Nëjkx parë xyʼixët diʼib tmëminy

Nëjkx mä myiny tukëʼëyë titulo

Maytyaʼagyë 89: Jesús dyajwäʼätsy ja Diosë tyëjk

Maytyaʼagyë 89: Jesús dyajwäʼätsy ja Diosë tyëjk

JESÚS jantsy ajkëp yam kyëxeʼeky, ¿këdii? ¿Mnijäʼäp tiko? Yëʼko tyäʼädë jäʼäyëty diʼib yam mä Diosë tyëjk Jerusalén, wingëmë meeny sentääbë tim atsojknëdë. Pyëjkëdëbë jäʼäyë myeeny syentääbë diʼib yam miindëp Dios awdäjtpë.

Jesús dyajjëmbity ja meesë mä ja meeny yʼity

¿Mʼijxypyë tyäʼädë tsäjkää, borreegë etsë pak? Yëʼë yamë tyäʼädë jäʼäy tyoʼktëp mä Diosë tyëjk. ¿Mnijäʼäp tiko? Yëʼko ja israelitë dyajtundë ja jëyujk animal etsë joon mä twintsëʼëgëdë Dios.

Ja Diosë yʼanaʼamënë nyigajxypy ijty näʼäjaty ja israelitëty mbäät twintsëʼëgëdë Dios. Extëm nʼokpëjtakëm ko tuʼugë israelitë pyokytyuny ta twintsëʼëgë Dios. Per ¿mä dëʼën tpëktët ja joon etsë jëyujk animal diʼibë tyukwintsëʼkëdëp?

Tamë nety näägë israelitë diʼib yajʼyaʼktëbë joon etsë jëyujk animal diʼib tyukwintsëʼkëdëbë Dios. Per tam diʼib kyaj ti tmëdattë, ets tam diʼib tsoʼondëp jantsy jagam ets kyaj mbäät tmëmindë jëyujk animal. Pääty yam min tjuytyë mä Diosë tyëjk. Perë tyäʼädë jäʼäyëty mëk tsooxaty tjantsy tyooktë, dëʼënxyëp extëm tmaatstë ja jäʼäyëty, ets nan kyajxyëp yä myindë toʼkpë mä Diosë tyëjk.

Yëʼë dëʼën diʼibë Jesús yajjotʼambëjkë. Pääty dyajjëmbijtääyë meesë mä nety ja meeny dyajnipattë ets ta yʼëxwëjtääjy ja meeny wyaʼkxy. Ta dyaʼoʼoyë tuʼugyë wojpn ets twojpëtsëëmdääjy ja jëyujk animal. Ta tʼanmääjy diʼibë nety tyoʼktëbë pak: ¡Yajpëtsëmdë tyäʼädë yä! Katëtsë ndeetyë tyëjk xyajwanëdë extëmë määytyëjk.

Ja Jesús tamë nety ja yʼëxpëjkpëty, ets ko tʼijxtë ti ja Jesús tyuumpy, ta dëʼënyë myonyʼijx myonyjäʼäjëdë. Ta tjamyajtstë wiʼixë nety Biiblyë të jyënaʼany, ko Diosë yʼUʼunk mëk tjantsy tsyokäʼänyë Diosë tyëjk ets ko dëʼën tjawëyaʼany jyodoty extëmë jëën.

Ta ja Jesús dyajnäjxy ja paskë xëë jam Jerusalén ets ttuuny mayë mëjʼäjtënë. Ok ta jam ojts tsyoʼonëdë, ets ta ojts nyëjxtë Galileeʉ. Per ta nyajxy mä yʼit lyugäärë Samaaryʉ. Min nʼokʼijxëm ti jam tuun jäjtë.

Fwank 2:13-25; 4:3, 4.



Yajtëʼëwën

  • ¿Tiko ja jäʼäy ttooktë jëyujk animal mä Diosë tyëjk?
  • ¿Tiko Jesús jyotʼambejky?
  • Extëm xyʼixy mä dibujë, ¿ti tyuunë Jesús, ets wiʼix tʼanmääjy ja diʼibë nety tyoʼktëbë pak?
  • ¿Ti jyamyajtstë Jesusë yʼëxpëjkpëty ko tʼijxtë ti ja Jesús tyuumpy?
  • ¿Mä diʼibë it lugäärë Jesús nyajxy ko ojts nyëjxnë Galileeʉ?

Yajtëʼëwën diʼib këʼëm mʼatsoojëmbitëp

  • Käjxë Fwank 2:13-25.

    Ko nijäʼäjëmë Jesús mëk jyotʼambejky ko nety ja jäʼäy tyook yaktë mä Diosë tyëjk, ¿wiʼixë tyäʼädë mbäät xyajwinmäʼäyëm ko nʼawäʼänëmë juy tooky mä tadë tëjk mä nʼëxpëjkëm? (Fwank 2:15, 16; 1 Kor. 10:24, 31-33.)