Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 1

¿Ja ga kjazgojme yo ri testigojme e Jehová?

¿Ja ga kjazgojme yo ri testigojme e Jehová?

Dinamarca

Taiwán

Venezuela

India

Nu ja i menzumu̷ge, ¿janzi testigo e Jehová gi pa̱rge? Bʼu̷ma ka̱ra̱ testigo e Jehová ja i pe̷pjige, bʼu̷ma kja kolejio nu ja gi page ximi pojinu testigo. Bʼu̷ma nutsʼkʼe a gui ñage ko dʼa testigo, bʼu̷ma o xitsʼige pje mama ne Biblia. ¿Ja ga kjazgojme yo ri testigojme e Jehová ñe pjekja ri jichigojme yo ntee kʼo ri xo̷ru̷jme kja ne Biblia?

Nutsʼkojme xo ri ntegojme nzakjatsʼkʼe. Texezgojme nrre nʼaño ja ri menzumu̷gojme. Nu ja ri jmurgojme poji bʼe̷zo, nrrinxu ñe yo tsʼitrʼi. Ka̱ra̱ ntee kja yo testigo e Jehová kʼu̷ a mi pe̷sʼiji o religión, bʼu̷nkʼo dya mi pe̷sʼiji religión xo bʼu̷nkʼo mi manji dya mi bʼu̷bʼu̷ Mizhokjimi. Ma ro pju̷ru̷jme ro xo̷rgojme ne Biblia ro pjechigojme ja ga kjaa kʼo mamanu, kjanu ro kjagojme testigo e Jehová (Hechos 17:11). Ro nugojme kʼu̷ na kjuana kʼo mama kja o Jñaa Mizhokjimi, ga kjaba ro unu̷jme nguenrra kʼu̷ ma joo ma ro kjagojme ja ma nee Mizhokjimi Jehová.

Ri kjagojme kʼo mama ne Biblia. Nutsʼkojme xo ri pe̷sʼijme nrrumu̷ nzakja kʼo pe̷sʼi yo ntee, bʼu̷ma bʼu̷bʼu̷ ma dya ri kjagojme kʼo na joo nange dya ri perfectogojme. Pero ne Biblia pjo̷xku̷jme na punkju̷ ra mimijme na joo, ngekʼua ri xo̷rgojme o Jñaa e Mizhokjimi (Salmo128:1, 2). Ri negojme ke yo ntee xo ra minji na joo, ngekʼua ri jichigojme kʼo mama ne Biblia.

Ri ka̱rgojme na joo nangeje ri kjagojme ja ga mama e Mizhokjimi. Me ri sogojme na joo ma ri xo̷rgojme ne Biblia, kʼo ri xo̷rgojmenu pjo̷xku̷jme ra kjagojme kʼo na joo. Nudya, dya kja na sʼozgojme ri respetaojme yo ntee, a ri jontejmedya, dya kjo ri ponbu̷jme o merio. Kʼo na sʼoo kʼo kjaa yo nrrinxu ñe yo bʼe̷zo dya kja ri kjagojmekʼo ñe dya kja ri kjagojme chu̱ʼu̱. Ri ka̱ra̱jme na joo ko in pjamilia, xo ri pjo̷sʼu̷jme in chʼigojme ngekʼua ra tsjaji kʼo na joo. Ne Biblia mama ke e “Mizhokjimi dya juajnu̷ kjo ra sʼiya; ix na kjuana sʼiya texe yo ntee”. Ngekʼua texezgojme zo ri nʼaño in país ñe in jñiñigojme ri sʼiyagojme in dyokjojme. Zo ri ntegojme nzakja kʼo ñaja ntee, dya ri kjajme ñe dya ri minkʼojme nzakja angezeji (Hechos 4:13; 10:34, 35).

  • ¿Pjekja ri mangojme ke yo ri testigojme e Jehová ñe nrrexe yo ntee nrre ri chjekjoji?

  • ¿Ja ga mbo̷xkojme kʼo mama ne Biblia?