Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 11

¿Pjenga me ri supjreji?

¿Pjenga me ri supjreji?

1, 2. ¿Pje nee ra mba̱ra̱ na punkju̷ ntee?

GO KJOGU̸ dʼa tsunami kʼu̷ go kjuatu̷ naja jñiñi. Naja bʼe̷zo go pjongu̷ o zapju̷, go pjatrʼu̷ ñe go mbo̷trʼu̷ na punkju̷ ntee kja na nitsjimi. Na ndinxu ke mi so̷ʼo̷ cáncer go nrru̱u̱ ñe go zogu̷ tsichʼa tsʼitrʼi.

2 Ma kjogu̷ kʼo na sʼoo kja ne xoñijomu̷, na punkju̷ ntee o̷nu̷ji, “¿pjenga kjogu̷ kʼo na sʼoo?”. Xo o̷nu̷ji, “¿pjenga bʼu̷bʼu̷ ntee kʼo me u̷mbu̷ in minte ñe pjenga ri supjreji?”. ¿Gi kjage yo trʼo̷nu̷?

3, 4. a) ¿Pje bo dyo̷nu̷ e Habacuc e Jehová? b) ¿Pje go nrru̷ru̷ e Jehová?

3 Kja ne Biblia mama ke go bʼu̷bʼu̷ bʼe̷zo kʼo mi enchʼeji kja o mu̷bʼu̷ Mizhokjimi, angezeji xo mi kjaji trʼo̷nu̷. Nzakja kʼe profeta Habacuc ke go dyo̷nu̷ e Jehová: “¿Pjenga i je̷zi ra janrrgo̷ kʼo na sʼoo? ¿Ñe pjenga i je̷zi ra bʼu̷bʼu̷ kʼo kjapu̷ ra supjre yo dyaja? ¿Pjenga i je̷zi ra bʼu̷bʼu̷ kja in jmigo̷ kʼo chjotu̷ji texe ñe kʼo chu̱ji? ¿Ñe pjenga chja̷maji ñe me bʼu̷bʼu̷ kʼo jodʼu̷ chu̱ʼu̱?” (Habacuc 1:3).

4 Kja Habacuc 2:2, 3 ri to̷trʼu̷ji ja ba nrru̷ru̷ Mizhokjimi kʼo trʼo̷nu̷ kʼo go tsjaa e Habacuc ñe kʼo ro tsjaa Mizhokjimi ngekʼua ro joku̷ kʼo mi kjogu̷. E Jehová me sʼiya yo ntee. Ne Biblia mama: “Angeze me mbentsʼeji ga mbo̷kʼu̷ji” (1 Pedro 5:7). Me sichʼi kja in mu̷bʼu̷ji ma supjre yo ntee, pe e Mizhokjimi xenrra sichʼi kja o mu̷bʼu̷ ma janrra ke ri supjreji (Isaías 55:8, 9). Ngekʼua ra  trju̷ru̷ji ne trʼo̷nu̷: ¿Pjenga me supjre yo ntee kja ne xoñijomu̷?

¿PJENGA ME SUPJRE YO NTEE?

5. ¿Pje xipji yo xo̷pu̷te kja yo religión yo ntee ma supjreji? ¿Pje mama ne Biblia?

5 Yo pastor, yo mbo̷kjimi ñe yo xo̷pu̷te kja yo religión ga xipjiji yo ntee ke e Mizhokjimi kjaku̷ji ra supjreji. Bʼu̷nkʼo manji ke e Mizhokjimi mama pje ra kjogu̷ yo ntee, xo manji ke dya so̷o̷ ra pa̱ra̱ji pjenga Mizhokjimi kjaa ga kjanu. Xo bʼu̷nkʼo manji ke tu̱u̱ yo ntee ñe yo tsʼitrʼi ngekʼua ra mimiji ajensʼe nu ja bʼu̷bʼu̷ Mizhokjimi. Pe dya na kjuanakʼo, e Jehová dya penkoji kʼo na sʼoo. Ne Biblia mama ga kjaba: “¡E Mizhokjimi kʼu̷ na kjuana dya kjaa kʼo na sʼoo! Angeze me na ze̷zhi ñe dya kjaa kʼo na sʼoo” (Job 34:10).

6. ¿Pjenga mama na punkju̷ ntee ke e Mizhokjimi penko̷ji kʼo na sʼoo?

6 Na punkju̷ ntee manji ke e Mizhokjimi penko̷ji yo na sʼoo nange mbeñeji ke nge Mizhokjimi kʼu̷ manda kja ne xoñijomu̷. Pe kja nu xo̷ru̷ 3, ro nuji ke nge e Satanás kʼu̷ dya joo kʼu̷ manda kja ne xoñijomu̷.

7, 8. ¿Pjenga me supjre yo ntee kja ne xoñijomu̷?

