Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 20

¿Ja ga pe̷pji kʼe Cuerpo Gobernante?

¿Ja ga pe̷pji kʼe Cuerpo Gobernante?

Kʼo apostole ñe kʼo mi otrʼu̷ axojñi kja kʼe siglo dʼaja

Na xo̷ru̷ji ne carta kʼu̷ go mbenpeji kʼo apostole ñe kʼo mi otrʼu̷ axojñi

Kja kʼe siglo dʼaja, a Jerusalén mi bʼu̷bʼu̷ kʼo apostole ñe kʼo mi otrʼu̷ axojñi, angezeji mi manji ja rgua pe̷pjiji kja kʼo kjuarma kʼu̷ bi juajnu̷ Mizhokjimi ro moji ajensʼe (Hechos 15:2TNM). Mi je̷ziji kʼu̷ o ze̷zhi Mizhokjimi ro mbo̷sʼu̷ji ñe mi xo̷ru̷ji na joo o jñaa e Mizhokjimi ngekʼua ro mba̱ra̱ji pje ro tsjaji (Hechos 15:25). Yo padya xi ga pe̷pji akjanu kʼe Cuerpo Gobernante.

E Jehová o ñe̷mekʼo ngekʼua ra mbo̷xku̷jme ra kjajme kʼo na joo kʼua ja ga mama ne Biblia. Ya me mezhe kʼu̷ angezeji kjaji kʼo mama Mizhokjimi ngekʼua ya pjechiji ja rga pe̷pjiji. Pama pama xo̷ru̷ji ne Biblia ngekʼua ra mba̱ra̱ji ja ga kjaa kʼo mamanu. Chju̷ma chju̷ma jmuru̷ji ngekʼua ra nuji ja rga mbo̷sʼu̷ji texe yo kjuarma kʼu̷ ka̱ra̱ji kja ne Xoñijomu̷. Kʼua ja nzi mi kjaji kʼo kjuarma kja kʼe siglo dʼaja, yo kjuarma yo ngeji kʼe Cuerpo Gobernante pejñeji carta kja yo congregación, ma iyo, xipji yo superintendente kʼu̷ kjiñizgojme kja congregación ra xitsijme yo jñaa kʼu̷ neji ke ra pa̱rgojme, ma iyo, nge yo kjuarma kʼu̷ otrʼu̷ axojñi kja congregación kʼo ra xitsʼkojme. Akjanu nrrexe nrre ri kjajme kʼo mama ne Biblia ñe ri pa̱ra̱jme kʼo nee e Mizhokjimi (Hechos 16:4, 5). Kʼe Cuerpo Gobernante mama ja rga dya̷trʼa̷ji yo skuama yo ri xo̷ru̷jme. Jitsʼkojme ja rga pjo̷sʼu̷jme yo ntee ngekʼua ra pjechiji kʼo mama ne Biblia ñe xitsijme dya ra je̷zijme ra kjajme kʼe bʼe̷pji. Angezeji nuji kjo nge kʼo ra otrʼu̷ axojñi kja nu organización Mizhokjimi.

E Mizhokjimi pjo̷sʼu̷ ko in espíritu santo kʼe Cuerpo Gobernante. Angezeji dya kjatsje̷ji o bʼe̷pji, xo̷ru̷ji ne Biblia akjanu pa̱ra̱ji ja ga nee e Jehová kʼu̷ ra tsjaji, nange ngeje e Jehová kʼu̷ manda texe. Xo kjaji kʼo mama e Jesús nangeje nge kʼu̷ manda kja yo congregación (1 Corintios 11:3; Efesios 5:23). Kʼo kjuarmakʼo, dya xojñi jmuji kja o kjuarmaji ñe dya kjapu̷ji me na nojoji. Angezeji ñe nrrexe yo ra maa ajensʼe “tju̷ntʼu̷ji axu̷trju̷ kʼe Tsʼime [e Jesucristo] texe kʼua ja nzhodʼu̷” (Apocalipsis 14:4NTD). Kʼe Cuerpo Gobernante me ma̷ja̷ ma ga mba̱ra̱ ke ri o̷tu̷ji Mizhokjimi ra mbo̷sʼu̷ angezeji.

  • ¿Kjo nge kʼo mi mama ja rgua pe̷pjiji kʼo kjuarma kja kʼe siglo dʼaja?

  • ¿Pje kjadya kʼe Cuerpo Gobernante ngekʼua ra tsjaji ja ga nee e Jehová?