Nëjkx parë xyʼixët diʼib tmëminy

Nëjkx mä myiny tukëʼëyë titulo

Maytyaʼagyë 103: Jesús kyëxeʼeky tëgoty mä ja tëjk adiky

Maytyaʼagyë 103: Jesús kyëxeʼeky tëgoty mä ja tëjk adiky

KO JA Peedrʉ mëdë Fwank ojts tsyoʼonëdë mä netyë Jesusë nyiniʼx të yajpëjtaʼaky, ta Mariiʉ ojts wyeʼemy naytyuʼuk. Ta tyëjkë jëëjy yaxpë. ¡Ta kyuʼijxë mä ja jut ets tʼijxy nimajtskë anklës! Extëm yaptsoo të xyʼixy mä dibujë. Ta yajtëëjëdë: ¿Tiko mjëʼëjy myaʼaxy?

Mariiʉ ta yʼatsoojy: Mët ko të tmënëjxtëtsë nWintsënë nyiniʼx ets kyajts nijawë mä të tpëjtäʼäktë. Ta wyäʼkëmbijty ets tʼijxy tuʼugë yetyëjk. Ta yajtëëjë: ¿Pën mʼëxtaapy?

Mariiʉ ta wyinmääjy ko tadë yetyëjk yëʼë nëgamʼijxpë, ets ko waʼan yëʼë të tmënejxyë Jesusë nyiniʼx. Pääty tʼanmääjy: Pën mijts të xymyënejxy anmaagyëts mä të xypyëjtaʼaky. Perë tyäʼädë yetyëjk yëʼë Jesús, jeʼeyë ko Mariiʉ kyaj tʼëxkajpy. Per ko ojts tyukmëgajxyëtyë xyëë, ta tnijäʼäjë ko yëʼë Jesús. Ta pëyeʼegyë ojts jyantsy nyejxy ets tʼanmääjy ja ëxpëjkpëty: ¡Tëts nʼixy ja nWintsënʼäjtëm!

Ok tamë nety nimajtskë Jesusë yʼëxpëjkpëty nyëjxtë Emaús, ko tuʼugë yetyëjk ojts pyuyoʼoyëdë. Jantsy määjy täjtëbë nety ko ja Jesús të yʼooky. Per ja yetyëjk ta tyukmëtmaytyakëdë tijaty diʼib mä Biiblyë ets ta oy nyayjäʼäjëdë. Ta ko nety jam pyoʼxtë mä kyayäʼändë, ta tʼëxkäjptë tyäʼädë yetyëjk ko yëʼë Jesús. Perë Jesús ta dëʼënyë tyëgoojy, ta ja nimajtskpë ëxpëjkpë jyëmbijttë Jerusalén ets tʼawanëyäʼändë ja apostëlëty.

Ta netë Jesús nyaytyukʼijxë Peedrʉ. Ta ko ja Peedrʉ tʼawäʼänëdë wiingatypyë apostëlë, ta jotkujk nyayjäʼäjëdë. Ta ja nimajtskpë ëxpëjkpë diʼib jëmbijttë Jerusalén, jyäjttë jam ets tpattë ja apostëlëty. Ta tʼanmääytyë ko të tʼixtë tuʼääyë Jesús. Tapë nety dëʼën tmaytyäʼäktë ko, ¿mnijäʼäp ti tuun jäjtë?

Ok këxʼix mä dibujë. Yëʼë jamë Jesús të tyëkë tëgoty, oyë nety ja tëjkʼää täʼtspeky yʼadikyëty. ¡Extëm ojts tyim xondaknëdë ja yʼëxpëjkpëty! ¡Ets jantsy jotkujk nyayjäʼäjëdë mä tadë xëë! ¿Mbäät xyjamyetsy näk ok kujkë Jesús kyëxeʼeky? Mëgoxk ok, ¿këdii?

Jesus nyaytyukʼixyëty ja yʼëxpëjkpëty

Ja apostëlë Tomás kyaj nety jam ko Jesús kyëxeʼky. Pääty ja ëxpëjkpëty yʼanmääyëdë: ¡Tëts nʼixtë ja nWintsënʼäjtëm! Perë Tomás ta jyënany ko jaanëm tmëbëkët ko këʼëm tʼixët. Wenë kyumduktujk xëë, tamë nety jatëgokë ëxpëjkpëty mëdë Tomás mä tuʼugë kuartë kuniʼadiky. Ko ajotkumonë Jesús kyëxeʼky. Taanëmë Tomás tmëbejky.

Fwank 20:11-29; Lukʉs 24:13-43.



Yajtëʼëwën

  • ¿Wiʼixë Mariiʉ tʼanmääjy ja yetyëjk diʼib wyinmääjy ko yëʼë nëgamʼijxpë, per wiʼix tpejkyë kuentë ko yëʼë Jesús?
  • ¿Ti tuun jäjtë ko nimajtskë ëxpëjkpëtyë nety nyëjxtë Emaús?
  • ¿Ti tuun jäjtë ko ja nimajtskpë ëxpëjkpëty jyäjttë Jerusalén ets tʼanmääytyë ja apostëlëty ko të tʼixtë Jesús?
  • ¿Näk okë nety kujkë Jesús kyëxeʼeky mä yʼëxpëjkpëty?
  • ¿Wiʼix jyënanyë Tomás ko ja ëxpëjkpëty yʼanmääyëdë ko të tʼixtë ja Wintsën, ets ti tuun jäjtë kyumduktujk xëë?

Yajtëʼëwën diʼib këʼëm mʼatsoojëmbitëp

  • Käjxë Fwank 20:11-29.

    Extëm jyënanyë Jesús mä Fwank 20:23, ¿yëʼë dëʼën yajjaygyukëyanë ko naxwinyëdë jäʼäy myëdäjtypyë madakënë ets tmaʼxtëdë poky? Ok nimaytyäʼäk (Sal. 49:2, 7; Isa. 55:7; 1 Tim. 2:5, 6; 1 Fwank 2:1, 2).

  • Käjxë Lukʉs 24:13-43.

    ¿Wiʼix ëtsäjtëm mbäät nyaʼawatsëmë jot korasoon ets tʼaxäjët yajxonë tëyʼäjtënë diʼib miimp mä Biiblyë? (Luk. 24:32, 33; Esd. 7:10; Apos. 16:14; Ebre. 5:11-14.)