7 Kja ne Biblia mama ke “kʼo ntee kʼo dya enchʼe o mu̷bʼu̷ e Jesucristo, je nge e Satanás kʼu̷ dya joo kʼu̷ mandakʼo” (1 Juan 5:19). E Satanás nge kʼu̷ manda kja ne xoñijomu̷, me ma̷ja̷ ma kjapu̷ ra supjre yo ntee. Angeze “ompu̷ texe yo ka̱ra̱ kja ne xoñijomu̷” (Apocalipsis 12:9). Na punkju̷ ntee kjaji ja ga tsjaa e Satanás, na mbe̷chjineji, u̷mbu̷ji o minte ñe me ma̷ji ma kjapu̷ ra supjreji.

8 Xo bʼu̷bʼu̷ kʼo kjaku̷ji ra supjreji kja ne xoñijomu̷. Ma  e Adán ñe e Eva go tsjabi nzhubu̷, kʼo o trʼii kʼo go ñʼejebi mi pe̷sʼiji nzhubu̷, ngekʼua bʼu̷bʼu̷ ntee kʼu̷ kjapu̷ ra supjre o minte. Na punkju̷ ntee xo mbeñeji ke me ni mubi ke nangeje yo dyaja ntee. Bʼu̷nkʼo chja̷maji, poji kja chu̱ʼu̱ ñe kjapu̷ji ke ra zu̱ji yo ntee (Eclesiastés 4:1; 8:9). Bʼu̷bʼu̷ ntee kʼo supjre ‘nangeje dya pa̱ra̱ji nu nrrajme ma pje ra kjogu̷ji’ (Eclesiastés 9:11). Ra bʼu̷bʼu̷ paa nu ja kʼo ra bʼu̷nkʼo̷ji, bʼu̷ma pje kʼo ra kjogu̷zu̷ji.

9. ¿Pjenga ri mango̷ji ke e Jehová pa̱ra̱ na joo yo ri supjreji?

9 E Jehová dya kjaku̷ji ra supjreji. Dya nge angeze kʼu̷ kjapu̷ ra chu̱ʼu̱ yo ntee, ra mbo̷trʼu̷nteji ñe kʼu̷ dya ra neji o dyoji. E Mizhokjimi dya penko̷ji yo na sʼoo nzakja ma mbii ne xoñijomu̷, yo huracán ñe ma ñe̱je̱ na punkju̷ dyebʼe. Bʼu̷ma nutsʼkʼe gi mbeñe ke ma e Jehová me na ze̷zhi kja texe ne xoñijomu̷ ñe ajensʼe, ¿pjenga je̷zi ke ra kjogu̷ yo na sʼoo? Ri pa̱rgo̷ji ke e Mizhokjimi me sʼiyazu̷ji, ngekʼua angeze pa̱ra̱ na joo pjenga je̷zi ke ra kjogu̷yo (1 Juan 4:8).

¿PJENGA E MIZHOKJIMI JE̸ZI KE RA SUPJREJI?

10. ¿Pje ma bʼe̷chjine go xosbʼu̷ e Satanás nu e Jehová?

10 Kja kʼe jardín Edén, nu Diablo go jyotrʼu̷ e Adán ñe e Eva. E Satanás go xosbʼu̷ bʼe̷chjine e Mizhokjimi, go mama ke e Mizhokjimi dya mi nee ro unu̷ kʼo ma joo e Adán ñe e Eva. E Satanás mi nee ke ro ñenchʼebi kja o mu̷bʼu̷bi kʼu̷ xenda ro manda na joo angeze ke e Jehová ñe dya mi mubi ke e Adán ñe e Eva ro jyodʼu̷bi Mizhokjimi (Génesis 3:2-5; jñanrra nu nota 27 kja nu página 222).

11. ¿Pje ma trʼo̷nu̷ kʼu̷ ni mubi ra trju̷ru̷ji?

11 E Adán ñe e Eva dya go dya̷ta̷bi e Jehová, go tsjabi  kʼo na sʼoo. Angezebi mi mbeñebi ke mi so̷o̷ ro juajnu̷bi pje mi mbe kʼo ma joo ñe pje mi mbe kʼo ma sʼoo. ¿Pje ro tsjaa e Jehová kʼu̷ ro jñetse ke dya ma joo kʼo go tsjaji ñe ke me pa̱ra̱ na joo kʼo ni jyongo̷ji?

12, 13. a) ¿Pjenga dya go mbo̷trʼu̷ e Jehová dabadiji kʼo dya go dya̷ta̷ji? b) ¿Pjenga o jye̷zi e Jehová ke e Satanás ro manda kja ne xoñijomu̷ ñe yo ntee ro mandatsje̷ji?

