Nëjkx parë xyʼixët diʼib tmëminy

Nëjkx mä myiny tukëʼëyë titulo

Maytyaʼagyë 79: Daniel yajkujëduwë kää jutoty

Maytyaʼagyë 79: Daniel yajkujëduwë kää jutoty

¡OK IX mä yamë Daniel yajpääty! ¡Ets ixë tadë kääjëty kyaj wiʼix jam tyunyëty! ¿Mnijäʼäp tiko? ¿Pënë Daniel ojts kyujëduwëty kää jutoty? Min nʼokʼijxëm.

Ja jäʼäy diʼibë nety reyʼäjtp Babiloñʉ ja txëʼäjty Dariyë. Dariyë oy mëët ojts nyaymyënejxyëtyë Daniel yëʼko oyjyaʼay ets wijy, ets pääty nandëʼën tpëjtaky ets yʼanaʼamët. Per ta näägë jäʼäy tʼaxëkʼijxtë Daniel, min nʼokʼijxëm ti tyuundë:

Dariyë

Ojts tninëjxtë ja Dariyë ets tʼanmääytyë: Niʼamukë ëëtsëty, yëʼëjëts ntsojktëp ets xyjyaʼayët tuʼugë anaʼamënë diʼib jënäʼänëp ko 30 xëë, nipën tkamënuʼkxtäʼägëdë wiink dios, ets ni wiink jäʼäy, mijts jeʼeyë diʼib myajmënuʼkxtäʼägëp. Pën ja pën diʼib kyaj tmëmëdoyë tyäʼädë anaʼamënë, ta yajkujëduwët kää jutoty. Dariyë yʼoymyëdoo wiʼix yaʼanmääjy, ta tjääjy ja anaʼamënë pes kyaj nety tnijawë tidën ko ja jäʼäy ttsoktë ets dëʼën yajjäʼäyët ja anaʼamënë. Ets ko tjääytyaajy ja anaʼamënë kyaj mbäät ojts tnekyyajtëgatsy.

Ko ja Daniel tnijäʼäjë ja jembyë anaʼamënë, ta ojts nyejxy mä tyëjk ets ta tmënuʼkxtakyë Jyobaa extëmë nety xëmë ttuny. Ja axëkjäʼäyëty nyijäʼädëbë nety ko Daniel dëʼënyëm tʼawdatäʼänyë Jyobaa. Ta xyondaktë, yëʼko wyinmääytyë ko oogëbë netë Daniel.

Ko ja rey tpejkyë kuentë ti nety jam tuun jäjtëp, ta jyotmaytyuktëjkë. Per kyaj mbäät ja anaʼamënë tnekyyajtëgäjtsy, pääty kuanë ko ojts tniʼanaʼamë ets ja Daniel yajkujëduwët kää jutoty. Per ta tʼanmääyë Daniel: Nʼawijxypyëts etsë tadë Dios diʼib mijts mëduumpy myajtsoʼogëdët.

Dariyë kyaj myaajy mä tadë ux. Ets ja kum bom ta pëyeʼegyë ojts nyejxy mä ja kää jut. Ta jyajty extëm yam xyʼixy. Ta tkukäjxnäjxyë Daniel: ¡Daniel mijts diʼib mëduumbyë Diosë tëyʼäjtënbë! ¿Të mguniʼxyëty ja Dios diʼib mëduumpy ets kyaj wiʼix ja kää mdunëdët?

Daniel mä ja kää jut

Ta ja Daniel yʼatsoojy: Dios yëʼë të tkexyë yʼanklës ets të tʼamäjtstäʼäyë tadë kää etsëts kyaj wiʼix xytyunët.

Ja rey ta jyantsy xyondaky ets ta ojts tniʼanaʼamë ets yajjuudëdë Daniel kää jutoty ets yajkujëduwëdët ja axëkjäʼäy diʼibë Daniel jayaʼooganëdë. Ets ni oynyëmë nety jap kyakäʼädë kää jutoty, ko ja kää ojts yʼamoot tyukmoodëdë.

Ta ja rey tjääjy tuʼugë anaʼamënë mä tʼanmääjy niʼamukë nax käjpn: Wintsëʼëgëdë niʼamukë diʼib Diosʼäjtypyë Daniel. Tadë Dios tyuumbyë mëjʼäjtënë mëjwiin kajaa. Yëʼë të tkuniʼxyë Daniel ets këdiibë kää tsyuʼutsëdët.

Daniel 6:1-28.



Yajtëʼëwën

  • ¿Pën Dariyëʼäjt, ets wiʼix tʼijxyë Daniel jyaʼayʼaty?
  • ¿Ti ja axëkjäʼäyëty tyuktuundë Dariyë?
  • ¿Ti tyuunë Daniel ko tnijäʼäjë ja jembyë anaʼamënë?
  • ¿Tiko Dariyë jyotmaytyuktëjkë ets kyaj myaajy, ets ti tyuun ja kum bom?
  • ¿Wiʼixë Daniel tʼatsooyë Dariyë?
  • ¿Wiʼix ja jäʼäy jyäjttë diʼib jyayaʼoogandë Daniel, ets wiʼixë ja Dariyë tʼanmääjy niʼamukë ja nax käjpn?

Yajtëʼëwën diʼib këʼëm mʼatsoojëmbitëp

  • Käjxë Daniel 6:1-28.

    Extëm ja jäʼäy ttukniwinmäʼäyëdë ttunandë Daniel, ¿wiʼix tyam nandëʼënë axëkjäʼäy tjayajëjptëgoyäʼändë tadë tuunk diʼib tyuundëbë Jyobaa tyestiigëty? (Dan. 6:7; Sal. 94:20; Isa. 10:1; Rom. 8:31.)

    Ko tyamë kuduunk justisë ti xytyukʼanaʼamëm, ¿wiʼix mbäädë Danielë yʼijxpajtënë nbajoʼomëm? (Dan. 6:5, 10; Rom. 13:1; Apos. 5:29.)

    ¿Wiʼix mbäädë Jyobaa nmëduʼunëm ets ninäʼä ngamastutëm extëm ttuunyë Daniel? (Dan. 6:16, 20; Fili. 3:16; Diʼibʉ Jat. 7:15.)