Nëjkx parë xyʼixët diʼib tmëminy

Nëjkx mä myiny tukëʼëyë titulo

Maytyaʼagyë 68: Majtskë ënäʼkuʼunk jyukypyëjktë

Maytyaʼagyë 68: Majtskë ënäʼkuʼunk jyukypyëjktë

KOXYËP mʼokʼooky, ¿wiʼixyëbë mdääk nyayjawëty koxyëp jatëgok mjukypyeky? ¡Jantsy jotkujkxyëp nyayjawëty! Per ¿mbäädë oʼkpë jyukypyeky? ¿Të dëʼën yʼoktuun yʼokjäjtëbë?

Ok ix mä dibujë tadë yetyëjk, tadë toxytyëjk etsë mixyuʼunk. Tadë yetyëjk yëʼë kugajpxy Eliiʉs. Etsë tadë toxytyëjk yëʼë tuʼugë kuʼooky jyaʼay diʼib tsënääjy Sareptʉ ets tadë mixyuʼunk yëʼë yʼuʼunk. Tuʼugë xëë ta pyäʼämbejtyë tadë mixyuʼunk. Ta myëjtaky ets yʼoʼky. Ta Eliiʉs tʼanmääyë tadë toxytyëjk: Moogyëtsë tadë mʼuʼunk.

Eliiʉs mët ja kuʼookytyoxytyëjk ets ja yʼuʼunk diʼib të jyukypyeky

Eliiʉs ta tmëbatëjkë ja mixyuʼunk mä ja kuartë anikëjxypyë ets ta tkëxkoʼky myabajngëjxy. Ta net tmënuʼkxtakyë Jyobaa: Ay Jyobaa yajjukypyëkë tyäʼädë mixyuʼunk. ¡Ta ja mixyuʼunk xyajpejky ets ta jyukypyejky! Ta ja Eliiʉs tmëjënajkyë mixyuʼunk ets tʼanmääjy ja toxytyëjk: ¡Ok ix të ja mʼuʼunk jyukypyeky! Ta ja toxytyëjk jyantsy nyayjäʼäjë jotkujk.

Ja tuʼugë Jyobaa kyugajpxy ja txëʼäjty Eliseeʉ. Diʼib pyudëjkë Eliiʉs. Ko ja tiempë nyajxy ta Jyobaa nandëʼën tmooyë Eliseeʉ mëjää ets ttunëdë mëjʼäjtënë. Tuʼugë xëë ta ojts nyejxy mä ja Sunem käjpn, jam tam tuʼugë toxytyëjk diʼib wingëm tyim oyjyaʼayʼäjnë. Ok ta tyäʼädë toxytyëjk tpaty tuʼugë myäänguʼunk.

Tëgok mëjnë nety ja myäänguʼunk ko ojts nyejxy kamoty mä ja tyeety jam tyuny. Ta ajotkumonë yaxkeky: ¡Pëjkpëtsë ngëbäjk! Ta ojts yajmënejxy mä tyëjk per ta yʼoʼky. ¡Jantsy jotmaymyëëdë tyääk nyayjäʼäjë! Pääty ja uʼunktääk ojts tʼëxtäʼäy ja Eliseeʉ.

Ta ko ja Eliseeʉ jyajty, ta tyëjkë mä nety jap ja oʼkpë. Ta tmënuʼkxtakyë Jyobaa, ets ta nyaygyëxkoʼkë mä ja oʼkpë. Ta netyë ja mixyuʼungë nyiniʼx jyokxtëjkë, ets ta yʼantsyijëʼäjty jëxtujk ok. ¡Jantsy jotkujkë tyääk nyayjäʼäjë ko tyëjkë tëgoty ets tʼijxy ja yʼuʼunk të jyukypyeky!

Nëʼën kujkë tiempë nyaxy nimay kujkë jäʼäy yʼoʼknëdë. Ets may täj wyëʼëmdë jyiiky myëguʼuk etsë myëtnaymyaayëbë. Ëtsäjtëm kyaj mbäät nyajjukypyëjkëmë oʼkpë. Perë Jyobaa mbäät dyajjukypyeky. Ok nijawëyäʼänëm wiʼix dyajjukypyëkäʼäny miyonkʼamë jäʼäy diʼib të yʼoʼknëdë.

1 Reyes 17:8-24; 2 Reyes 4:8-37.


Yajtëʼëwën

  • ¿Pënatyë tadë jäʼäy diʼib jam mä dibujë, ets ti tëgokë tadë mixyuʼunk jäjtë?
  • ¿Wiʼixë Eliiʉs tninuʼkxtakë tadë mixyuʼunk, ets ti net tuun jäjtë?
  • ¿Ti txëʼäjty ja pyudëjkëbë Eliiʉs?
  • ¿Tiko ja toxytyëjk diʼib tsënääjy Sunem tʼëxtääyë Eliseeʉ?
  • ¿Ti tyuunë Eliseeʉ, ets wiʼix ja mixyuʼunk jyajty diʼibë nety të yʼoʼknë?
  • ¿Ti mëjää myëdäjtypyë Jyobaa extëm dyaʼijxë mët yëʼëgyëjxmë Eliiʉs etsë Eliseeʉ?

Yajtëʼëwën diʼib këʼëm mʼatsoojëmbitëp

  • Käjxë 1 Reyes 17:8-24.

    ¿Wiʼixë Eliiʉs yaʼijxmäjtsy pën jyantsy myëmëdoobyë Jyobaa ets pën jyantsy myëdäjtypyë mëbëjkën? (1 Rey. 17:9; 19:1-4, 10.)

    ¿Tiko njënäʼänëm ko ja kuʼooky jyaʼay diʼib tsënääjy Sareptʉ myëdäjt mëjwiin kajaa mëbëjkën? (1 Rey. 17:12-16; Luk. 4:25, 26.)

    Extëm jyajty ja kuʼooky jyaʼay diʼib Sareptʉ, ¿wiʼix tyëyʼäjtëndëkë extëm jyënanyë Jesús mä Matewʉ 10:41, 42? (1 Rey. 17:10-12, 17, 23, 24.)

  • Käjxë 2 Reyes 4:8-37.

    Dëʼën extëm ja toxytyëjk diʼib Sunem yajxon ojts tʼaxäjë ja Eliseeʉ mä tyëjk, ¿wiʼix ëtsäjtëm nandëʼën mbäät njäʼäyʼäjtëm? (2 Rey. 4:8; Luk. 6:38; Rom. 12:13; 1 Fwank 3:17.)

    ¿Wiʼix ëtsäjtëm tyam mbäät nʼoyjyaʼaytyakëm mëdë Dios mëduumbëty? (Apos. 20:35; 28:1, 2; Gal. 6:9, 10; Ebre. 6:10.)