12 E Jehová dya go chjotu̷ e Adán ñe e Eva nzi ba tsjabi kʼo na sʼoo. Kʼo go tsjaa e Jehová nge ke go jye̷zibi ro ñʼejebi trʼii. Nuʼma e Jehová o unu̷ kʼo o trʼii e Adán ñe e Eva ro juajnu̷ji kjo nge kʼu̷ ro dya̷ta̷ji ngekʼua ro mandaji angezeji. E Jehová mi nee ke ro iji kja ne xoñijomu̷ na punkju̷ ntee kʼu̷ dya ro mbe̷sʼiji nzhubu̷, ro kjogu̷ ga kjanu zo̷ pje nrre ro tsjaa nu kʼu̷ dya joo (Génesis 1:28; Isaías 55:10, 11).

13 Ma e Satanás o xosbʼu̷ bʼe̷chjine e Jehová o dya̷ra̷ na punkju̷ millón anxe (Job 38:7; Daniel 7:10). Nuʼma e Jehová go jye̷zi ke ro kjogu̷ yo paa ngekʼua e Satanás ro unu̷ nguenrra ma na kjuana kʼo bi mama. Xo go jye̷zi ke yo ntee ro juajnu̷ji kjo ro manda ñe ke ro dya̷ta̷ji e Satanás, ga kjanu ro jñetse ma na kjuana ro so̷o̷ ro mimiji na joo, ma dya ro jyodʼu̷ji Mizhokjimi ke ro mbo̷sʼu̷ji.

14. ¿Pje jitsʼko̷ji yo na kjogu̷ kja ne xoñijomu̷?

14 Ya kjogu̷ na punkju̷ kje̷e̷, yo ntee nee ra mandatsje̷ji, pe dya so̷o̷ ra tsjajikʼo. Kʼo na kjogu̷ jñetse ke na mbe̷chjine e Satanás. Ni jyodʼu̷ ke yo ntee ra jyodʼu̷ji Mizhokjimi ngekʼua ra mbo̷sʼu̷ji. Na kjuana kʼo go mama kʼe profeta Jeremías, angeze go mama ga kjaba: “Ri pa̱ra̱go̷ na joo, oh Jehová, ke yo ntee dya so̷o̷ ra nzhodʼu̷tsje̷ji kja o ñʼiji. Yo ntee dya pa̱ra̱ji ra juajnu̷ji ja ra nzhodʼu̷ji” (Jeremías 10:23).

 ¿PJENGA JE̸ZI E JEHOVÁ RA KJOGU̸ NA PUNKJU̸ PAA?

15, 16. a) ¿Pjenga je̷zi e Jehová ra kjogu̷ na punkju̷ paa ke ri supjreji? b) ¿Pjenga dya bʼe joku̷ e Jehová yo nrrumu̷ kʼo o tsjaa e Satanás?

15 ¿Pjenga je̷zi e Jehová ra kjogu̷ na punkju̷ paa ke ri supjreji? ¿Pjenga dya kjuatu̷ kʼo na sʼoo? Ya kjogu̷ na punkju̷ paa kʼu̷ jñetse ke e Satanás dya so̷o̷ ra manda na joo. Ga potʼu̷ji kʼo manda kja ne xoñijomu̷ ngekʼua ra tsjaji na joo, pe dya ngeje ga kjanu. Zo̷ bʼu̷bʼu̷ ntee kʼo pa̱ra̱ji na punkju̷ ñe pje nrre a̷trʼa̷ji, xenda kjaji kʼo na sʼoo, po̷trʼu̷nteji, chu̱ji, kjogu̷ji trjijmi ñe dya pje pe̷sʼiji. Ni jyodʼu̷ ra mandazu̷ji Mizhokjimi ngekʼua ra ka̱ra̱ji na joo.

16 E Jehová dya bʼe jokʼu̷ yo nrrumu̷ kʼo go tsjaa e Satanás. Ma ro jokʼu̷ kʼo nrrumu̷ ro jñetse ke e Mizhokjimi pjo̷sʼu̷ e Satanás ra manda, pe e Mizhokjimi dya ra tsjakʼo. Yo ntee mbeñeji ke so̷o̷ ra mandatsje̷ji na joo ñe ra mbedye na joo kʼo manji. Pe dya kjuana ke so̷o̷ ra mandaji na joo. E Jehová dya ra mbo̷sʼu̷ji ra tsjaji ga kjanu nange e Jehová dya so̷o̷ ra mama bʼe̷chjine (Hebreos 6:18TNM).

17, 18. ¿Pje ra tsjaa e Jehová ngekʼua ra joku̷ yo nrrumu̷ kʼo a go tsjaa e Satanás?

