Nëjkx parë xyʼixët diʼib tmëminy

Nëjkx mä myiny tukëʼëyë titulo

Maytyaʼagyë 73: Josiiʉs diʼib oy ak reyʼäjt jam Israel

Maytyaʼagyë 73: Josiiʉs diʼib oy ak reyʼäjt jam Israel

JEʼEYË netyë Josiiʉs tmëdaty tuktujkë jyëmëjt ko tyëjkë rey jam Israel mä ja majtsk grupë jäʼäy mëdë tyëëmp yʼääts. Mutsknëmë nety ko tyëjkë rey, pääty ja mëjäʼäytyëjk pyudëjkëdë ets tʼanaʼamët ja käjpn.

Jëxtujk jëmëjtë netyë Josiiʉs kujk yʼaneʼemy, ko ogäʼän ttuuny diʼibë Jyobaa tsyojkypy. Yëʼë pyanëjxë yʼijxpajtënë diʼib oy reyʼäjttë extëmë Davit, Josafat, etsë Ezekiiʉs. Mutsknëmë nety ko dyaʼijxë jotmëkʼäjtënë.

Rey Josiiʉs mëdë jyaʼay tpuʼudäʼäytyë awinax

Nëʼënë nety kujk ja tiempë nyaxy nimay ja israelitë axëëk jyantsy adëʼëtstë. Tʼawdäjttë diosëty diʼib kyaj tyëyʼäjtënëty ets tniwindaktë awinax. Päätyë Josiiʉs mëdë jyaʼay dyajwatstë ja nax käjpn. Tsiptak ets dëʼën ttunët yëʼko may ja jäʼäy diʼib yʼawdäjttëp ja awinax. Ok ix yamë Josiiʉs mëdë jyaʼay tam tpuʼudäʼäytyë awinax.

Ok ta Josiiʉs ttuknipejky nidëgëëgë yetyëjk ets dyaʼaʼoyëdë Jyobaa tyëjk. Ojts dyajnaymyukëdë meeny sentääbë mä ja käjpn diʼib yajtukmëjuuytyë tyäʼädë jäʼäy. Tapë netyë jäʼäy tyundë mä ja Diosë tyëjk, ko ja Ilkiyës diʼib nyiwintsënʼäjtypyë saserdotëty tpaty jap ja liibrë diʼibë nety të tyëgooynyë, mä Moisés tkëxjääjy ja Jyobaa yʼanaʼamën.

Ta ko Josiiʉs yajtukʼijxy ja liibrë, ta jyënany ets yajkäjxët. Ko tmëdoojy ta tpejkyë kuentë ko ja käjpn kyaj nety tmëmëdowdë Jyobaa yʼanaʼamën. Ta jyantsy jotmaytyuktëjkë, ets extëm yam xyʼixy, ta tkëʼtsyë wyit ets jyënany: Të net xytyukjotʼambëjkëmë Jyobaa, yëʼko ndääkʼäjt ndeetyʼäjtëm kyaj të tmëmëdowdë tyäʼädë anaʼamënë diʼib ijtp kujayë mä tyäʼädë liibrë.

Safán mëdë rey Josiiʉs

Josiiʉs ta tʼanmääyë Ilkiyës ets nëjx dyajnidëwë ti Jyobaa tyunaampy. Ilkiyës ta ojts tninejxy ja kugajpxy Uldaa. Uldaa ta tʼanmääyë Ilkiyës ets tʼanëëmëdë Josiiʉs wiʼixë netyë Jyobaa të jyënaʼany: Jerusalén mët tëgekyë jyaʼay yajtukumëdowandëp mët ko të tʼawdattë wiingatypyë dios diʼib kyaj tyëyʼäjtënëty etsë naxwinyëdë të tyuktujknë mëdë axëkʼäjtënë. Per mijts Josiiʉs, mët ko xytyunyë oyʼäjtënë, tyäʼädë ayoʼon kyaj myinäʼäny mä mijts mjukyʼaty jaanëm ko nety mijts të mʼoʼknë.

2 Crónicas 34:1-28.



Yajtëʼëwën

  • ¿Näägë netyë jyëmëjtë Josiiʉs ko tyëjkë rey, ets ti tyuun ko nety kujk yʼaneʼemy jëxtujk jëmëjt?
  • ¿Ti tyuumbyë Josiiʉs mä tadë dibujë tim jawyiimbë?
  • ¿Ti pyat ja Ilkiyës ko nety ja Diosë tyëjk yʼaʼoyë?
  • ¿Tiko Josiiʉs tkëʼtsyë wyit?
  • ¿Wiʼixë Jyobaa tʼanmääyë Uldaa ets tʼanëëmëdë Josiiʉs?

Yajtëʼëwën diʼib këʼëm mʼatsoojëmbitëp

  • Käjxë 2 Crónicas 34:1-28.

    ¿Ti ijxpajtënë pyëjtakë Josiiʉs parë pënaty të yaak të pyattë mä jyamʼatyë amay jotmay? (2 Cró. 33:21-25; 34:1, 2; Sal. 27:10.)

    ¿Ti tyuunë Josiiʉs ets yaʼawdatët aduʼugë Jyobaa ko nety kujk yʼaneʼemy 8 jëmëjt, 12 jëmëjt ets 18 jëmëjt? (2 Cró. 34:3, 8.)

    Extëm ja rey Josiiʉs mëdë Ilkiyës ojts dyaʼaʼoyëdë tëjk mä Jyobaa yaʼawdaty, ¿wiʼix mbäät xytyuʼunxëmë yʼijxpajtën? (2 Cró. 34:9-13; Pro. 11:14; 1 Kor. 10:31.)