Nëjkx parë xyʼixët diʼib tmëminy

Nëjkx mä myiny tukëʼëyë titulo

Maytyaʼagyë 100: Jesús yajkëyäjknë

Maytyaʼagyë 100: Jesús yajkëyäjknë

KO YʼAʼUXʼÄJTÄÄYTYË, ta ja Jesús mëdë yʼapostëlëty ojts nyëjxtë mä ja nëgam diʼib xyëʼäjtypy Jetsemanii, jam ijty xëmë nyejxy. Jesús ta tʼanmääyë yʼapostëlëty ets yʼittët wijy ets nyuʼkxtäʼäktët, ta ojts nyejxy tuk nasʼixë ta nyayjujpë naxkëjxy ets nyuʼkxtaky.

Ok ta Jesús jyëmbijty mä ja yʼapostëlëty. ¿Mnijäʼäp ti nety jam tyuundëp? ¡Jantsy määdëp! Tëgëk okë Jesús yʼanmääyëdë ets kyaj myanaxtët, per tëgok tëgok jyëmbity ak määdëp tpäättë. Jesús ta tʼanmääytyë mä ja myëdëgëkʼokpë jyëmbity, ¿wiʼix ko mäʼä mboʼxtë ets të ja oorë tpääty mäts nyajtukëdëkëyaʼanyë nmëtsipëty?

Ko dëʼën jyënäändääjy ta tmëdoodë may jyaʼay jyantsy myindë. Ta tʼijxmiindë yetyëjkëty mëdë yʼespäädë etsë kyepy ets mëdë tsyinwaty diʼib kudëʼxëdëp. Ko myëwingoonëdë ja may jyaʼay ta tuʼugë jäʼäy tnibëtseemyë Jesús. Ta ojts ttsuʼkxy, extëm yam xyʼixy. ¡Tyäʼädë yetyëjk yëʼë Juudʉs Iskaryotʉ! ¿Tiko ojts ttsuʼkxyë Jesús?

Juudʉs tkëyakyë Jesús

Yëʼë ets ja jäʼäyëty tnijawëdët pënë dëʼën Jesús diʼib yʼëxtääytyëp. Jesús ta dyajtëëyë Juudʉs: ¿Dëʼënëts xykyëyaky mët kots xytsyuʼkxy? Ta ja Jesusë myëtsipëty myëwingoonëdë ets myäjtsëdë. Perë Peedrʉ ta tnitsiptuunyë Jesús ets kyaj yajmënëjxët. Ta tjuʼtyë yʼespäädë ets ttuknibëdeʼky ja yetyëjk diʼibë nety jam wingon. Ets ta ttasktsujktuty. Perë Jesús ta ojts ttoonë ja jäʼäyë tyatsk ets dyaʼagëdaky.

Jesús ta tʼanmääyë Peedrʉ: Pëjkëʼëgë mʼespäädë mä xyaʼity. ¿Ti kyaj xytyijy mbäät nʼamdoytsë ndeety milʼamë anklës ets xypyudëkëdëts? ¡Mbäätxyëp jaʼijty tjaʼamdoojy! Perë Jesús kyaj tʼamdooyë tyeety ets tkaxëdë anklës, yëʼko nyijäʼäbë nety ko të ja tiempë jyaʼty ets ja myëtsipëty myënëjxëdët. Pääty tnaʼijxy ets ja myëtsipëty myatsëdët. Min nʼokʼijxëm wiʼixë netë Jesús jyajty kyëbejty.

Matewʉ 26:36-56; Lukʉs 22:39-53; Fwank 18:1-12.



Yajtëʼëwën

  • ¿Mä Jesús ojts nyejxy mëdë yʼapostëlëty ko yʼaʼuxʼäjtääytyë, ets wiʼix tʼanmääjy ja yʼapostëlëty ti tyundëp?
  • Ko Jesús jyëmbijty mä ja yʼapostëlëty, ¿wiʼix tpattë, ets näk ok dëʼën tpaty?
  • Extëm kyëxeʼeky mä dibujë, ¿pënaty nimiinëdë Jesús, ets ti tyuunë Juudʉs Iskaryotʉ?
  • ¿Tiko Juudʉs ojts ttsuʼkxyë Jesús, ets ti tyuunë Peedrʉ?
  • ¿Wiʼixë Jesús tʼanmääyë Peedrʉ, ets tiko Jesús kyaj tʼamdooyë Dios ets tkaxëdë anklës?

Yajtëʼëwën diʼib këʼëm mʼatsoojëmbitëp

  • Käjxë Matewʉ 26:36-56.

    Dëʼën extëmë Jesusë yʼëxpëjkpëty ojts tkäjxwijy, ¿tiko yʼoyëty etsë mëjäʼäytyëjk nandëʼën tpanëjxtëdë Jesusë yʼijxpajtën? (Mat. 20:25-28; 26:40, 41; Gal. 5:17; Éfe. 4:29, 31, 32.)

    ¿Wiʼixë Jesús tʼixy tëgekyë pujxn diʼibë jäʼäy tyuknibëdeʼkypyë jyiiky myëguʼuk? (Mat. 26:52; Luk. 6:27, 28; Fwank 18:36.)

  • Käjxë Lukʉs 22:39-53.

    Ko ja anklës tjotmëkmooyë Jesús jam Jetsemanii, ¿yëʼë nety yʼandijpy ko Jesús kyaj tnekymyëdaty mëkë mëbëjkën? Ok nimaytyäʼäk (Luk. 22:41-43; Isa. 49:8; Mat. 4:10, 11; Ebre. 5:7).

  • Käjxë Fwank 18:1-12.

    ¿Wiʼixë Jesús ojts tkuwäʼänyë yʼëxpëjkpëty mä ja myëtsipëty, ets wiʼix mbäädë yʼijxpajtënë mbajoʼomëm? (Fwank 10:11, 12; 18:1, 6-9; Ebre. 13:6; Sant. 2:25.)