Nëjkx parë xyʼixët diʼib tmëminy

Nëjkx mä myiny tukëʼëyë titulo

Maytyaʼagyë 42: Tuʼugë burrë kyajxy

Maytyaʼagyë 42: Tuʼugë burrë kyajxy

¿TË XYʼOKMËDOYʼÄJTPË tuʼugë burrë kyajxy? Kyaj, ¿këdii? Pesë jëyujk animal kyaj kyäjxtë. Perë Biiblyë myaytyakypy tuʼugë burrë diʼib ojts kyajxy. Min nʼokʼijxëm wiʼix tyuun jyäjtë.

Tuʼugë anklës

Ja rey Balak diʼib anaʼamp Moʼap tsyëʼkë ja israelitëty, yëʼko tamë nety tyëkëyanëdë Kanán. Pääty tnigajxë tuʼugë wijy jyaʼay diʼib xyëʼäjt Balán, ets nëjx ttuknikäjxpetyë ayoʼon ja israelitëty. Tʼawäʼänë mayë meeny, pääty ja Balán ttukwaʼtspejty ja byurrë ets ojts tninejxy ja Balak.

Jyobaa kyaj ttsojky etsë kyäjpn nëjx yajtuknikäjxpetyë ayoʼon. Pääty tkejxy tuʼugë anklës mëdë yʼespäädë ets tʼawäʼktukëdë Balán. Balán kyaj netyë tʼijxpaty ja anklës per ja byurrë yʼijxpat. Pääty tmëjagamgekyë anklës, ok ta axtë nyaygyoʼkë. Balán ta jyantsy jotʼambejky, ets ta tkepywyojpy ja byurrë.

Ta netë Jyobaa ojts dyajkajxy ja burrë ets ja Balán tmëdowët. Tʼanmääjy ja Balán: ¿Wiʼixëts mijts të nduny kots nëgoo xytyim wojpnë?

Balán burrëkëjxy

Ta ja Balán yʼatsoojy: Tsuu lokëts mijts xyʼixy, ¡koxyëbëts nʼokmëdatyë nʼespäädë tyamyëxyëbëts mijts nyaʼooky!

Ta ja burrë yajtëëjë: ¿Tëts mijts dëʼën nʼoktuumbë?

Ta ja Balán yʼatsoojy: Kyaj.

Ta netë Jyobaa ttukʼijxy ja Balán ko tam ja anklës tyanë tuʼääjy mëdë yʼespäädë. Ta ja anklës yʼanmääyë: Të nminyëts etsëts mijts nyajtuʼudukäʼäny, ets kyaj nëjxë israelitë xytyuknikäjxpetyë ayoʼon. ¿Tiko të xywyopyë mburrë? Koxyëp të mgamëjagamgeʼegyëty tëxyëbëts mijts nyaʼooky, perë tadë mburrë kyajxyëbëts wiʼix të nduny.

Ta ja Balán jyënany: Tëts nbokytyuny. Kyajts të nʼixy pën ja nety mdanë tuʼääjy. Ta ja anklës yajnäjxë, ets ojts tninejxy ja Balak. Ets oy tjatuknikäjxpatany ja ayoʼonë israelitëty, Jyobaa kyaj tnaʼijxy, yëʼë tyuun ets ja Balán tkunuʼxët tëgëk ok ja israelitëty.

Números 21:21-35; 22:1-40; 23:1-30; 24:1-25.



Yajtëʼëwën

  • ¿Pën Balakʼäjt, ets tiko tnigajxë Balán?
  • ¿Tiko tuʼääjy nyaygyoʼkë ja byurrë Balán?
  • ¿Wiʼix ja Balán yʼanmääyë byurrë?
  • ¿Wiʼix ja anklës tʼanmääyë Balán?
  • ¿Ti Jyobaa tyuun ko Balán tjatuknikäjxpatanyë ayoʼon ja israelitëty?

Yajtëʼëwën diʼib këʼëm mʼatsoojëmbitëp

  • Käjxë Números 21:21-35.

    ¿Tiko myadaktë israelitëty ko tsyiptuuny mët ja Seʼon diʼib ryeyʼäjttë amorreos, ets ja Og ja rey diʼib Basan? (Núm. 21:21, 23, 33, 34.)

  • Käjxë Números 22:1-40.

    ¿Tiko ja Balán ojts nyejxy mä ja israelitëty ets tjatuknikäjxpatanyë ayoʼon, ets tijaty xytyukniʼijxëmë tyäʼädë maytyaʼaky? (Núm. 22:16, 17; Pro. 6:16, 18; 2 Peed. 2:15; Juud. 11.)

  • Käjxë Números 23:1-30.

    Oyë Balán dëʼën jyakajxy jyamaytyaky extëmë Dios mëduumbë, ¿wiʼix ja tyuʼunënë yajnigëxëʼkë ko kyaj nety Diosmëduny? (Núm. 23:3, 11-14; 1 Sam. 15:22.)

  • Käjxë Números 24:1-25.

    ¿Wiʼixë tyäʼädë maytyaʼaky dyajkëktëkë nmëbëjkënyëʼäjtëm mä Jyobaa ko yëʼë tyuumpy tëgekyë diʼib tyuknibëjtakëp? (Núm. 24:10; Isa. 54:17.)