Nëjkx parë xyʼixët diʼib tmëminy

Nëjkx mä myiny tukëʼëyë titulo

Maytyaʼagyë 45: Ttuknaxtë ja Jordán mëj nëë

Maytyaʼagyë 45: Ttuknaxtë ja Jordán mëj nëë

¡OK IX! ¡Ja israelitëty tam ttuknaxtë ja Jordán mëj nëë! Per, ¿mä net ja nëë të nyëjxtäʼäy? Mä tadë tiempë nëgoo nety të yʼoktuunë. Ets ko ja israelitëty jam jyäjttë koombë nety ja nëë. ¡Per ix të ja nëë tyëtstäʼäy! ¡Ixë israelitëty windëʼëtstuujy jam nyaxtë dëʼën extëm ko ttuknäjxtë ja jikymyejnyë Tsaptspë! ¿Mä tëgekyë ja nëë të nyëjxtäʼäy? Min nʼokʼijxëm.

Ja israelitëty ttuknaxtë Jordán mëj nëë

Ko ttukjäjty ja tiempë ets ja israelitëty ttuknaxtët ja Jordán mëj nëë, ta Joswee tʼanmääjy ja käjpn extëmë netyë Jyobaa të yʼanëʼëmxëty, ko ja saserdotëty yëʼë kyëʼëytyëp ja kääxë kajxyʼatypyë ets jawyiin yoʼoytyët. Ets ko nyëguwäʼäktët ta ja nëë tyëʼëtsäʼäny.

Ja saserdotëty ta tkëëytsyoʼondë ja kääxë kajxyʼatypyë ets jawyiin yoʼoytyë. Ko jyäjttë mä ja Jordán mëjnëë, ta nyëëdëjkëdë. Ja nëë extëm tyim woʼonë ets tyim këkʼäjnë. ¡Per netyë ja nëë jyënäjkʼadijky ko ja saserdotëty nyëguwäʼktë! ¡Yëʼë tuʼugë mëjʼäjtënë diʼibë Jyobaa tyuun ko ja nëë dyajtuʼudujky! ¡Ta ja nëë tyëtsy!

Ta ja saserdotëty diʼib myënëjxtëp ja kääxë kajxyʼatypyë ojts wyëʼëmdë itkujky extëm yam xyʼixy mä dibujë, jam tyënääytyë axtë ko ja israelitëty nyäjxtääytyë windëʼëtstuujy.

Ko niʼamukë nyäjxtääytyë, ta Jyobaa tʼanmääyë Joswee ets twinʼixët nimäjmajtskë yetyëjkë mëkatypyë ets nëjx jam tkëyëʼëktë mäjmajtskë tsää mä nety jam tyanëdë saserdotëty, ets tpëjtäʼäktët mä nety ja tsuʼum dyajnaxäʼändë. Net ko ja tiempë nyaxët ets ja mutsk ënäʼk dyajtëwët tiko jamë tadë tsää yʼity, ta yaʼanëëmët ko yëʼë ets yajjamyatsët wiʼix ja nëë tyëtsy ko ja saserdotëty tmëdëjkëdë ja Diosë kyääxë nëjoty. Ja tsää yëʼë tukjamyatsëdëp wiʼixë Jyobaa ttuunyë mëjʼäjtënë. Joswee ta nandëʼën tpëjtaky mäjmajtskë tsää mä nety jam të tyanëdë ja saserdotëty.

Joswee

Taanëmë netë Joswee tʼanmääjy ja saserdotëty diʼib kyëëytyëp ja kääxë kajxyʼatypyë ets pyëtsëmdët. Ko pyëtsëëmdë, ta ja nëë jatëgok tyëjkë pëyëʼkpë.

Josué 3:1-17; 4:1-18.



Yajtëʼëwën

  • ¿Ti mëjʼäjtënë tyuunë Jyobaa ets ja israelitëty ttuknäjxtë ja Jordán mëj nëë?
  • ¿Ti myëbëktëp ja israelitëty ets ttuknaxtët ja Jordán mëj nëë?
  • ¿Tiko Jyobaa tʼanmääyë Joswee ets ja yetyëjkëty nëjx tkëyëʼëktë mäjmajtskë tsää mä nety jamë saserdotë tyanëdë?
  • ¿Ti tuun jäjtë ko ja saserdotëty pyëtsëëmdë mä nety jam tyanëdë?

Yajtëʼëwën diʼib këʼëm mʼatsoojëmbitëp

  • Käjxë Josué 3:1-17.

    Extëmë tyäʼädë maytyaʼaky të nʼëxpëjkëm, ¿ti mbäät nduʼunëm etsë Jyobaa xypyudëjkëm ets nʼaxäjëmë kyunuʼxën? (Jos. 3:13, 15; Pro. 3:5; Sant. 2:22, 26.)

    ¿Wiʼix ja israelitëty ttuknäjxtë ja Jordán mëj nëë ets jyäjttë mä ja nax diʼibë nety të yaʼawanëdë? Ets, ¿wiʼixë tyäʼädë dyajmëjpëtseemyë Diosë xyëë?(Jos. 3:15; 4:18; Sal. 66:5-7.)

  • Käjxë Josué 4:1-18.

    ¿Tiko mäjmajtskë tsää tkëyëʼktë mä ja Jordán mëj nëë ets ojts tmënëjxtë mä ja lugäär diʼib xyëʼäjtypy Gilgal? (Jos. 4:4-7.)