Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 3

¿Pje ra tsjaa e Mizhokjimi kja ne xoñijomu̷?

¿Pje ra tsjaa e Mizhokjimi kja ne xoñijomu̷?

1. ¿Ja ma nee Mizhokjimi ke ro mimiji yo ntee kja ne xoñijomu̷?

E MIZHOKJIMI ra tsjaa kʼo me na joo kja nu xoñijomu̷. Angeze go dya̷trʼa̷ nu otrʼu̷ bʼe̷zo kʼu̷ mi chju̱u̱ Adán ñe nu nrrinxu kʼu̷ mi chju̱u̱ Eva. E Mizhokjimi go ñʼeme angezebi ro mimibi kja nu jardín kʼu̷ mi ma zo̷o̷. E Mizhokjimi mi nee ke angezebi ro ñʼejebi trʼii, ro tsjaji ne xoñijomu̷ me rga zo̷o̷ ñe ro mbo̷ru̷ji yo añimale (Génesis 1:28; 2:8, 9, 15; jñanrra nu nota 6 kja nu página 208).

2. a) ¿Pjenga ri mango̷ji ke ra za̷dʼa̷ kʼo mama Mizhokjimi? b) ¿Pje ma ntee ra mimiji texe yo paa kja ne xoñijomu̷?

2 ¿Gi ejme ke ra sa̷ja̷ nu paa ma e Jehová ra tsjaa ne xoñijomu̷ me rga zo̷o̷? E Jehová mama ke ra tsjaa ja nzi go mama (Isaías 46:9-11; 55:11). Ja̱a̱, dya bʼu̷bʼu̷ kjo ra tsʼasʼu̷ e Jehová, ra tsjaa texe kʼua ja gua mama nange angeze “pa̱ra̱ pje bi dya̷trʼa̷ ne xoñijomu̷” (Isaías 45:18). E Mizhokjimi nee kʼu̷ ra bʼu̷bʼu̷ ntee kja texe ne xoñijomu̷. ¿Pje ma ntee mi nee e Mizhokjimi kʼu̷ ro minji kja ne xoñijomu̷ ñe janzi paa ro mimiji? Ne Biblia mama ga kjaba: “Yo na jonte [o kʼo a̷ta̷ji Mizhokjimi] ra nga̱ra̱ji kja ne xoñijomu̷ ñe angezeji ra mimiji texe yo paa” (Salmo 37:29; Apocalipsis 21:3, 4).

3. ¿Pje ma trʼo̷nu̷ ri kjaji nange ri so̷dyeji ñe ri tu̱ji?

3 Yo padya nde ri so̷dyeji ñe ri tu̱ji. Bʼu̷bʼu̷ ntee kja ne xoñijomu̷ ke chu̱ji ñe po̷trʼu̷nteji. E Mizhokjimi dya mi nee kʼu̷ ro kjogu̷ ga kjanu kja ne xoñijomu̷. Ngekʼo, ¿pje o kjogu̷ ñe pjenga go kjogu̷kʼo? Ra pa̱ra̱jikʼo ma ra xo̷ru̷ji ne Biblia.

BʼU̸BʼU̸ NAJA KʼU̸ U̸MBʼU̸ MIZHOKJIMI

4, 5. a) ¿Kjo mi bʼu̷bʼu̷ a xu̷trju̷ kʼe kʼijmi kʼu̷ go zopju̷ e Eva kja kʼe jardín Edén? b) Na ntee kʼu̷ na jonte, ¿ja rga so̷o̷ ra mbe̷zhitsje̷ mbe̱ʼe̱?

4 Kja ne Biblia mama kʼu̷ bʼu̷bʼu̷ naja kʼu̷ u̷mbu̷ Mizhokjimi  kʼu̷ “ni chju̱u̱ Satanás kʼu̷ dya joo”. E Satanás mi bʼu̷bʼu̷ a xu̷trju̷ kʼe kʼijmi ma go zopju̷ e Eva kja kʼe jardín Edén (Apocalipsis 12:9; Génesis 3:1). Kʼu̷ mi ñaa dya mi nge kʼe kʼijmi, mi nge e Satanás (jñanrra nu nota 7 kja nu página 208).

