Nëjkx parë xyʼixët diʼib tmëminy

Nëjkx mä myiny tukëʼëyë titulo

Maytyaʼagyë 85: Jesús myaxuʼunkʼaty Belén

Maytyaʼagyë 85: Jesús myaxuʼunkʼaty Belén

¿MNIJÄʼÄP pënë tyäʼädë maxuʼunk? Yëʼë Jesús. Tam tyim maxuʼunkʼäjtäʼäy mä jëyujk tsäjkää yʼity. Ets tamë Mariiʉ tkëxkoʼogäʼäny mä yajpëjtaʼagyë jëyujk tsäjkää jyeʼxy. Per ¿tiko yamë Josee mëdë Mariiʉ yajpäättë mä jëyujk animal tyanëdë? Tyäʼädë lugäär kyaj yʼoyëty ets jam myaxuʼunkʼatët tuʼugë uʼunk, ¿këdii?

Kyaj, kyaj yʼoyëty. Per yëʼëjëty jam të jyäʼttë Belén yëʼko Sésʉr Augustʉ diʼib anaʼamp jam Romʉ, ojts tniʼanaʼamë ets jyäjtäʼäytyët niʼamukë jäʼäy mä nety të myaxuʼunkʼattë ets yajkujayëdët. Ets komë Josee jam myaxuʼunkʼäjty Belén ta jam ojts nyejxy mëdë Mariiʉ. Per ko jam jyäjttë, kyaj mä tpattë jyäjtakn. Ta jap ojts nyëjxtë mä yʼityë jëyujk animal. ¡Ets meerë mä tadë xëë ojts myaxuʼunkʼatyë Jesús! Per extëm yam xyʼixy oy mëk jamë tadë maxuʼunk.

Josee, Mariiʉ ets ja Jesús diʼib të myaxuʼunkʼaty

¿Mʼijxypy tadë borreegë kuentʼäjtpë diʼib jam të tnimindë Jesús? Jamë nety aamyoty koots byorreegë kuentʼattë ko tuʼugë jäjënë ojts tyëʼxwaʼxy. ¡Yëʼë nety tuʼugë anklës! Ja borreegë kuentʼäjtpë ta jyantsy nyayʼatsëʼkëdë. Per ja anklës ta yʼanmääyëdë: ¡Katë mtsëʼëgëdë! Yëʼëjëts nyajmiimbyë oybyë ää ayuk. Yëʼë nʼawanëyandëp ko jam Belén të myaxuʼunkʼaty ja nWintsënʼäjtëmë Kristu̶. ¡Diʼib yajnitsoʼogaambyë nax käjpn! Jap xypyäädäʼändë wit abity kyoʼknë mä jëyujk tsäjkää yajpëjtaʼagyë jyeʼxy. Ta net ajotkumonë myiindë may anklës ets tʼawdäjttë Dios. Ta ko ojts nyëjxtääynyëdë, ta ja borreegë kuentʼäjtpë tsyoʼondë jotëgoy. Ets extëm yam xyʼixy tam të tpäättë Jesús.

¿Mnijäʼäp tiko ojts yajmëjjawë Jesús? ¿Mnijäʼäp pënë dëʼënë tyäʼädë maxuʼunk? Ok jamyats ko mä tadë maytyaʼagyë myëduʼukpë jap ojts yajnimaytyaʼaky tyäʼädë tim jawyiimbë Diosë yʼUʼunk. Yëʼë pyudëjkë Jyobaa mä ojts dyajkojʼyë tsäjp etsë Naxwinyëdë ets tëgekyë diʼib jaʼäjtp. Pes, ¡yëʼë dëʼënë tyäʼädë Jesús diʼib ojts myaxuʼunkʼaty!

Jyobaa yajtëgäjts ja yʼUʼungë jyukyʼäjtënë ets ta ojts tpëjtaʼaky mä Mariiʉ yʼuʼunk tëjk. Ta ja uʼunk ojts yeeky extëmë ënäʼkuʼunk yaaktë tyääk jodoty. Jeʼeyë ko tyäʼädë maxuʼunk yëʼë Diosë yʼUʼunk. Ets ko ja tiempë tpaty ta myaxuʼunkʼäjty jam Belén mä jëyujk tsäjkää yʼity. ¿Mbejkypyë netë kuentë tidën ko xyondaktë ja anklësëty ko tʼanmääytyë ja jäʼäy ko të myaxuʼunkʼatyë Jesús?

Lukʉs 2:1-20.



Yajtëʼëwën

  • ¿Pënë tadë maxuʼunk diʼib jam mä dibujë, ets mä jamë Mariiʉ tkëxkoʼogäʼäny?
  • ¿Tiko myaxuʼunkʼäjtyë Jesús mä yʼityë jëyujk animal?
  • ¿Pënë tadë yetyëjkëty diʼib jam kuʼijxëdëp, ets wiʼix tuʼugë anklës yʼanmääyëdë?
  • ¿Tiko ojts yajmëjawë Jesús?
  • ¿Tiko Jesús yajtijy Diosë yʼUʼunk?

Yajtëʼëwën diʼib këʼëm mʼatsoojëmbitëp

  • Käjxë Lukʉs 2:1-20.

    ¿Wiʼixë Sésʉr Augustʉ ojts dyaʼadëy extëmë nety të yajnaskäjxë mä myaxuʼunkʼatäʼänyë Jesús? (Luk. 2:1-4; Miq. 5:2.)

    ¿Ti mbäät tuʼugë jäʼäy ttuny ets yʼitët extëmë jäʼäyëty diʼibë Dios tsojkëp? (Luk. 2:14; Mat. 16:24; Fwank 17:3; Apos. 3:19; Ebre. 11:6.)

    Pën ja borreegë kuentʼäjtpëty ojts nyayjawëdë jantsy jotkujk ko myaxuʼunkʼäjty ja Yajnitsokpë, ¿tiko tyamë Dios mëduumbë mbäät nyayjawëdë mas jotkujk? (Luk. 2:10, 11; Éfe. 3:8, 9; Diʼibʉ Jat. 11:15; 14:6.)