Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 10

¿Ja ga ngeje yo anxe ñe yo demonio?

¿Ja ga ngeje yo anxe ñe yo demonio?

1. ¿Pjenga ni jyodʼu̷ ra pa̱rgo̷ji yo anxe?

E JEHOVÁ nee ke ra pa̱ra̱ji kjo ngeje o pjamilia. Yo anxe ngeje o pjamilia Mizhokjimi. Ne Biblia mama ke angezeji ngeji “o trʼiji Mizhokjimi” (Job 38:7). ¿Pje kjaji yo anxe? ¿Ja ba mbo̷sʼu̷ji kʼo ntee mi jingua? ¿Pjo̷xku̷ji yo anxe yo padya? (Jñanrra nu nota 8 kja nu página 210).

2. ¿Ja bi ñe̱je̱ yo anxe ñe janzi anxe go dya̷trʼa̷ Mizhokjimi?

2 Na joo ke ra pa̱ra̱ji ja bi ñe̱ji yo anxe. Kja Colosenses 1:16 mama ke e Jehová go dya̷trʼa̷ e Jesús, go dya̷trʼa̷ texe yo bʼu̷bʼu̷ ajensʼe nzakja yo anxe, xo go dya̷trʼa̷ ne xoñijomu̷. ¿Janzi anxe go dya̷trʼa̷ Mizhokjimi? Ne Biblia mama ngeje na punkju̷ millón (Salmo 103:20; Apocalipsis 5:11).

3. ¿Pje mama Job 38:4-7 jingua go dya̷trʼa̷ji yo anxe ñe kjo ngeji?

3 Ne Biblia xo mama e Jehová otrʼu̷ ba dya̷trʼa̷ yo anxe, kjanu o dya̷trʼa̷ ne xoñijomu̷. ¿Ja ba zo̷ji kʼo anxe ma e Jehová go dya̷trʼa̷ ne xoñijomu̷? Kja nu libro e Job mama ke me mi ma̷ji. Texeji nrre mi ngeji o pjamilia kʼu̷ mi pe̷piji e Jehová (Job 38:4-7).

YO ANXE PJO̸SʼU̸JI O NTEE MIZHOKJIMI

4. ¿Pjenga neji ke ra ka̱rgo̷ji na joo yo anxe?

4 Yo anxe neji ke ra ka̱rgo̷ji na joo ñe neji ke ra za̷dʼa̷ kʼo mama e Jehová ra tsjaa kja ne xoñijomu̷ (Proverbios 8:30, 31; 1 Pedro 1:11, 12). Yo anxe me go so̷xiji ma e Adán ñe Eva go tsjabi kʼo na sʼoo. Nudya me sichʼi kja o mu̷bʼu̷ji ma janrraji ke yo ntee dya nee ra dya̷tʼa̷ji e Jehová, pe me ma̷ji ma janrraji yo ntee kʼo jodʼu̷ji Mizhokjimi Jehová ñe nzhogu̷ o mu̷bʼu̷ji ga je̷ziji kʼo na sʼoo (Lucas 15:10). Yo  anxe janrraji yo ntee yo pe̷piji Mizhokjimi ñe me sʼiyajiyo. E Jehová pejñe yo anxe ra mbo̷ru̷ji ñe ra mbo̷sʼu̷ji o ntee kja ne xoñijomu̷ (Hebreos 1:7, 14). Ra nuji ja ga tsjaji o bʼe̷pji.

“In Mizhokjimigo̷ o pejñe o anxe go e̱ ngotrʼpʼu̷ o nee yo lion.” (Daniel 6:22)

5. ¿Ja ba mbo̷sʼu̷ji yo anxe o ntee Mizhokjimi mi jingua?

