Nëjkx parë xyʼixët diʼib tmëminy

Nëjkx mä myiny tukëʼëyë titulo

Maytyaʼagyë 90: Jesús myaytyaʼaky mët tuʼugë samaritanë

Maytyaʼagyë 90: Jesús myaytyaʼaky mët tuʼugë samaritanë

JESÚS jamë nety tyuʼubeʼxy Samaaryʉ mä tuʼugë nëgoondakn. Ja yʼëxpëjkpëty të nety nyëjxtë käjpnoty nëjx tjuyäʼändë käʼäy ukënë. Ta myiinyë tadë toxytyëjk nëgoombë diʼib jam mëdë Jesús myaytyaʼaky. Jesús ta tʼanmääyë tadë toxytyëjk: Moogyëts waanë nëë.

Jesús myaytyaʼaky mët tuʼugë samaritanë toxytyëjk

Ja toxytyëjk kyaj tnijäʼäjë tidën ko Jesús myëgajxyëty. ¿Mnijäʼäp tiko? Yëʼko Jesús judiyë, etsë tadë toxytyëjk samaritanë. Ets may ja judiyëty kyaj tʼixäʼändë samaritanë. ¡Ni jeʼeyë tkakäjxpoʼxtë! Perë Jesús tsyojkypy niʼamukë jäʼäy. Pääty tʼanmääjy: Koxyëp xyʼoknijawë ko nmëdäjtypyëtsë nëë diʼib yajkypyë jukyʼäjtënë, xyʼamdoopxyëptsë tadë nëë ets nmoopyxyëp.

Ta ja toxytyëjk jyënany: Wintsën, këkë nëdäjny ets kyaj xymyëdaty ti mëdë nëë xyjuudët. ¿Wiʼixtsën mijts xymyoʼoyëdë nëë diʼib yajkypyë jukyʼäjtënë?

Jesús ta yʼatsoojy: Pën mʼukypyë tyäʼädë nëë, ta jatëgokë tëëtsë mbäädäʼänyëty, perë tadë nëë diʼibëts ëjts nyajkypy mbäädë jäʼäy dyajjukyʼaty winë xëë winë tiempë.

Ta ja toxytyëjk jyënany: Wintsën, ¡moogyëtsë tadë nëë! Netëtsë tëtsë kyaj xynyekypyäädët ets ninäʼäts nganekymyinët yä nëgoombë.

Ja toxytyëjk dëʼën wyinmääjy ko Jesús yëʼë myaytyakypyë nëë diʼib yaʼukp. Perë Jesús yëʼë nety myaytyakypy ja tëyʼäjtënë diʼib mä Dios etsë yʼAnaʼamënë, diʼib dëʼën extëmë nëë diʼib yajkypyë jukyʼäjtënë. Jeʼeyë ko yëʼë jukyʼäjtënë diʼib winë xëë winë tiempë.

Jesús ta net tʼanmääjy ja toxytyëjk: Nëjx wowë mnyaʼay.

Ta yʼatsoojy: Kyajts pënë nyaʼay.

Ta Jesús yʼanmääyë: Oy të mʼatsoy, per ja të xymyëdaty mëgoxkë mnyaʼay, etsë tadë yetyëjk diʼib mëët tyam mtsëënë kyaj xynyaʼayëty.

Ta ja toxytyëjk dëʼënyë ojts wyëʼëmë, yëʼko tëyʼäjtën extëm yaʼanmääjy. Per ¿wiʼixë Jesús tnijäʼäjë? Yëʼë Dios tuknijäʼäjë, pes yëʼë nety diʼibë të yajwandaʼaky ko kyëdäʼägäʼäny yä Naxwiiny. Ta jyäjttë Jesusë yʼëxpëjkpëty ets ta dëʼënyë ojts wyëʼëmëdë ko tʼijxtë ja Jesús tam myaytyaʼaky mët ja samaritanë.

¿Ti diʼibë tyäʼädë xytyukniʼijxëm? Ko Jesús oyjyaʼay yʼijty mët oy tyim pënëty. Ëtsäjtëm nandëʼën mbäät njäʼäyʼäjtëm; kyaj mbäät nʼaxëkʼijxëmë jäʼäy mët ko wiink käjpn tsyoony. Jesús tsyojkypy ets niʼamukë jäʼäy tnijawëdë tëyʼäjtënë diʼib xytyukpäädäʼänëmë jukyʼäjtënë winë xëë winë tiempë. Ets ëtsäjtëm nandëʼën mbäät nbudëjkëmë jäʼäyëty ets tjatëdë tëyʼäjtënë.

Fwank 4:5-43; 17:3.



Yajtëʼëwën

  • ¿Tiko Jesús ojts tyuʼubeʼxy Samaaryʉ mä ja nëgoondakn, ets wiʼix tʼanmääjy ja toxytyëjk diʼib jam miin?
  • ¿Tiko ja toxytyëjk kyaj tnijäʼäjë tidën ko ja Jesús ojts myëgajxyëty? ¿Wiʼixë Jesús tʼanmääjy, ets tiko?
  • Ko ja Jesús tmaytyaky ja nëë, ¿diʼibë nëë wyinmääjy ja toxytyëjk, per tidënë Jesús myaytyäʼägan?
  • ¿Tiko ja toxytyëjk dëʼënyë ojts wyëʼëmë ko ja Jesús yʼanmääyë wiʼixë nety jyukyʼaty, ets tiko Jesús ojts tnijawë?
  • ¿Ti xytyukniʼijxëmë tyäʼädë maytyaʼaky?

Yajtëʼëwën diʼib këʼëm mʼatsoojëmbitëp

  • Käjxë Fwank 4:5-43.

    Pën nbajoʼomëmë Jesusë yʼijxpajtënë, ¿wiʼix mbäät nʼijxëmë jäʼäy diʼib wiink nax wiink käjpn tsoʼomp, o diʼib mëkjäʼäy o diʼib ayoop? (Fwank 4:9; 1 Kor. 9:22; 1 Tim. 2:3, 4; Titʉ 2:11.)

    ¿Wiʼix tuʼugë jäʼäy yʼoytyunyëty ko tpanejxyë Kristʉ? (Fwank 4:14; Isa. 58:11; 1 Peed 5:10.)

    Dëʼën extëm ja toxytyëjk diʼib Samaaryʉ tmëjäʼäjë ja tëyʼäjtënë ets ojts tjantsy myaytyakwaʼxy ti nety të tnijawë, ¿wiʼix ëtsäjtëm nandëʼën mbäät nyaʼijxëm ko nmëjjäʼäjëmë tëyʼäjtën? (Fwank 4:7, 28; Mat. 6:33; Luk. 10:40-42.)