Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 18

¿Jango ri pjo̷sʼu̷jme in kjuarmagojme ma ga supjreji?

¿Jango ri pjo̷sʼu̷jme in kjuarmagojme ma ga supjreji?

República Dominicana

Japón

Haití

Ma kjogu̷ kʼo na sʼoo nzakja ma ga mbii nu xoñijomu̷ ñe ma ga ñe̱je̱ trʼadyebʼe kʼu̷ tu̱mbu̷ o ngumu̷ yo ntee, yo ri testigojme e Jehová dabadiji ri pjo̷sʼu̷jme in kjuarmagojme, akjanu ñetsʼe kʼu̷ me ri sʼiyajme in dyokjojme (Juan 13:34, 35; 1 Juan 3:17, 18). ¿Ja ga kjagojmekʼo?

Ri jmutu̷jme merio ngekʼua ra unu̷jme yo kjuarma kʼo ni jyodʼu̷. Mi jingua, kʼo kjuarma kʼu̷ mi ka̱ra̱ a Judea o kjogu̷ji trjijmi, kʼo kjuarma kʼo mi menzumu̷ a Antioquía o mbo̷sʼu̷ji, o jmutu̷ji merio kʼu̷ go mbenpejikʼo (Hechos 11:27-30). Xo akjanu, ma ri pa̱rgojme kʼu̷ na kjogu̷ji nrrumu̷ in kjuarmajme kʼu̷ ka̱ra̱ji na je̱e̱ ñe dya kja ju̷̱ji merio, nu ja ri jmuru̷jme ri jmutu̷jme merio ke ri penpejme, akjanu ri pjo̷sʼu̷jme yo in kjuarmagojme (2 Corintios 8:13-15).

Ri pa pjo̷sʼu̷jme in kjuarma. Ma kjogu̷ kʼo na sʼoo nzakja ma ga mbii nu xoñijomu̷ o ma ga ñe̱je̱ trʼadyebʼe, yo kjuarma kʼu̷ otrʼu̷ axojñi kja congregación jodʼu̷ji yo kjuarma ngekʼua ra mba̱ra̱ji ma bʼu̷nji na joo. Kʼo kjuarma kʼo pe̷pjiji kja comité de socorro juajnu̷ji kjuarma kʼu̷ ra ma zogu̷ji bʼitu, jñonu̷, ñechje ñe nrreje, xo jodʼu̷ji ja ra oxu̷ji in kjuarmajme. Na punkju̷ testigo e Jehová kʼu̷ pje nrre pjezhi, angezetsje̷ji kjontrʼu̷ji ko in merio pa ra za̷tʼa̷ji ja kjogu̷ kʼo na sʼoo, pjo̷sʼu̷ji ra joku̷ji o ngumu̷ yo ntee, xo joku̷ji yo ngumu̷ nu ja jmuru̷ji yo testigo e Jehová. Ya me mezhe ke ri kjagojme akjanu, nudya ma kjogu̷ji kʼo na sʼoo yo in kjuarmagojme, dabadiji ri pjo̷sʼu̷jme. “Kʼo xe nda [ri] pjo̷skʼo[jme] nge yo mi kjuarmago[jme]”, pe ma so̷o̷ ra kjajme xo ri pjo̷sʼu̷jme yo ñaja ntee zo pe̷sʼiji nʼaño religión (Gálatas 6:10).

Ri jichijme yo ntee kʼo mama ne Biblia ngekʼua ra zoji na joo. Ma kjogu̷ kʼo na sʼoo nzakja ma ga mbii nu xoñijomu̷ ñe ma ga ñe̱je̱ trʼadyebʼe, yo ntee kʼo ka̱ra̱jinu me supjreji. Nu kʼo ra tsjapu̷ ra zoji na joo o mu̷bʼu̷, nge ke ra xipjijme ke e Mizhokjimi Jehová ra mbo̷sʼu̷ ra se̷chiji yo nrrumu̷, angeze “kjaku̷ji ra ma̷ji” ñe kjaku̷ji ra ze̷zhiji (2 Corintios 1:3, 4). Ngekʼua, ri jichijme yo ntee kʼo junsʼu̷ kja ne Biblia, mamanu ke ma ra manda o Reino Mizhokjimi dya kja ra kjogu̷ yo na sʼoo ñe dya kja ra supjreji yo ntee kja ne Xoñijomu̷ (Apocalipsis 21:4).

  • ¿Pjenga so̷o̷ ra pjo̷sʼu̷jme dabadiji in kjuarmagojme ma ga kjogu̷ji kʼo na sʼoo, nzakja ma ga mbii nu xoñijomu̷ ñe ma ga ñe̱je̱ trʼadyebʼe?

  • ¿Pje ri jichijme yo ntee kʼu̷ me supjreji ngekʼua ra zoji na joo?