5 E Jehová go pejñe yeje anxe ro ma mbo̷sʼu̷ji e Lot ñe o pjamilia ngekʼua dya ro nrru̱ji ma ro kjuatu̷ nu jñiñi a Sodoma ñe nu jñiñi a Gomorra (Génesis 19:15, 16). Ma kʼe profeta Daniel go pa̱ntrʼa̱ji kja na trʼoʼo nu ja mi ka̱ʼa̱ yo  lion, dya go zaji, angeze go mama pje go kjogu̷, go mama ga kjaba: “In Mizhokjimigo̷ o pejñe o anxe go e̱ ngotrʼpʼu̷ o nee yo lion” (Daniel 6:22). Ma ke apóstol Pedro mi oʼo a pjo̷ru̷, e Jehová o pejñe na anxe ro mbo̷sʼu̷ e Pedro ñe ro pjongu̷ a pjo̷ru̷ (Hechos 12:6-11). Yo anxe xo o e̱ mbo̷sʼu̷ji e Jesús ma mi bʼu̷bʼu̷ kja ne xoñijomu̷. Nzakja ma e Jesús go jichiji kja nrreje, “o e̱kʼua kʼo o anxe Mizhokjimi, o e̱ mbo̷sʼu̷ji e Jesús” (Marcos 1:13). Ma dya bʼe mi po̷trʼu̷ji e Jesús, na anxe “o ñe̱ tsjapu̷ o ze̷zhi e Jesús” (Lucas 22:43).

6. a) ¿Ja rga pa̱rgo̷ji ke yo anxe pjo̷sʼu̷ji o ntee Mizhokjimi yo padya? b) ¿Pje ma trʼo̷nu̷ ra nuji?

6 Yo padya, dya so̷o̷ ra janrraji yo anxe, pe e Mizhokjimi xi pejñeyo ngekʼua ra mbo̷sʼu̷ji o ntee angeze. Ne Biblia mama: “O anxe e Jehová bʼu̷bʼu̷ji a jmii yo su̱ji angeze ñe pjo̷sʼu̷kʼo ngekʼua dya pje ra kjogu̷ji” (Salmo 34:7). ¿Pjenga ni jyodʼu̷ ra mbo̷ku̷jikʼo? Nangeje bʼu̷bʼu̷ kʼo me u̷ngu̷zu̷ji ñe nee ra tsjaku̷ji kʼo na sʼoo. ¿Kjo nge kʼo me u̷ngu̷zu̷ji? ¿Ja ni ñe̱jikʼo? ¿Pjenga nee ra tsjaku̷ji kʼo na sʼoo? Ra meyajikʼo ma ra xo̷ru̷ji pje go kjogu̷ ma e Jehová go dya̷trʼa̷ e Adán ñe e Eva.

BʼU̸BʼU̸ KʼO U̸NGU̸ZGO̸JI PE DYA RI JANRRAJI

7. ¿Pje nee e Satanás ke ra kjaji?

7 Kja nu xo̷ru̷ 3 ro pjechiji kʼu̷ na anxe ke dya go dya̷ta̷ Mizhokjimi, xo mi nee ro mbe̷zhi jmuʼu ngekʼua ro manda kʼo dyaja. Ne Biblia mama ke angeze ni chju̱u̱ Satanás ñe Diablo (Apocalipsis 12:9). E Satanás dya mi nee ke yo dyaja ro dya̷ta̷ji Mizhokjimi. Ndeze ma o dyompu̷ e Eva xe na jyotrʼu̷ na punkju̷ ntee. Pe o bʼu̷bʼu̷ ntee ke o dya̷ta̷ji e Jehová nzakja e Abel, e Enoc ñe e Noé (Hebreos 11:4, 5, 7TNM).

8. a) ¿Pje go tsjaji janzi anxe kʼo go mbe̷zhiji demonio? b) ¿Pje go tsjaji yo demonio ngekʼua dya ro nrru̱ji ma go ñe̱je̱ kʼe trʼadyebʼe?

8 Kʼo paa ma o bʼu̷bʼu̷ e Noé yo anxe dya go dya̷ta̷ji  Mizhokjimi, go jye̷ziji ajensʼe ja mi bʼu̷nji ñe o e̱ nga̱ra̱ji kja ne xoñijomu̷ nzakja yo ntee. ¿Pjenga go tsjajikʼo? Ne Biblia mama ke mi nee ro chju̷ntu̷ji yo nrrinxu (xo̷ru̷ Génesis 6:2). * Me na sʼoo kʼo go tsjaa kʼo anxe (Judas 6). Ma go kjogu̷ yo paa, kʼo ntee go xa̷ka̷ji kʼo na sʼoo kʼo mi kjaa kʼo sʼoanxe, mi pa̷ra̷ji kʼo ntee ñe mi ju̷nbu̷ji kʼo mi pe̷sʼiji. Ngekʼua e Jehová go mama ro pejñe na trʼadyebʼe ga kjanu o chjotu̷kʼo. Pe o mama ro mbo̷sʼu̷ kʼo ntee kʼo mi a̷ta̷ji angeze ngekʼua dya ro nrru̱ji (Génesis 7:17, 23). Pe kʼo anxe dya mi nee ro nrru̱ji ngekʼua go moji ajensʼe ja bi ñe̱ji. Ne Biblia mama ke kʼo sʼoanxe ngeji demonio. Go dya̷ta̷ji e Satanás ngekʼua ngeje kʼu̷ mandadyakʼo (Mateo 9:34).

