaa yëˈë kyajxë Jeremías käjpxwäˈkxpë

Jyobaa yëˈë kyajxë Jeremías käjpxwäˈkxpë

Jyobaa yëˈë wyinˈijxë Jeremías parë nëjkx kyugajpxyˈaty mä ja nax käjpn diˈib Judá ets tˈanëëmët ja jäˈäyëty parë kyaj tnekytyundët ja axëkˈäjtën. Perë Jeremías ta yˈatsooy: “Jyobaa, ëjts mutsknëmëts. Kyajts njaty ngäjpxët jäˈäy wyinduuy”. Ta Jyobaa yˈanmääyë: “Këdii mtsëˈëgë, ëjts mijts nbudëkëyaampy, ets ndukˈawanëyaampy wiˈix mgäjpxwäˈkxët”.

Jyobaa, ta tˈanmääyë Jeremías ets dyajtuˈukmukët ja mëjjäˈäytyëjk ets wyinduuyëty tpuˈujët tuˈugë naxtuˈts, ets jyënäˈänët: “Nanduˈun jyatäˈänyë Jerusalén käjpn”. Ko Jeremías duˈun ttuuny, ta jyantsy jyotˈambëjktë ja mëjjäˈäytyëjk. Extëm niduˈuk ja saserdotë diˈib xyëwˈäjt Pasjur, ojts tkoxy ja Jeremías ets ta tpëjtaky mä tuˈugë kepytyuktsajtstuˈuty, mä yaˈˈamaˈtmujky ja tyeky ets ja kyëˈë. Jeremías jap tsyunäjxy ets kyaj nety mbäät yuˈkxy. Jakumbom ta Pasjur nyasmäjtsë. Ta net ja Jeremías jyënany: “Të jabäät, kyajts nekykyäjpxwäˈkxäˈäny”. ¿Per tëyˈäjtënë nety jyënaˈany? Kyaj. Jeremías ta yajxon wyinmääy ets jyënany: “Duˈunëtsë Jyobaa yˈayuk të njawë njodoty extëmë jënˈyaˈank. Kyajts mbäät nmastuˈutyë tyäˈädë tuunk”. Ta ja Jeremías duˈunyëm ojts ttukˈawanë jäˈäy ti ayoˈonë nety miin këdakp.

Ko nyajxy kanäk jëmëjt, ta tyëjkë jam Judá tuˈugë jembyë anaˈambë. Per ja saserdotëty ets ja kugajpxyëty diˈib kyaj Jyobaa yajtunëdë, kyaj ttimmëdowandë ti ja Jeremías kyäjpxwaˈkxypy. Pääty tˈanmääytyë ja anaˈambëtëjk: “Tyäˈädë yetyëjk nitëjkëp yˈoogët”. Jeremías ta yˈatsooy: “Pën xyyaˈoˈktëbëts, yëˈë nety mˈyaˈoˈktëp tuˈugë yetyëjk diˈib kyaj ti tyëgoˈoyën. Ëjts yëˈëts nigajpxypy titsë Jyobaa xytyukˈanaˈamp, kyajts yëˈëjëtyë ngëˈëm winmäˈäny”. Ko duˈun tmëdoowdë, ta ja anaˈambëtëjk jyënandë: “Tyäˈädë yetyëjk kyaj nyitëkëty yˈoogët”.

 Jeremías duˈunyëm ojts kyäjpxwaˈkxy, pääty jatëgok ja anaˈambëtëjk jyantsy jyotˈambëjktë, axtë yˈanmääytyë ja rey ets dyaˈoogët. Ja rey ta yˈanmääyëdë ko waˈan ttundë ja Jeremías wiˈix ttimtunäˈändë. Ta tmäjtstë ets tkujëduˈujëdë moˈonts jutoty parë jap yˈoogët. Ta wanaty wanaty ojts myoˈontsjëˈënë..

Per ta Ébed-Mélec diˈibë nety tuump mä ja reyë tyëjk, tˈanmääy ja rey: “Yëˈë anaˈambëtëjk të tkujëduuwnaxtë Jeremías moˈonts jutoty, pën kyaj jap nyajpëtsëˈëmëm, ta yˈoogët”. Ta ja rey yˈanmääyë ets twoownëjkxët 30 yetyëjk parë yajjuudët ja Jeremías. Tyäˈädë Jyobaa kyugajpxy nitii ojts kyayajtuˈuˈadukyëty parë kyäjpxwäˈkxët. ¿Këdii nanduˈun mjäˈäyˈatäˈäny extëm yëˈë?

“Nidëgekyë naxwinyëdë jäˈäyëty mdukˈakˈatäˈänyëty miits mët ëjtskyëjxm. Es diˈibë yˈakmëbejkypyëm dëˈënyëm, yëˈë nitsoˈogëp” (Matewʉ 10:22).