Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 25

¿Ja ga ja̷nkʼojme yo ngumu̷ ja ri jmurgojme?

¿Ja ga ja̷nkʼojme yo ngumu̷ ja ri jmurgojme?

Bolivia

Nigeria, ja ma kjaa mi jingua ñe ja ga kjadya

Tahití

Yo ri testigojme e Jehová ri pe̷sʼijme ngumu̷ ja ri jmurgojme, nunu ri xo̷rgojme ne Biblia ngekʼua ra pa̱ra̱jme pje ra tsjaa o Reino Mizhokjimi kja ne Xoñijomu̷, e Jesús o jichi yo ntee ja ga kjaa kʼe Reino (Lucas 8:1TNM).

Kja yo ngumu̷ ja ri jmurgojme jitsʼkojme kʼo mama Mizhokjimi Jehová. Xo jitsʼkojmenu ja rga zopju̷jme yo ntee o Jñaa e Mizhokjimi (Mateo 24:14). Kʼo ngumu̷kʼo dya nrra na nojo, pe jya̷nji na joo. Bʼu̷bʼu̷ ngumu̷ ja jmuru̷ji na punkju̷ congregación. Yo kje̷e̷ yo ri ka̱ra̱jidya, texe nu Xoñijomu̷ a jya̷nji na punkju̷ ngumu̷ ja ri jmuru̷jme (pama pama ja̷bʼa̷ji tsichʼa ngumu̷), nangeje na punkju̷ ntee poji ja ri jmurgojme. ¿Ja mbedye nu merio kʼu̷ ri ja̷bʼa̷jme ngumu̷ nu ja ri jmurgojme? (Mateo 19:26NTD.)

Yo ri testigojme e Jehová ri unu̷jme merio ngekʼua ra jya̷bʼa̷ji ngumu̷ nu ja ri jmurgojme. Yo merio ke jñutrʼu̷ji kja yo tsʼicaja, penpeji kja yo sucursal yo testigo e Jehová. Angezeji pesʼpeji merio yo kjuarma kʼo nee ra jya̷nji na ngumu̷ o nee ra joku̷ji na ngumu̷ ja jmuru̷ji.

Na punkju̷ kjuarma pjo̷sʼu̷ji ra jya̷nji yo ngumu̷, dya cobraji merio. Kja na punkju̷ país bʼu̷bʼu̷ Grupos de Construcción de Salones del Reino. Angezeji poji kja yo congregación kʼo me na je̱e̱ kja o país, pjo̷sʼu̷ji o dyoji ra jya̷nji yo ngumu̷ ja ra jmuru̷ji, dya cobraji. Xo bʼu̷bʼu̷ país nu ja juajnu̷ji kjuarma kʼu̷ pa̱ra̱ji ra tsjaji o bʼe̷pji ngekʼua ra nuji ja nge nu ra jya̷nji kʼo ngumu̷ ñe pje ma ngumu̷ ra joku̷ji, unu̷ji janzi jñiñi nu ja ra tsjaji bʼe̷pji. Bʼu̷bʼu̷ kjuarma kʼu̷ bʼe̷xtrjo bʼu̷njinu, pa̱ra̱ji ra tsjaji na bʼe̷pji, angezeji pjo̷sʼu̷ji yo kjuarma ra jya̷bʼa̷ji nu ngumu̷ nu ja ra jmuru̷ji, pe nge yo kjuarma kʼo ra jmuru̷jinu kʼu̷ mazi ra pe̷pjiji ra jya̷bʼa̷ji kʼe ngumu̷. O espíritu e Jehová pjo̷sʼu̷ texe yo kjuarma ngekʼua ra tsjaji kʼe bʼe̷pji (Salmo 127:1; Colosenses 3:23).

  • ¿Pje ri kjagojme kja yo ngumu̷ ja ri jmurgojme?

  • ¿Pje ri kjagojme ngekʼua ra ja̷bʼa̷jme yo ngumu̷ ja ri jmurgojme kja texe nu Xoñijomu̷?