9. a) ¿Pje bo tsjapu̷ji yo demonio ma go nzhogu̷ji ajensʼe? b) ¿Pje ra xo̷ru̷jiba?

9 Angezeji dya go dya̷ra̷ji ngekʼua ma go nzhogu̷ji ajensʼe e Jehová dya xi bo nee ke ro ngeji o pjamilia (2 Pedro 2:4). Nudya yo demonio dya kja so̷o̷ ra potrpu̷ji o kuerpo ngekʼua ra ngeji nzakja yo ntee, pe sido ompu̷ji “texe yo ka̱ra̱ kja ne xoñijomu̷” (Apocalipsis 12:9; 1 Juan 5:19). Ra xo̷ru̷jiba ja ga dyompu̷ji na punkju̷ ntee (xo̷ru̷ 2 Corintios 2:11TNM). *

¿JA GA JYOTRʼU̸JI YO NTEE YO DEMONIO?

10. ¿Ja ga jyotrʼu̷ji yo demonio yo ntee?

10 Yo demonio pje nrre kjaji ngekʼua ra jyotrʼu̷ji yo ntee. Bʼu̷bʼu̷ ntee yo ñaji yo demonio, bʼu̷bʼu̷ yo poji kja se̷ro̷ o yo sañime̷ ngekʼo ra zopju̷ji yo demonio xo pa nuji kʼo pa̱ra̱ pje mbeñe na ntee. Zo̷ pje nrre kjaji, nrre zopju̷ji yo  demonio. Pe ne Biblia xitsiji ke dya ra kjago̷jiyo ñe dya ra jodʼu̷jikʼo nangeje texe ba e̱je̱ kja yo demonio (Gálatas 5:19-21). ¿Pjenga dya ga jokʼo? Yo demonio kjaji nzakja yo ntee yo jodʼu̷ji pje ra mba̷ʼpʼa̷ yo añimale ngekʼua ra zu̷ru̷ji, ga kjanu yo demonio me jombʼu̷ ja rga tsjapu̷ji ngekʼua yo ntee ra tsjaji yo nee angezeji (jñanrra nu nota 26 kja nu página 221).

11. ¿Pje kjaa yo ntee ma nee ra mba̱ra̱ji kʼo ra kjogu̷ axojñi ñe pjenga dya ga joo ke ra kjajikʼo?

11 Yo demonio jyotrʼu̷ yo ntee ngekʼua ra mbeñeji ke bʼu̷bʼu̷ kʼo ra xipjiji pje ra kjogu̷ axojñi ñe ra xipjiji kʼo dya pa̱ra̱ji. Kjapu̷ji yo ntee ra jñanrraji kja na bola de cristal, ra nuji yo carta yo xiji tarot, ra xo̷rpu̷ji o dye̷e̷ ma jiyo nge yo seje ngekʼua ra xiji pje ra kjogu̷ axojñi. Na punkju̷ ntee manji kʼu̷ dya nrra na sʼoo ma ra tsjajikʼo ñe dya pje ra kjogu̷ji, pe dya kjuanakʼo. Ne Biblia mama ke yo se̷ro̷ pe̷pi yo demonio. Kja Hechos 16:16-18 mama ke mi bʼu̷bʼu̷ na xuntrʼi kʼu̷ “mi oʼo o mu̷bʼu̷ na o espíritu e Satanás kʼu̷ dya joo, mi unu̷ poder mi divinao”, ngekʼua mi to̱njo̱ “na punkju̷ o merio”. Pe ma kʼe apóstol Pablo go pjongu̷ kʼe demonio kja ke xuntrʼi, angeze dya kja mi so̷o̷ ro mama pje ro kjogu̷ axojñi.

