Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 6

¿Pjekja na joo kʼu̷ ra jmurgojme ko in kjuarmagojme?

¿Pjekja na joo kʼu̷ ra jmurgojme ko in kjuarmagojme?

Madagascar

Noruega

Líbano

Italia

Bʼu̷bʼu̷ nu in dyokjojme kʼu̷ nzhontrji na punkju̷ pa ra za̷trji nu ja jmuru̷ji. Zo na paʼa jyaru̷, zo ri ñe̱trjo dyebʼe, zo kjogu̷ji kja trʼeje pa ra za̷trji, zo pe̷pjiji texe yo paa ndeze ma xo̱rtjo asta ma nrrempa, poji nu ja jmuru̷ji. ¿Pjenga dya bʼe̷zhiji ga jmuru̷ji yo testigo e Jehová ko o kjuarmaji?

Ma ri jmurgojme pjo̷xku̷jme na punkju̷. Kʼe apóstol Pablo go mama: “Xo ni jyodʼu̷ ra potu̷ rga zopju̷ji yo mi kjuarmaji, ngekʼua ra sʼiyaji yo nin minteji [ñe] ra pjo̷skʼojiyo”, nu ja ri jmurgojme nge kʼo ri kjagojme (Hebreos 10:24). Ngekʼua ma ri jmurgojme ri kjagojme trʼo̷nu̷ in dyokjojme, ri o̷nu̷jme pje na kjaji ngekʼua ra pa̱rgojme ja ga bʼu̷nji, ma pje bʼe̷tsʼpʼi ri pjo̷sʼu̷jme. Ma ri ñagojme ko in kjuarmagojme, bʼu̷ma ra xitsʼkojme pje go tsjaji ngekʼua ro se̷chiji na nrrumu̷, kʼo go tsjaji angezeji xo ra mbo̷xkojme ra se̷chijme yo nrrumu̷.

Ma ri jmurgojme ri chje̷jmenu yo in dyokjojme. Nrrexe yo ntee kʼo poji nu ja ri jmurjme ri pa̱rgojme kjo ngeji, pje ni chju̱ji, xo ri pa̱rgojme ja bʼu̷bʼu̷ o ngunji. Bʼu̷bʼu̷ paa ke ri pa zenguajme in kjuarmagojme ñe bʼu̷bʼu̷ paa ma ri jmuru̷jme ri ñonu̷jme o ri eñegojme na nrrajme. ¿Ja ga mbo̷xku̷jme ma ri kjagojmekʼo? Pjo̷xku̷jme ra sʼiyagojme in kjuarmagojme, akjaba dabadiji ra pjo̷sʼu̷jme ma ra kjogu̷ji nrrumu̷ (Proverbios 17:17). Na joo ke ra kjagojmekʼo, nange ne Biblia mama ga kjaba: “Ra potka pjo̷steji” (1 Corintios 12:25, 26).

Na joo ke ri ma nuu nu ja jmuru̷ji yo testigo e Jehová, yo in kjuarmagojme kjaji kʼo mama Mizhokjimi, angezeji na jonteji, pjo̷sʼu̷ji nu in dyoji, jyodʼu̷gekʼo. Mage nu ja jmuru̷ji.

  • ¿Pjekja na joo ke ri mage jango ri jmurgojme?

  • ¿Jingua ri mage jango ri jmurgojme?