Nëjkx parë xyʼixët diʼib tmëminy

Nëjkx mä myiny tukëʼëyë titulo

Maytyaʼagyë 25: Ja fyamilyë Jakoob jyäʼttë Ejiptʉ

Maytyaʼagyë 25: Ja fyamilyë Jakoob jyäʼttë Ejiptʉ

JOSEE kyaj tnekymyëmadäʼägany ets kyaj tʼawanët ja myëgaʼaxëty pënën yëʼë, ta tkajxpëtsëëmdääjy ja tyuumbëty. Ko naytyuʼuk ojts wyeʼemy ta jyantsy tyëjkë jëëjy yaxpë. Mbäät nʼokpawinmäʼäyëm wiʼix ja myëgaʼaxëty dëʼënyë jyantsy myonyʼijx jyantsy myonyjäʼäjëdë, mët ko kyaj tnijawëdë tiko ja Josee jyëʼëjy yaʼaxy. Kyum jekynyëm taanëm ja Josee jyënany: Ëjtsën Josee. ¿Jamëts ja ndeety yʼakjukyʼaty?

Ja myëgaʼaxëty kyaj tnijäʼäjëdë wiʼix yʼatsowdët. Ak tsëʼkëdëp. Per ja Josee yʼanmääyëdë: Tunë mayʼäjtënë mëwingoondëgëts. Ets ko myëwingoonëdë ta tʼanmääjy: Ëjtsën Josee, diʼib miitsëty mdoʼktë Ejiptʉ.

Ta tʼanmääjy yuunk naxypy ja myëgaʼaxëty: Katë xypyoky jawëdë kots xytyoʼktë. Dios yëʼëtsë dëʼën diʼib të xykyexy yä Ejiptʉ etsë jäʼäyëty kyaj yʼooktët. Pesë Faraón tëts xykyutujkënë moʼoy, etsëts nʼanaʼamët tëgekyë Ejiptʉ nyax kyäjpn. Pääty jëmbittë mä ndeety, ets tukmëtmaytyäʼäktë tëgekyë tyäʼädë. Ets anëëmë waʼan tminy yä tsënaabyë.

Ta ja Josee dyoʼkmënaanäjxtääjy ja myëgaʼaxëty, ets ttsuʼkxtääjy. Ko ja Faraón tnijäʼäjë ko të Josee myëgaʼaxëty jyäʼttë, ta tʼanmääyë Josee: Waʼanë mëgaʼaxëty tmënëjxtë karretë diʼibë jëyujk pyajëdojtypy ets nëjx tmëtsoondë mdeety etsë fyamilyë. Ets ëjts nmoʼoyëbë naxë mas oybyë diʼib yä Ejiptʉ.

Ets dëʼënën ttuundë. Ok ix mä tyäʼädë dibujë, tyamë Josee nyaygyäjxpoʼxëdë mëdë tyeety ko jyajty Ejiptʉ mët niʼamukë fyamilyë.

Të nety nyimayëndë ja Jakoob fyamilyë ko ojts nyëjxtë tsënaabyë Ejiptʉ. Ja nety wyinëʼattë 70, mët ja yʼuʼunk yʼënäʼk ets ja yʼuʼunk yʼok, ets nandëʼën ja tyuumbë myosëty diʼibë nety myëdäjttëp. Niʼamukë tsyënääytyaknbëjktë Ejiptʉ. Ja yajxëëmooytyë israelitëty, yëʼko Dios të nety txëëmoʼoyë Jakoob, Israel. Ets yëʼë diʼibë netë Dios kyäjpnʼäjt aduʼuk, extëm ok nʼixäʼänëm.

Génesis 45:1-28; 46:1-27.

Josee fyamilyë


Yajtëʼëwën

  • ¿Ti tuun jäjtë ko ja Josee jyënany: Ëjtsën Josee diʼib miitsëty mëgaʼaxʼäjttëp?
  • ¿Wiʼixë Josee tʼanmääyë myëgaʼaxëty mëdë yuunkʼäjt naxypyʼäjtën?
  • ¿Ti tyuunë Faraón ko tnijäʼäjë të jyäʼttë Josee myëgaʼaxëty?
  • ¿Ninäägë nety nyiwinëʼattë Jakoob ja fyamilyë ko ojts nyëjxtë tsënaabyë Ejiptʉ?
  • ¿Wiʼix yajxëëmoojy ja fyamilyë Jakoob, ets tiko dëʼën yajxëëmoojy?

Yajtëʼëwën diʼib këʼëm mʼatsoojëmbitëp

  • Käjxë Génesis 45:1-28.

    Extëmë Biiblyë tnimaytyaʼagyë Josee, ¿wiʼix xytyukʼijxëm ko Jyobaa mbäät ok dyaʼoybyëtsemy ko jäʼäy tjatuknibëjtäägëdë tʼaxëktunäʼänyë Dios mëduumbëty? (Gén. 45:5-8; Isa. 8:10; Fili. 1:12-14.)

  • Käjxë Génesis 46:1-27.

    ¿Wiʼixë Jyobaa tjotmëkmooyë Jakoob ko nety nyejxy Ejiptʉ? (Gén. 46:1-4, mʼixëbë nota.)