12. a) ¿Pjenga dya ra jodʼu̷ji ra ñaji yo añima? b) ¿Pjenga o ntee Mizhokjimi dya kjaji kʼo je ni ñe̱je̱ kja yo demonio?

12 Yo demonio xe jyotrʼu̷ yo ntee, ngekʼua bʼu̷bʼu̷ ntee kʼo kreoji ke kʼo ya nrru̱u̱ bʼu̷bʼu̷ ja kʼo o ma mimiji ngekʼua ma pje nee ra xipjiji o pje nee ra mba̱ra̱ji so̷o̷ ra ñabi angezeji xo mbeñeji ke so̷o̷ ra tsjaku̷ji kʼo na sʼoo. Na punkju̷ kʼo mi ñeji na jobi o na o pjamilia ke go nrru̱u̱, nee ra ñabi ko angeze o nee ra mba̱ra̱ji pje ra mama, pa nuji kʼo zopju̷ kʼo añima ngekʼua ra xipjiji pje mama ke ntee ke ya nrru̱u̱. Kʼe se̷ro̷ bʼu̷ma ra xipji pje kʼo mama o pje go kjogu̷ kʼe ntee kʼu̷ mi jobi o ma mi ngeje na o pjamilia ñe  bʼu̷ma ra ñaa kʼe se̷ro̷ nzakja kʼe ntee ke ya nrru̱u̱ (1 Samuel 28:3-19). Yo ntee pje nrre kjaji ma kjo kʼo ra nrru̱u̱ nangeje mbeñeji ke xe bʼu̷ntrjo. Bʼu̷bʼu̷ ntee kʼo pje nrre kjaa kʼe paa ma kjo kʼo ra nrru̱u̱ ñe ra dyo̷gu̷ji, kjinsbʼiji o paa, so̷tpʼu̷ji o kje̷e̷ ñe pje kʼo nrre pa̷sʼbʼa̷ji. Pe kʼo ntee kʼo kreoji Mizhokjimi Jehová dya kjajiyo, zo̷ nu pjamilia ñe yo menzumu̷ dya kja nuji na joo, ra zadʼu̷ji ñe dya kja ra dyoji angeze. Pe yo a̷ta̷ji Mizhokjimi pa̱ra̱ji na joo ke yo añima dya bʼu̷bʼu̷ jakʼo ra ma mimiji, zo̷ pje ra xipjiji dya kja ra dya̷ta̷ji ñe dya so̷o̷ ra tsjaku̷ji kʼo na sʼoo (Salmo 115:17). Ngekʼua ri pjo̷nguenrra, dya ga joo ri jyodʼu̷ ri zopju̷ yo añima o yo demonio ñe dya ri tsjaa kʼo je ni ñe̱je̱ kja yo demonio (xo̷ru̷ Deuteronomio 18:10, 11; * Isaías 8:19).

13. ¿Pje so̷o̷ ro tsjaa kʼo ntee kʼo mi su̱u̱ yo demonio?

13 Yo demonio jyotrʼu̷ yo ntee ñe nee ke ra zu̱ji. Yo padya e Satanás ñe yo demonio pa̱ra̱ji “kʼu̷ dya kja ra mezhe paa kʼu̷ xe so̷o̷ ra [tsjaji] texe kʼo na sʼoo”, ante ke ra kjuatu̷ Mizhokjimikʼo, angezeji xenrra ra tsjaji kʼo na sʼoo (Apocalipsis 12:12, 17). Na punkju̷ ntee kʼo me mi su̱u̱ yo demonio, nudya dya kja su̱ji. ¿Pje go tsjaji ngekʼua dya kja ro zu̱ji?

