Nëjkx parë xyʼixët diʼib tmëminy

Nëjkx mä myiny tukëʼëyë titulo

Maytyaʼagyë 60: Abigaʼil mëdë Davit

Maytyaʼagyë 60: Abigaʼil mëdë Davit

¿MIXYʼAJTYPYË tyäʼädë kiixyë tsujpë diʼib yam nyimiimbyë Davit? Ja txëʼaty Abigaʼil. Tapë jyot wyinmäʼäny, ojts tëgok tpudëkë Davit ets kyaj tyuundëgoyët. Per min jawyiin nʼokʼijxëm wixatyë Davit jyajty, ets okë net nijäʼäjëm wiʼixë Abigaʼil pyudëjkë.

Ko ja Davit tkugekyë Saúl ta nyayuʼtsë tsäʼäängoty. Ta ja myëgaʼaxëty ets ja fyamilyë nyimiinëdë mä nety jam. Nandëʼën nyimiinëdë taxk mëgoʼpxë yetyëjk, ets yëʼë netë Davit wintsënʼäjt. Ta net ja Davit ojts tninejxy ja rey diʼib Moʼap ets tʼanmääjy: Tunë mayʼäjtënë, waʼanëtsë ndääk ndeety tweʼemy yä, axtë kots nʼixët wiʼixëts njaty. Ok ta Davit mëdë jyaʼay ojts nyayuʼutsëdë tunoty kopkoty.

Ko tiempë yʼaknäjxy ta Davit tʼixyʼajtyë Abigaʼil tuʼugë toxytyëjk diʼib jantsy tsuj, etsë nyaʼay ja txëʼäjty Nabal. Nabal mëkjäʼäy kanäk pekyë nyax tmëdaty. Tmëdäjty tëgëk milë byorreegë ets tuk milë tsyiip. Nabal mëk axëkjäʼäy. Perë nyëdoʼoxy nyijäʼäp wiʼix tijaty ttunët. Tëgok ojts tpudëkë fyamilyë ets kyaj wiʼix jyatët. Min nʼokʼijxëm wiʼix.

Davit mët ja jyaʼay oyjyaʼaytyaktë mëdë Nabal. Kyuentʼäjttë ja Nabalë byorreegë. Tuʼugë xëë Davit tkejxy ja jyaʼay mä Nabal ets tʼamdowdëdë jeʼxy peky. Ko jam jyäjttë tamë netyë Nabal tnikeebyë byorreegë mët ja jäʼäyëty diʼib pudëjkëdëp, xëduundëbë nety jam ets tamʼäjtpë käʼäy ukënë. Ta ja Davitë tyuumbëty tʼanmääyë Nabal: Ëëtsëty tëts nʼoyjyaʼaytyäʼäktë mët mijts. Nituʼugëtsë mborreegë të ngamaatstë, niʼigyëts të nguentʼattë. Pääty tunë mayʼäjtënë, mooytyëgëts tyam waanë mgäʼäy mʼukënë.

Nabal ta axëëk jyantsy yʼatsoojy: Dëʼëmbë jäʼäy extëm miitsëty kyajts nmoʼoyaʼanyë ngäʼäy nʼukënë. Ta mëk axëëk ojts tjantsy kyäjxpäätyë Davit. Ta ko ja Davitë jyaʼayëty tyukmëtmaytyakëdë ta jyantsy jotʼambejky ets jyënany: ¡Pëjtäʼäktë mʼespäädë! Ko tpëjtaktääytyë ta tsyoʼondë ets nëjx dyaʼoogäʼändë Nabal mëdë jyaʼayëty.

Per ta tuʼugë Nabalë jyaʼay tmëdoojy wiʼixë nety mëk axëëk të kyajxy, ta tʼawäʼänë Abigaʼil. Ta netyë Abigaʼil tʼijxy ja käʼäy ukënë, ta tkëxwëʼëny byurrëkëjxy ets tsyoʼony. Ta ko nyaybyatë mëdë Davit, ta ttukjënajkyë byurrë, ta tniwindaky ets tʼanmääjy: Tunë mayʼäjtënë, wintsën katë xymyëjpëjtaʼaky wiʼixëtsë nyaʼay të jyënaʼany. Tsuu lokë yëʼë, ets kyaj tnijawë ti tyuumpy. Tyäts nmëminy tijatyëty, tunë mayʼäjtënë axäjë ets maʼxtëgëts oy ti wiʼix të yʼokjaty.

Abigaʼil tmoʼoyë käʼäy ukënë Davit

Davit ta yʼatsoojy: Tapë mjot mwinmäʼäny, mijts yam xypyudëjkëp etsëts kyaj nëjxë mnyaʼay ndukkumëdoy ko yʼaxëkjäʼäyëty. Jëmbijnë mä mdëjk agujk jotkujk. Ok, ko ja Nabal ojts yʼoʼknë, ta Davit ojts nandëʼën tnëdoʼoxyʼäjnë Abigaʼil.

1 Samuel 22:1-4; 25:1-43.



Yajtëʼëwën

  • Extëm jam xyʼixy mä dibujë, ¿ti txëʼatyë tadë toxytyëjk diʼib nyimiimbyë Davit, ets wiʼix jyaʼayʼajty?
  • ¿Pën Nabalʼäjt?
  • ¿Tiko Davit tkejxy näägë tyuumbë ets nëjx tʼamdowdë käʼäy ukënë mä Nabal?
  • ¿Wiʼixë Nabal tʼatsoojy ja Davitë tyuumbëty, ets ti tyuunë Davit?
  • ¿Wiʼix Abigaʼil dyaʼijxë ko tapë jyot wyinmäʼäny?

Yajtëʼëwën diʼib këʼëm mʼatsoojëmbitëp

  • Käjxë 1 Samuel 22:1-4.

    Davit ojtsë fyamilyë pyudëkëdë, ¿wiʼixë yʼijxpajtënë mbäät xypyudëjkëm ets nandëʼën naybyudëjkëm ninëʼën nmëduʼunëmë Dios? (Pro. 17:17; 1 Tes. 5:14.)

  • Käjxë 1 Samuel 25:1-43.

    ¿Tiko Nabal yajnimaytyaʼaky mëk axëëk? (1 Sam. 25:2-5, 10, 14, 21, 25.)

    ¿Wiʼix mbäädë toxytyëjkëty diʼib të pyëjknëdë tpanëjxëdë yʼijxpajtënë Abigaʼil? (1 Sam. 25:32, 33; Pro. 31:26; Éfe. 5:24.)

    ¿Ti diʼibë Davit kyaj ojts ttuny mët ko ja Abigaʼil pyudëjkë? (1 Sam. 25:31, 33; Rom. 12:19; Éfe. 4:26.)

    Ko ja Davit tpëjktëjkë yʼää yʼayukë Abigaʼil, ¿wiʼix mbäät pyudëkëtyë yetyëjkëty ets tʼixtëdë toxytyëjkëty extëmë Jyobaa tʼixy? (Apos. 21:8, 9; Rom. 2:11; 1 Peed. 3:7.)