17 ¿So̷o̷ ra jokʼu̷ e Jehová yo nrrumu̷ kʼo a go tsjaa e Satanás ñe yo ntee? Ja̱a̱, e Mizhokjimi so̷o̷ ra tsjaa texe. E Jehová pa̱ra̱ jingua ra jñetse ma na kjuana nrrexe kʼo go mama e Satanás. Nuʼma ra kjogu̷ ja nzi ma nee Mizhokjimi mi jingua, ra nge ne xoñijomu̷ me rga zo̷o̷ ñe “texe yo añima yo bʼu̷bʼu̷ji kja o trʼoji” ra xosu̷ji (Juan 5:28, 29NTD). Yo ntee dya kja ra zo̷dyeji ñe dya kja ra ndu̱ji. E Jesús ra kjuatu̷ texe kʼo na sʼoo kʼo a go tsjaa e Satanás. E Jehová ra tsjaa ke e Jesús ra “juapkʼu̷ o bʼe̷pji e Satanás kʼu̷ dya joo” (1 Juan 3:8). Nudya ra unu̷ji po̷jo̷ e Jehová nange me pe̷sko̷ji paciencia, ngekʼua so̷o̷ ra pa̱ra̱ji na joo angeze ñe ra juajnu̷ji ra mandazu̷ji (xo̷ru̷ 2 Pedro  3:9, 10TNM). * E Mizhokjimi xo pjo̷xku̷ji ma ri supjreji ngekʼua ra se̷chiji (Juan 4:23; xo̷ru̷ 1 Corintios 10:13).

18 E Jehová dya kjaku̷ji ke ra juajnu̷ji angeze ra mandazu̷ji. O jye̷zgiji ke ra juajnu̷ji pje ri nee ra kjaji. Ra nuji pjenga me ni mubi kʼo dʼakʼu̷ji Mizhokjimi.

JUAJNU̸ PJE RI TSJAGE

19. ¿Pje nge kʼo me ni mubi kʼo go dyaku̷ji e Jehová? ¿Pjenga na joo ra unu̷ji po̷jo̷ Mizhokjimi?

19 E Jehová go dyaku̷ji yo me na joo, so̷o̷ ra juajnu̷ji pje ri nee ra kjaji, dya ri chjekjo̷ji yo añimale. Yo añimale dya juajnu̷ji pje ra tsjaji, pe nutsʼko̷ji so̷o̷ ra juajnu̷ji ja rga mimiji ñe ma ri nee ra a̷ta̷ji e Jehová (Proverbios 30:24). Dya ri chjenko̷ji na máquina kʼu̷ kjaa ja ga mama kʼe ntee kʼu̷ go dya̷trʼa̷. Nutsʼko̷ji so̷o̷ ra juajnu̷ji pje ra kjaji, ja rga kjazgo̷ji, kjo ra joji ñe ja rga mimiji. E Jehová nee ke ra ma̷ji rga minji.

20, 21. ¿Pje nge kʼo me na joo ke so̷o̷ ri tsjagedya?

20 E Jehová nee ke ra sʼiyaji angeze (Mateo 22:37, 38). Angeze ngeje nzakja na tata kʼu̷ me ma̷ja̷ ma a̷ra̷ nu o trʼii ra xipji “ri sʼiyatsʼu̷” ñe dya kjo xipji ra tsjakʼo. E Jehová go dya̷ka̷ji na joo ngekʼua ra juajnu̷ji ma ri nee ra pe̷piji angeze. E Satanás, e Adán ñe e Eva go tsjaji kʼo na sʼoo, dya o juajnu̷ji ro dya̷ta̷ji e Jehová. Pe nutsʼkʼe ¿pje ri tsjage?

21 Tsjage kʼo mama e Jehová. Na punkju̷ millón ntee je ga tsjaji ga kjanu ngekʼua ra ma̷pa̷ji o mu̷bʼu̷ e Jehová ñe dya a̷ta̷ji e Satanás (Proverbios 27:11). ¿Pje ri tsjagedya ngekʼo ri bʼu̷nkʼe kja nu dʼadyo xoñijomu̷ nu ja dya kja ra supjreji? Kja nu xo̷ru̷ nu ba e̱je̱ ra trju̷ru̷ji ne trʼo̷nu̷.

^ par. 17 2 Pedro 3:9, 10: “Dya ra mezhe kʼo ra tsjaa e Jehová, zo̷ bʼu̷bʼu̷ ntee kʼo manji ke ya me go mezhe, me pe̷sko̷ji paciencia nangeje dya nee kjo ra kjuatu̷, angeze nee ke texezu̷ji ra nzhogu̷ in mu̷bʼu̷ji. Pe nu paa e Jehová ra e̱je̱ nzakja na mbe̱ʼe̱, nuʼma yo jensʼe me ra yu̷ru̷ji kʼu̷ ixta chjoru̷ji, me rga paʼa yo bʼu̷bʼu̷ ñe ra chjoru̷kʼo, ne xoñijomu̷ ñe texe kʼo kjaji ra jñetsekʼua”.