5 ¿Ngeje e Mizhokjimi kʼu̷ go dya̷trʼa̷ e Satanás kʼu̷ dya ga joo? ¡Iyo! Mi ngeje na anxe kʼu̷ mi bʼu̷bʼu̷ ajensʼe. Ma e Mizhokjimi ma a̷trʼa̷ ne xoñijomu̷ ja ro mimi e Adán ñe e Eva go mbu̷ru̷ go mbeñe kʼo na sʼoo ngekʼua go mbe̷zhitsje̷ kʼu̷ dya joo (Job 38:4, 7). ¿Ja gua kjogu̷kʼo? Dʼa ntee kʼu̷ na jonte, ¿ja rga so̷o̷ ra potu̷ o pjeñe ñe ra mbu̷ru̷ ra ponu̷? Ma go mimi kʼe ntee dya mi mbe̱ʼe̱. Pe ma ra nee ra mbe̷sʼi kʼo dya nge in tsjaja ñe nrrajmetrjo ra mbeñekʼo, nuʼma ra sa̷ja̷ nu paa ma ra nrroru̷ kʼu̷ dya nge nu tsjaja, ga kjanu ra mbe̷zhitsje̷ mbe̱ʼe̱ (xo̷ru̷ Santiago 1:13-15; jñanrra nu nota 8 kja nu página 210).

6. ¿Pje bo tsjaa kʼe anxe kʼu̷ mi jñetse ke mi u̷mbu̷ e Mizhokjimi?

6 Je ba kjanu ba tsjaa kʼe anxe. Ma e Jehová go nguaru̷ go dya̷trʼa̷ e Adán ñe e Eva, go xipjibi kʼu̷ ro ñʼejebi na punkju̷ chʼii ñe ro mimiji kja texe ne xoñijomu̷ (Génesis 1:27, 28). Po kʼe anxe go mbeñe: “¡Texe yo ntee ra matrʼku̷go̷ ñe ra jye̷ziji ra matrʼu̷ji Mizhokjimi!” Me mi mbentrjokʼo, me mi nee kʼo mi nge nu tsjaja e Jehová. Kʼe anxe mi nee kʼu̷ yo ntee ro matrʼu̷ji angeze, go mbechpe bʼe̷chjine e Eva, ga kjanu bo jyotrʼu̷ (xo̷ru̷ Génesis 3:4, 5). * Ma go tsjakʼo kʼe anxe, go mbe̷zhi Satanás kʼu̷ dya joo, angeze me u̷mbʼu̷ e Mizhokjimi.

7. a) ¿Pjenga go nrru̱u̱ e Adán ñe e Eva? b) ¿Pjenga ri titaji ñe ri tu̱ji?

7 E Adán ñe e Eva dya go dya̷ta̷bi Mizhokjimi, angezebi go zibi kʼe lulu (Génesis 2:17; 3:6). Ngekʼua ma go kjogu̷ yo paa go nrru̱bi ja ba xipjibi e Jehová (Génesis 3:17-19). O trʼii e Adán ñe e Eva xo mi pe̷sʼiji nu nzhubu̷ ñe go nrru̱ji (xo̷ru̷ Romanos  5:12). Nujyo chjenjui nzakja ma ri cha̷ka̷trjo na nrredye, ma xe ri jñuntrʼu̷ xe̷dyinu, ¿ja rga mbedyekʼo? Ra jñetse nu meya kja yo xe̷dyi. Ga kjanu ma e Adán dya go dya̷ta̷ Mizhokjimi go mbe̷sʼi nu nzhubu̷, nutsʼko̷ji kʼu̷ ri trʼizu̷ji angeze, ndeze ma ri teji ri pe̷sʼiji nu nzhubu̷ o nu meya e Adán, ngekʼua ri titaji ñe ri tu̱ji (Romanos 3:23; jñanrra nu nota 9 kja nu página 210).