KʼO RI TSJAGE NGEKʼO DYA KJA RI SU̱U̱ YO DEMONIO

14. Nzakja o ntee Mizhokjimi kʼo go mimi jingua, ¿pje ra kjaji ma pje kʼo ri pe̷sʼiji kʼu̷ nge o tsjaja yo demonio?

14 Ne Biblia mama pje ra kjaji ngekʼua dya ra a̷ta̷ji yo demonio ñe dya ra su̱ji pje ra tsjaku̷ji. Nzakja mi jingua kja kʼe jñiñi a Éfeso mi bʼu̷bʼu̷ ntee kʼo mi pe̷piji yo demonio  ma dya bʼe mi pa̱ra̱ji Mizhokjimi Jehová. ¿Ja ba jye̷zijikʼo? Ne Biblia mama: “Bʼu̷bʼu̷ o se̷ro̷ kʼo mi kjaa o magia. O ma trje̷ji kʼo o libroji kʼo mi junsʼu̷ kʼo magia, kjanu o ndu̷tʼu̷ji a jmii texe kʼo ntee” (Hechos 19:19). Mi nee ro tsjaji kʼo nee e Mizhokjimi, ngekʼua go nrru̷tʼu̷ji texe kʼo libro kʼo mi junsʼu̷ kʼo magia. Xo ra kjaji ga kjanu ma ri nee ra a̷ta̷ji e Jehová, dya kja ra pe̷sʼiji kʼo ni ñe̱je̱ kja yo demonio nzakja yo libro, yo revista, yo horóscopo, yo película, yo tʼeñe, yo rretrato kʼo kuatrʼu̷ magia o yo kuatrʼu̷ demonio ñe nrrexe kʼo ni ñe̱je̱ kja o ze̷zhi yo demonio zo̷ ri jñetse na joo ñe kʼu̷ dya pje ra kjogu̷zu̷ji. Bʼu̷bʼu̷ kʼo pje nrre pe̷sʼiji o jeji ngekʼua dya pje ra tsjapu̷ji yo demonio (1 Corintios 10:21).

15. ¿Pje ni mbe kʼo xe ra kjaji ngekʼua dya ra kjapu̷ji nguenrra e Satanás ñe yo demonio?

15 Go kjogu̷ janzi kje̷e̷ ma kʼo ntee kʼo mi bʼu̷nji a Éfeso bi nrru̷tʼu̷ji o libro kʼo mi junsʼu̷ magia, kʼe apóstol Pablo go mama ke sido mi pe̷sʼiji na chu̱ʼu̱, kʼo mi “chu̱ji [...] ngeji espíritu kʼo kjaji kʼo na sʼoo” (Efesios 6:12TNM). Zo̷ ya bi nrru̷tʼu̷ji kʼo libro kʼo mi junsʼu̷ magia, kʼo demonio sido mi jodʼu̷ji pje ro tsjapu̷ji. ¿Pje nge kʼo xo go tsjaji ngekʼua dya pje ro tsjapu̷ji kʼo demonio? Kʼe apóstol Pablo go mama: “Na xundaro ju̷̱u̷̱ na escudo ngekʼua, dya ra cho̷tʼu̷ kʼo flecha kʼo ya ri trje̷ʼe̷ kʼo ra pa̱na̱ kʼo enemigo. Je xo ga kjatsʼkʼejinu, sido ri ñejmeji e Jesucristo kʼu̷ o ndintsʼkʼigeji in mu̷bʼu̷geji. Akjanu, dya ra ndo̱kʼu̷ji e Satanás kʼu̷ me jonkʼu̷ ja rga ndo̱kʼu̷ji” (Efesios 6:16). Na xundaro ju̷̱u̷̱ na escudo ngekʼua ra ngobʼu̷, ga kjanu nutsʼko̷ji ma ra ejmeji ke e Mizhokjimi ra mbo̷ku̷go̷ji, dya ra kjapu̷ji nguenrra e Satanás ñe yo demonio (Mateo 17:20).

16. ¿Pje ra kjaji ngekʼua ra ejmeji ke e Jehová ra mbo̷ku̷ji?

16 ¿Pje ra kjaji ngekʼua ra ejmeji ke e Jehová ra mbo̷ku̷ji? Ma pama pama ra xo̷ru̷ji ne Biblia ra unu̷ji nguenrra ja  rga mbo̷xku̷ji e Jehová. Ga kjanu ra ze̷zhi in ejme ñe e Satanás ñe yo demonio dya pje ra tsjaku̷ji (1 Juan 5:5).

17. ¿Pje xe ra mbo̷xku̷ji ngekʼua dya pje ra tsjaku̷ji yo demonio?

