Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 19

¿Kjo nge “kʼe mbe̷pji” kʼu̷ “kjaa kʼua ja nzi ga mama o lamu ñe kʼu̷ kjijñi na joo”?

¿Kjo nge “kʼe mbe̷pji” kʼu̷ “kjaa kʼua ja nzi ga mama o lamu ñe kʼu̷ kjijñi na joo”?

Texe so̷o̷ ra pa̱rgoji ja ga kjaa kʼo mama e Jehová

Ma dya kja mi bʼe̷zhi na punkju̷ paa ma ro mbo̷trʼu̷ji e Jesús. Angeze mi bʼu̷bʼu̷ ko e Pedro, e Santiago, e Juan ñe e Andrés, mi ñaji. E Jesús go xipjiji pje ro kjogu̷ kja ne Xoñijomu̷ ma ro manda ajensʼe ñe ma dya kja ro mezhe ro nguaru̷ texe kʼo na sʼoo kja ne Xoñijomu̷. Kjanu o tsjapu̷ trʼo̷nu̷ kʼo apostole, go xipjiji ga kjaba: “¿Kjo nge kʼe mbe̷pji kʼu̷ na kjuana kjaa kʼua ja nzi ga mama o lamu ñe kʼu̷ kjijñi na joo, kʼu̷ nu lamu o ñe̷me kja kʼo ñaja mbe̷pji ngekʼua ra unu̷ pje ra ziji kʼe nrrajme ke ra sa̷ntrʼa̷ji?” (Mateo 24:3, 45, TNM; Marcos 13:3, 4). E Jesús ngeje kʼe lamu, kʼe mbe̷pji ngeji ntee ke e Jesús o ñe̷me ngekʼua ro jichiji in dyoji ro tsjaji ja ga nee e Jehová, jesta ma ra sa̷ja̷ yo paa ma ra nguaru̷ kʼo na sʼoo kja ne Xoñijomu̷. ¿Kjo nge kʼe mbe̷pji kʼu̷ go mama e Jesús?

Janzi bʼe̷zo kʼu̷ ra moji ajensʼe pjo̷sʼu̷ji o dyoji. “Kʼe mbe̷pji” ngeje kʼe Cuerpo Gobernante yo Testigo e Jehová. Angezeji jitsʼkojme ra kjajme ja ga nee e Jehová. Ngextrjo kʼe mbe̷pji dyaku̷jme kʼo ra xo̷rgojme ngekʼua ra pjechijme kʼo mama Mizhokjimi (Lucas 12:42).

Kʼe mbe̷pji pjo̷ru̷ nrrexe kʼo pe̷sʼi Mizhokjimi kja ne Xoñijomu̷ (Lucas 12:44). E Jesús o xipji “kʼe mbe̷pji” ro tsjaa na bʼe̷pji kʼu̷ me na nojo. Angezeji pjo̷ru̷ji nrrexe kʼo pe̷sʼi e Jehová kja ne Xoñijomu̷. Jitsʼkojme ja rga zopju̷jme o Jñaa e Mizhokjimi. Penkezgojme yo skuama ke ra xo̷rgojme kja congregación ñe yo skuama kʼu̷ ri sopkʼu̷jme yo ntee ma ri pa jichijme kʼo mama ne Biblia. Kjaji yo discurso ke ri a̷ra̷jme nu ja ri jmurgojme ñe kja yo asamblea.

“Kʼe mbe̷pji” kjaa kʼua ja nzi ga mama o lamu, nangeje kjaa kʼo mama ne Biblia ñe jichi yo ntee ngekʼua ra mba̱ra̱ji Mizhokjimi. Xo kjijñi na joo, nangeje pjo̷ru̷ na joo yo in dyoji ñe texe kʼo pje nrre pe̷sʼi e Jesús kja ne Xoñijomu̷ (Hechos 10:42). Ixi ñetsʼe ke e Jehová pjo̷sʼu̷ yo kjuarmayo ngekʼua ra tsjaji na joo o bʼe̷pji, nange na punkju̷ ntee kʼu̷ a na pjechiji kjo nge e Jehová (Isaías 60:22; 65:13).

  • ¿Kjo nge kʼu̷ go ñe̷me e Jesús ngekʼua ra mbo̷xku̷jme ra kjajme ja ga nee e Jehová?

  • ¿Pjekja so̷o̷ ri manji ke kʼe mbe̷pji kjaa kʼua ja nzi ga mama o lamu ñe kjijñi na joo?