8, 9. a) ¿Pje mi nee e Satanás kʼu̷ ro ñenchʼe kja o mu̷bʼu̷ e Adán ñe e Eva? b) ¿Pjenga e Jehová dya bo chjotu̷ kʼo dya o dya̷ta̷ji angeze?

8 E Satanás dya nee kʼu̷ ra a̷ta̷ji e Jehová, ngekʼua go tsjaa kʼu̷ e Adán ñe e Eva dya ro dya̷ta̷bi Mizhokjimi. E Satanás mi nee kʼe e Adán ñe e Eva ro ejmebi ke e Jehová na mbe̷chjine, ke dya manda na joo ñe ke dya mi nee kʼu̷ ro mimibi na joo. E Satanás go mama kʼu̷ dya ni jyongo̷ji ra xitsʼko̷ji Mizhokjimi ja rga minji ñe ke e Adán ñe e Eva ro so̷o̷ ro juajnu̷bi ro tsjabi kʼo na sʼoo o kʼo na joo. ¿Pje ro tsjaa e Jehová? Ma ro mbo̷trʼu̷kʼo ro nguaru̷ ndexe kʼo go kjogu̷. Pe ma je ga kjanu ro tsjaa, dya ro so̷o̷ ro jñetse kʼu̷ e Satanás na mbe̷chjine.

9 E Jehová mi so̷o̷ ro chjotu̷kʼo kʼe paa kʼu̷ dya bo dya̷ta̷ji. Pe e Jehová go jye̷zi kʼu̷ yo ntee ro mandatsje̷ji. Ga kjagua ro jñetse kʼu̷ e Satanás na mbe̷chjine ñe kʼu̷ ngextrjo e Jehová so̷o̷ ra mbo̷xku̷ji ra mimiji na joo, nange pa̱ko̷ji na joo. Xe ra pjechijikʼo kja nu xo̷ru̷ 11. ¿Pje so̷o̷ ri mange kʼo go tsjaa e Adán ñe e Eva? ¿Na joo kʼu̷ angezebi go dya̷ta̷bi e Satanás ñe dya go dya̷ta̷bi Mizhokjimi? E Jehová go unu̷ kʼo me ma joo e Adán ñe e Eva. Ma e Mizhokjimi go dya̷trʼa̷ e Adán ñe e Eva dya mi pe̷sʼibi nzhubu̷, mi ma zo̷o̷ nu ja ma mimibi, ma mi pe̷pjibi mi ma joo ma zo̷bi. Pe e Satanás dya pje bi unu̷ kʼo ma joo e Adán ñe e Eva. Ma rgui ngetsʼkʼe e Adán ñe e Eva, ¿pje rgui tsjage?

10. ¿Pje nge kʼo so̷o̷ ra kjaji nzi dʼazgo̷ji?

10 Yo padya, nzi nazgo̷ji so̷o̷ ra juajnu̷ji kjo nge kʼu̷ ra mandazu̷ji. So̷o̷ ra je̷ziji ke ra mandazu̷ji e Jehová ngekʼua xe ra bʼu̷ntrjoji, ga kjanu ra jñetse ke e Satanás na mbe̷chjine.  O so̷o̷ ra je̷ziji ke e Satanás ra mandazu̷ji (Salmo 73:28; xo̷ru̷ Proverbios 27:11). * Dya nrra na punkju̷ ntee a̷ta̷ji Mizhokjimi. Angeze dya nge kʼu̷ manda kja ne xoñijomu̷. Pe ma dya ngeje Mizhokjimi, ¿kjo ngejema?

 ¿KJO NGE KʼU̸ MANDA KJA NE XOÑIJOMU̸?