17 ¿Pje mbe kʼo xe mi jyodʼu̷ ro tsjaa o ntee Mizhokjimi kʼo mi bʼu̷bʼu̷ji a Éfeso? Nu ja mi menzumu̷ji, na punkju̷ ntee mi pe̷piji yo demonio. Ngekʼua kʼe apóstol Pablo go xipji yo kjuarma: “Xomu̷, ndempa ri dyo̷tu̷geji Mizhokjimi” (Efesios 6:18). Mi jyodʼu̷ ke pama pama ro dyo̷tu̷ji Mizhokjimi Jehová ngekʼua ro mbo̷sʼu̷ji. ¿Nutsʼko̷ji pje xo ni jyodʼu̷ ra kjaji? Yo padya nrrexe ne xoñijomu̷ me ka̱ra̱ ntee yo pe̷piji yo demonio, ngekʼua ni jyodʼu̷ ra o̷tu̷ji e Jehová ra mbo̷xku̷ji ngekʼua dya pje ra tsjaku̷jikʼo ñe ma ra o̷tu̷ji ra na̷mbʼa̷ji o trju̱u̱ angeze (xo̷ru̷ Proverbios 18:10). * Ma dya ra je̷zi ra o̷tu̷ji e Jehová, angeze ra mbo̷xku̷ji ngekʼo dya pje ra tsjaku̷ji e Satanás (Salmo 145:19; Mateo 6:13).

18, 19. a) ¿Pje ra kjaji ngekʼua ra to̱pu̷ji e Satanás ñe yo demonio? b) ¿Pje ra nuji kja nu xo̷ru̷ nu ba e̱je̱?

18 Ma dya ri pe̷sʼi kʼo nge o kjaja yo demonio ñe ri ñenchʼe kja in mu̷bʼu̷ kʼu̷ e Jehová ra mbo̷kʼu̷, dya ri su̱ge e Satanás ñe yo demonio, dya xo ri tsjapu̷ nguenrra kʼo manji (xo̷ru̷ Santiago 4:7, 8). E Jehová xenrra na ze̷zhi ke yo demonio. Angeze go zu̷bu̷kʼo kja kʼo paa ma o mimi e Noé ñe e Jehová ra kjuatu̷yo kʼo paa kʼo ba e̱je̱ (Judas 6). Dya ra jyombeñeji kʼu̷ dya ri bʼu̷ntsje̷ji, e Jehová ra pejñe yo anxe ra e̱ mbo̷xku̷ji (2 Reyes 6:15-17). E Jehová dya ra jye̷zgiji ra mbo̷xku̷ji ngekʼua so̷o̷ ra to̱mpu̷ji chu̱ʼu̱ e Satanás ñe yo demonio (1 Pedro 5:6, 7; 2 Pedro 2:9).

19 E Satanás ñe yo demonio me kjapu̷ji ra supjre yo ntee,, ¿pjenga dya bʼe kjuatu̷yo e Mizhokjimi? Nge yo ra nuji kja ne xo̷ru̷ 11.

^ par. 8 Génesis 6:2: “Nukʼua kʼo o trʼii e Mizhokjimi go mbu̷ru̷ go jñanrraji kʼo o xuntrʼi yo bʼe̷zo kʼu̷ me ma zo̷trjoji. Nuʼma go tsjapu̷ji o suu yo nrrinxu ñe go ñʼeji nrrexe kʼo go neji”.

^ par. 9 2 Corintios 2:11: “Ngekʼua dya ra jyoku̷ji e Satanás, nangeje dya so̷o̷ ra mango̷ji ke dya ri pa̱rgo̷ji ja ga jyotrʼu̷ yo ntee”.

^ par. 12 Deuteronomio 18:10, 11: “Dya ri dyoji yo ntee yo trju̷trʼu̷ o trʼiji ñe o xuntrʼiji, ni yo mama pje ra kjogu̷ axojñi, ni yo kjaa magia, ni yo mama ma ra kjogu̷ kʼo na joo o kʼo na sʼoo, ni yo se̷ro̷ o yo sañime̷ yo kjapu̷ kʼo na sʼoo yo ntee, ni yo zopju̷ yo añima”.

^ par. 17 Proverbios 18:10: “O trju̱u̱ e Jehová ngeje na torre kʼu̷ me na ze̷zhi. Je panu kʼe ntee kʼu̷ kjaa na joo ngekʼo ra mbo̷sʼu̷ angeze”.