Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 10

¿Pje kjaji yo pjamilia ma jmuru̷ji na paa nu ngoʼo?

¿Pje kjaji yo pjamilia ma jmuru̷ji na paa nu ngoʼo?

Corea del Sur

Brasil

Australia

Guinea

Ndeze mi jingua, e Jehová mi nee ke yo pjamilia ro jmuru̷ji kja o ngumu̷ji ngekʼua yo tata ro jichiji o pjamilia o jñaa Mizhokjimi, ga kjaba texeji ro sʼiyaji e Jehová (Deuteronomio 6:6, 7). Yo paa yo ri ka̱ra̱jidya, yo ri testigojme e Jehová xo ri kjagojme ga kjanu. Chju̷ma chju̷ma nzi dʼa pjamilia xo̷ru̷ pje mama ne Biblia kja o ngumu̷, yo tata pjo̷sʼu̷ji o trʼii, xo̷ru̷ji skuama kʼo pjo̷sʼu̷ yo tata ñe yo nana. Yo ntee yo bʼu̷ntsje̷ji juajnu̷ji na paa nu ngoʼo, xo̷ru̷ji ne Biblia.

Ga kjaba mba̱ra̱ji ja rga minji na joo ja ga nee Mizhokjimi. Ne Biblia mama ga kjaba: “Che̷zhgeji a jmii Mizhokjimi; angeze xo ra che̷zhi kja in jmigeji” (Santiago 4:8). Ma ra xo̷ru̷ji ne Biblia ra pa̱ra̱ji ja ga kjaa e Jehová ñe pje ra tsjaa axojñi. Ngekʼua ma ri jmurge kja in nzunge ko in pjamiliage so̷o̷ ri xo̷ru̷geji ne Biblia, so̷o̷ ri sido kʼo mama kʼe skuama kʼu̷ ni chju̱u̱ nu ja jitsʼko̷ji ja rga minji ñe ja rga pe̷piji Mizhokjimi. Nzi natsʼu̷ji so̷o̷ ri xo̷ru̷ji janzi versículo, kjanu ri tsjapu̷ trʼo̷nu̷ in pjamiliage ngekʼua ra mamaji ja ga kjaa kʼo mama ne Biblia.

Ma ri xo̷ru̷ ne Biblia ko in pjamilia ra ñetsʼe gi sʼiyage, xo angezeji ra sʼiyatsʼu̷. Na joo ke yo tata ñe yo nana ra jichiji o trʼiji pje mama o Jñaa e Mizhokjimi, ga kjaba yo trʼii xo ra jyodʼu̷ji o tata ñe o nana ra ñaji. Dya ra gue̷nchʼiji o tsʼitrʼiji, me ra ma̷ji rga jichiji, ga kjaba angezeji me xo ra ma̷ji ma ra xo̷ru̷ji ne Biblia. Yo tata so̷o̷ ra juajnu̷ji tema kja yo xiskuama La Atalaya ñe ¡Despertad! o kja Internet kja jw.org. Ma yo pjamilia sʼiji tsʼitrʼi, yo tata so̷o̷ ra jyodʼu̷ji pje ra xo̷ru̷ji ngekʼua yo tsʼitrʼi ra pjechiji ja rga ndu̷ru̷ji ma pje ra dyo̷nu̷ji kja kolejio. Na joo ma ra jñandaji kja Internet dʼa programa kja JW Broadcasting, so̷o̷ ra ngichʼiji kja (tv.jw.org) ñe nudyakʼua ri so̷o̷ ri ñaji pje bi meyaji. Xo so̷o̷ ra to̱nji yo cántico kʼo ra to̱nji kja reunión. Yo tata so̷o̷ ra jyodʼu̷ji pje ra siji ma ra nguaru̷ji ra xo̷ru̷ji yo skuama.

Chju̷ma chju̷ma, dya ri jye̷zi ri xo̷ru̷ge ne Biblia ko in pjamilia, ga kjanu jmanchʼa jmanchʼa angezeji ra jyodʼu̷ji ra xo̷ru̷ji ne Biblia. Ma nutsʼkʼeji a gui juajnu̷ji na paa nu ngoʼo kʼu̷ ri xo̷ru̷ji ne Biblia, ri dyo̷tu̷ji e Jehová, angeze ra mbo̷xkʼu̷geji ngekʼua chju̷ma chju̷ma ri tsjagejikʼo (Salmo 1:1-3).

  • ¿Pjekja ri juajnu̷ji na paa ke ra xo̷ru̷ji o Jñaa e Mizhokjimi ko texe in pjamilia?

  • Yo tata, ¿ja rga jichiji o trʼiji ma ra xo̷ru̷ji ne Biblia ngekʼua me ra ma̷ji?