Ma texe yo gobierno dya ri nge o kjaja e Satanás, dya ro xipji ro unu̷ e Jesús

11, 12. a) ¿Pje jitsʼko̷ji ma e Satanás go jichi e Jesús kʼo mi pe̷sʼi? b) ¿Pje mama ne Biblia kjo nge kʼu̷ manda kja ne xoñijomu̷?

11 E Jesús mi pa̱ra̱ kjo nge kʼu̷ manda kja ne xoñijomu̷. Dʼa nu paa, e Satanás o jichi e Jesús “texe yo jñiñi kja ne xoñijomu̷, kjana ñe texe kʼo me na zo̷o̷ ñe me na joo kʼo mi pe̷sʼi yo jñiñi”. Nuʼma e Satanás go xipji e Jesús: “Nu ma ri ndu̷ñijomu̷ge kja in jmigo̷ ri matrʼku̷go̷, ra dʼakʼu̷go̷ kʼu̷ ri mandage texe kja yo jñiñi yo rra̱ jitsʼigo̷dya” (Mateo 4:8, 9; Lucas 4:5, 6). Mbeñe na tsʼinrrajme, ma e Satanás dya ri manda kja ne xoñijomu̷, dya pje ro jichi e Jesús. Nrrexe yo manrro kʼu̷ manda kja ne xoñijomu̷ a̷ta̷ji e Satanás.

12 Po i mange: “¿Ja rga so̷o̷ ra manda e Satanás kja ne xoñijomu̷ ma e Mizhokjimi Jehová go dya̷trʼa̷ texe ñe me na ze̷zhi?” (Apocalipsis 4:11). E Jesús go mama ke e Satanás “manda kja ne xoñijomu̷” (Juan 12:31; 14:30; 16:11). Nu apóstol Pablo go mama ke e Satanás “ngeje o mizhokjimi texe yo bʼu̷bʼu̷ kja ne xoñijomu̷” (2 Corintios 4:3, 4TNM). Nu apóstol Juan xo go dyopju̷ ga kjaba: “Kʼo ntee kʼo dya enchʼe o mu̷bʼu̷ e Jesucristo, je nge e Satanás kʼu̷ dya joo kʼu̷ mandakʼo” (1 Juan 5:19).

¿JA RGA CHJORU̸ YO KJAA E SATANÁS KJA NE XOÑIJOMU̸?

13. ¿Pjenga ri nee ra minko̷ji kja nu dʼadyo xoñijomu̷?

13 Kja ne xoñijomu̷ nu ja ri ka̱rgo̷ji, ma ga kjogu̷ yo paa xenrra na sʼonteji yo ntee. Yo ntee chu̱ji, jyotrʼu̷ji in minte, dya jizhiji kʼo na kjuana, kjaji kʼo na sʼoo ngekʼua ra nrro̱nji merio ñe me kjapu̷ji ra supjre yo ntee. Yo ntee manji ra jokʼu̷ji yo nrrumu̷, pe dya so̷o̷ ra tsjaji. Dya kja ra mezhe ma e Mizhokjimi ra kjuatu̷ nrrexe yo na sʼoo kja ne xoñijomu̷, ra tsjakʼo kja nu Armagedón. Ga kjanu ra minji na joo kja ne xoñijomu̷ (Apocalipsis 16:14-16; jñanrra nu nota 10 kja nu página 210).

14. ¿Kjo go ñʼeme Mizhokjimi ra manda kja o Reino? ¿Pje mama ne Biblia kʼu̷ ra tsjaa e Jesús kja o Reino Mizhokjimi?

