Nëjkx parë xyʼixët diʼib tmëminy

Nëjkx mä myiny tukëʼëyë titulo

Maytyaʼagyë 88: Fwank dyajnëbetyë Jesús

Maytyaʼagyë 88: Fwank dyajnëbetyë Jesús

OK IXË tadë pak diʼib yam kyukaageʼkypyë tyäʼädë yetyëjk. Tyäʼädë yetyëjk yëʼë Jesús. Ja tyamë jyëmëjt tmëdaty naa 30. Ets yëʼë yam mëdë Fwank. Tyäʼädë Fwank të yʼokʼyajmaytyakpë. ¿Mjamyejtsypy ko ja Mariiʉ ojts tkuʼixy ja myëguʼuk Elisabet netpë ja Elisabetë yʼuʼunk ojts yiʼxy mëdë xondakënë? Tadë uʼunk diʼibë nety kyajnëm myaxuʼunkʼaty yëʼë Fwank. Per ¿ti net yam tyuundëbë Fwank mëdë Jesús?

Jesús nyëbety

Fwank tam tim yajnëpaʼtstäʼäyë Jesús mä ja Jordán mëj nëë. Dëʼënën tuʼugë jäʼäy nyëbety, nyipeʼetsy mä nëë ets ta net yajjuuty. Fwank dëʼën dyajnëbetyë jäʼäy, pääty yajtijy Fwank Yajnëbajtpë. Per ¿tiko dyajnëbejtyë Jesús?

Wenë Fwank ojts dyajnëbetyë Jesús yëʼko yëʼë ojts yʼanëʼëmxëty ets yajnëbatëdët. Fwank yëʼë nety yajnëbejtypyë jäʼäy diʼib jyäʼäp ko të pyoky tyuny. Per ¿waʼandaa Jesús ti ttundëgoojy diʼib myëkjäʼäjë? Kyaj, Jesús kyaj ti ttundëgoojy, yëʼko yëʼë Diosë yʼUʼunk diʼib tsoʼon tsäjpotm. Pääty min nʼokʼijxëm tidën ko Jesús tʼanmääyë Fwank ets yajnëbatëdët.

Mä nety kyanëbetynyëmë Jesús yëʼë nety tyuunkʼäjtypyë tsajts jëʼtk. Tuʼugë tsajtspë yëʼë yaʼoʼoyëbë meesë, siyë etsë bankë. Josee ja nyaʼayë Mariiʉ tsajtspë nety, ets yëʼë nandëʼën tyukniʼijxë Jesús. Perë Dios kyaj tkejxyë yʼUʼunk yä Naxwiiny ets tyunët tsajtspë. Yëʼë tyuknigajx ets ttunët tuʼugë tuungë jëjpʼambë. Pääty ko jyajty ja tiempë ta tʼanmääyë Fwank ets yajnëbatëdët, ets dëʼën dyaʼixëdët ko yëʼë të myiny ets ttunanë Tyeetyë tsyojkënë. ¿Yʼagupëjkëdaa Dios ko Jesús nyëbejty?

Yʼagupëjk, pes ko ja Jesús pyëtseemy nëjoty net tuʼugë ayuk yajmëdoojy tsäjpotm diʼib jënäämp: Tyäʼädëtsë dëʼënë nʼUʼunk diʼibëts njantsy tyukjotkëdakypy. Ta ja tsäjp yaʼijxy extëm yʼawäʼätsy, ets ta ja Jesús nyigëdakë tuʼugë pak, per kyaj jyantsy yëʼëjëty tuʼugë pak. Yëʼë Diosë myëjää diʼib nigëdakë.

Ja Jesús mayë nety tijatyëty twinmayaʼany, pääty ojts nyejxy mä tuʼugë lugäärë anaytyuʼuktuuybyë ets jam ojts yʼity 40 xyëë. Jamë Satanás nyimiinë, ets tëgëk ok ojts tjatsoky etsë Jesús tmëdëgoyëdë Diosë yʼanaʼamën. Perë Jesús kyaj tmëdëgoojy.

Ta ko Jesús ojts jyëmbijnë, ta tʼixyʼajty näägë yetyëjk diʼib ojts tʼëxpëjkpëʼaty. Ja txëʼäjttë: Andrés, Peedrʉ (diʼib nandëʼën yajtij Simonk), Felipu etsë Natanael (diʼib nandëʼën yajtij Bartolomee). Ta mëdë Jesús ojts nyëjxnëdë mä ja Galileeʉ yʼit lyugäär. Ta jam ojts wyëʼëmëdë mä ja käjpn diʼib xyëʼäjtypy Kanaa, mä Natanael kyugäjpnëty. Jam tamë nety tuʼugë jäʼäy pyeky ets jamë Jesús ojts ttuny ja tim jawyiimbë mëjʼäjtënë. ¿Mnijäʼäp ti tyuun? Yëʼë ja nëë yajjëmbijt binë.

Matewʉ 3:13-17; 4:1-11; 13:55; Markʉs 6:3; Fwank 1:29-51; 2:1-12.



Yajtëʼëwën

  • ¿Pënë tadë nimajtskpë jäʼäy diʼib jam mä dibujë?
  • ¿Wiʼix tuʼugë jäʼäy nyëbety?
  • ¿Pënatyë netyë Fwank yajnëbejtypy?
  • ¿Tidën ko Jesús tʼanmääyë Fwank ets yajnëbatëdët?
  • ¿Wiʼixë Dios dyaʼijxë ko yʼagupëjk ko Jesús nyëbejty?
  • ¿Ti tuun jäjtë ko ja Jesús ojts nyejxy 40 xyëë mä ja lugäärë anaytyuʼuktuuybyë?
  • ¿Pënaty jawyiinë Jesús yʼëxpëjkpëʼäjt, ets ti mëjʼäjtënë diʼib tim jawyiin tyuun?

Yajtëʼëwën diʼib këʼëm mʼatsoojëmbitëp

  • Käjxë Matewʉ 3:13-17.

    Ko tuʼugë jäʼäy nyëbety, ¿wiʼix mbäädë Jesusë yʼijxpajtënë tpanëjxë? (Sal. 40:7, 8; Mat. 28:19, 20; Luk. 3:21, 22.)

  • Käjxë Matewʉ 4:1-11.

    Ko nijäʼäjëmë Jesús yajxon dyajtuunyë Diosë yʼayuk, ¿wiʼix xypyudëjkëm ets xëmë nʼëxpëjkëmë Biiblyë? (Mat. 4:5-7; 2 Peed. 3:17, 18; 1 Fwank 4:1.)

  • Käjxë Fwank 1:29-51.

    ¿Pën tyukniwoo ja Fwank Yajnëbajtpë yʼëxpëjkpëty, ets wiʼix ëtsäjtëm nandëʼën mbäät nduʼunëm? (Fwank 1:29, 35, 36; 3:30; Mat. 23:10.)

  • Käjxë Fwank 2:1-12.

    ¿Wiʼix dyaʼijxë ja tim jawyiimbë mëjʼäjtënë diʼibë Jesús tyuun ko Jyobaa myoobyë oyʼäjtënë pënaty mëduunëp? (Fwank 2:9, 10; Sal. 84:11; Sant. 1:17.)