Nëjkx parë xyʼixët diʼib tmëminy

Nëjkx mä myiny tukëʼëyë titulo

Maytyaʼagyë 16: Isa̱a̱ tpeky tu’ugë kiixyë oyjya’aybyë

Maytyaʼagyë 16: Isa̱a̱ tpeky tu’ugë kiixyë oyjya’aybyë

¿MNIJÄʼÄP ti txëʼäjtyë tyäʼädë kiixy? Ja txëʼäjty Rebekʉ. Ets diʼib yam nyimiimpy yëʼë Isa̱a̱ diʼibë nety nyaʼayʼataampy. Min nʼokʼijxëm wiʼixë Isa̱a̱ tpatyë tyäʼädë nyëdoʼoxy.

Abra̱a̱n yëʼë myäänk tyukpëkan tuʼugë kiixyë oyjyaʼaybyë. Kyaj ttsojky etsë Isa̱a̱ tpëkët ja toxytyëjk diʼib tsënaapy Kanán, yëʼko kyaj tʼawdattë Jyobaa. Päätyë Abra̱a̱n tmëjwoojy tuʼugë tyuumbë ets tʼanmääjy: Nëjx Arán mä tsyëënëtsë njiiky nmëguʼuk ets jam xywyowët tuʼugë kiixy diʼibëtsë nmäänk pyëkëp.

Ta ja Abra̱a̱në tyuumbë tyuʼudëjkë mët nimäjkë kameyë. Ko jyäjttë Arán, ta ojts tyuʼuboʼxtë mä tuʼugë nëgoondakn. Të nety tsyuʼujënë ets ja mä ja toxytyëjkëty myindë nëgoombë. Pääty ja Abra̱a̱në tyuumbë tmënuʼkxtakyë Jyobaa ets tʼanmääjy: Tadë toxytyëjk diʼibëts xyajnëʼukp ets diʼibëtsë ngameyë yajnëʼuktaapy yëʼë diʼibë nety mijts të xywyinʼixy ets tnëdoʼoxyʼatëdë Isa̱a̱.

Rebekʉ nyaybyäädëdë mëdë Isa̱a̱

Waanë yʼijty ta Rebekʉ myiiny nëgoombë. Ko ja Abra̱a̱në tyuumbë yʼamdoojë nëë ta dyajnëʼuky ets ta nandëʼën tyëjkë nëëjuʼtpë ets dyajnëʼuktääyë kameyë. Mëk tyuuny yëʼko kameyë extëm kom tyim nëʼuknëdë.

Ko dyajnëʼuktääjy ja kameyë, ta ja Abra̱a̱në tyuumbë dyajtëëjy ja Rebekʉ ti txëʼatyë tyeety ets pën mbäät yajjäjtaʼagyëty. Ta yʼatsoojy ko yëʼë tyeetyʼajtypyë Betuel ets ko tamë lugäär mä jyäjtäʼägët. Ja Abra̱a̱në tyuumbë nyijäʼäbë nety ko Betuel yëʼë tyeetyʼajtypyë Nakoor, ets ko Nakoor tukaʼax mëdë Abra̱a̱n. Pääty nyaygyoxtënääytyakë ets tmooyë dioskujuyëmë Jyobaa ko nety të myëjäʼtyëty mä ja jyiiky myëguʼugë Abra̱a̱n.

Ko jyäjttë mä ja Rebekʉ tyëjk, ta ja Abra̱a̱në tyuumbë tʼanmääyë Betuel mëdë Laban ja myëgaʼaxë Rebekʉ, ko yëʼë nety jyawowaambyë Rebekʉ ets tpëkëdë Isa̱a̱. Betuel mëdë Laban ta jyënandë ko oy, oy twowëdë Rebekʉ. Per ta dyajtëëdë Rebekʉ pën nëjxäämp ets tpëkëdë Isa̱a̱, yëʼë yʼatsoojy ko oy, oy nyëjxët. Pääty ja kum bom tsyoʼondë kameyëkëjxy, ets ta ojts jyëmbijnëdë Kanán.

Ko jyäjttë Kanán të nety tsyuʼujënë. Ta Rebekʉ tʼijxy ko tam tuʼugë yetyëjk yoʼoyëdity, yëʼëdëmë netyë Isa̱a̱. Ets ko ja Isa̱a̱ tʼijxyë Rebekʉ ta jyantsy xyondaky, pes të netyë tyääk yʼoʼknë tyëgëk jëmëjtëp ets yʼaknimääjy yʼaknidajpyë nety. Per ko ojts pyëjknë mëdë Rebekʉ ta jatëgok ojts jyotkujkënë.

Génesis 24:1-67.



Yajtëʼëwën

  • ¿Ti txëʼatyë tadë kiixy diʼib jam mʼijxypy mä dibujë, ets pënë tadë mixy diʼib jam nyimiimpy?
  • ¿Ti tyuunë Abra̱a̱n ets ja Isa̱a̱ tpatyë nyëdoʼoxy? ¿Ets tiko dëʼën ttuuny?
  • Ko ja Abra̱a̱në tyuumbë nyuʼkxtaktääjy, ¿ti tuun jäjtë diʼib yaʼijxë ko Jyobaa myëdoo ja nyuʼkxtakën?
  • ¿Wiʼixë Rebekʉ yʼatsoojy ko yaʼanmääjy pën pyëkaambyë Isa̱a̱?
  • ¿Ti diʼib jatëgokë Isa̱a̱ jotkujkmooyë?

Yajtëʼëwën diʼib këʼëm mʼatsoojëmbitëp

  • Käjxë Génesis 24:1-67.

    ¿Wiʼixë Rebekʉ dyaʼijxë yʼoyjyaʼayʼäjtënë ko nyaybyatë mëdë Abra̱a̱në tyuumbë mä ja nëgoondakn? (Gén. 24:17-20; Pro. 31:17, 31.)

    ¿Wiʼix tyam mbäädë Dios mëduumbëty yʼokpudëkëdë yʼijxpajtënë Abra̱a̱n, ko kyaj ja myäänk ttukpejkyë toxytyëjk diʼib kyaj tʼawdatyë Jyobaa? (Gén. 24:37, 38; 1 Kor. 7:39; 2 Kor. 6:14.)

    ¿Tiko yʼoyëty njuʼtëmë tiempë ets nwinmäʼäyëm këkpäät tëgekyë diʼib oy, dëʼën extëm ttuunyë Isa̱a̱? (Gén. 24:63; Sal. 77:12; Fili. 4:8.)