14 E Jehová o ñʼeme e Jesucristo ra manda kja nu Reino  kʼu̷ bʼu̷bʼu̷ ajensʼe. Ya me mezhe ma go dyopju̷ji kja ne Biblia kʼu̷ e Jesús ra manda ñe ra ngeje na “Príncipe kʼu̷ na jonte”, dya ra nguaru̷ rga manda (Isaías 9:6, 7). E Jesús go xipji o discípulo kʼu̷ ro dyo̷tu̷ji Mizhokjimi: “Penkejme in reino ngekʼo nrrexe yo ka̱ra̱ ajensʼe ñe kja ne xoñijomu̷ ra dya̷tkʼa̷ji” (Mateo 6:10TNM). Kja nu xo̷ru̷ 8 ra nuji pje ra tsjaa e Mizhokjimi ngekʼua ra kjuatu̷ yo manrro ñe ra manda nu gobierno angeze (xo̷ru̷ Daniel 2:44). * Ma ra kjogu̷kʼo, nu Reino Mizhokjimi ra tsjaa ne xoñijomu̷ me rga zo̷o̷ (jñanrra nu nota 11 kja nu página 211).

NA DʼADYO XOÑIJOMU̸

15. ¿Pje nee ra mama ne jñaa “na xoñijomu̷ nuevo”?

15 Ne Biblia mama ga kjaba: “Ra bʼu̷bʼu̷ na jensʼe nuevo, kʼua ja nzi ba mama Mizhokjimi. Xo ñe na xoñijomu̷ nuevo” ñe “texe kʼo ra tsjajinu, nde na jokʼo” (2 Pedro 3:13; Isaías 65:17). Ne jñaa “xoñijomu̷” dya nge nu xoñijomu̷ nu ja ri bʼu̷nji, nge yo ntee yo ka̱ra̱ba (Génesis 11:1). Ngekʼua nu jñaa “na xoñijomu̷ nuevo”, nee ra mama kʼu̷ nge yo ntee kʼu̷ a̷ta̷ji Mizhokjimi ñe pjo̷sʼu̷kʼo.

16. ¿Pje ra unu̷ Mizhokjimi yo ntee kʼu̷ ra mimiji kja ne xoñijomu̷ kʼu̷ me rga zo̷o̷? ¿Pje ra kjaji ngekʼua ra dyaku̷jikʼo?

16 E Jesús go mama kʼu̷ texe yo ra mimiji kja ne dʼadyo xoñijomu̷, ra ‘unu̷ji kʼu̷ rga bʼu̷bʼu̷tjoji’ (Mateo 19:29). ¿Pje ra kjaji ngekʼua ra dyaku̷jiyo e Mizhokjimi? Xo̷ru̷ Juan 3:16 ñe 17:3 ngekʼua ri cho̷trʼu̷ pje ri tsjage. Ra xo̷ru̷ji kja ne Biblia ja rga mimi yo ntee kja ne dʼadyo xoñijomu̷.

17, 18. ¿Ja ga pa̱rgo̷ji ke yo ntee ra mimiji na joo kja ne xoñijomu̷ ñe dya pje ra kjogu̷ji?

17 Yo na sʼonte, yo kjaji chu̱ʼu̱ ñe yo po̷trʼu̷nte dya kja ra bʼu̷nji. Kja ne xoñijomu̷ dya kja ra bʼu̷bʼu̷ yo na sʼonte (Salmo  37:10, 11). E Mizhokjimi ra “kjuatu̷ yo chu̱ʼu̱ kʼu̷ kjaji kja ne xoñijomu̷” (Salmo 46:9; Isaías 2:4). Yo ntee yo ra nga̱ra̱ji kja ne xoñijomu̷ ra dya̷ta̷ji ñe ra sʼiyaji Mizhokjimi. Texe yo ntee ra minji na joo texe yo paa ñe dya kja ra chu̱ji (Salmo 72:7).

18 Yo matrʼu̷ji e Jehová dya pje ra kjogu̷ji ra mimiji na joo. Mi jingua ma kʼo mi menzumu̷ a Israel mi a̷ta̷ji e Jehová, dya pje mi kjogu̷ji nange e Jehová mi pjo̷sʼu̷kʼo (Levítico 25:18, 19). Kja nu dʼadyo xoñijomu̷, dya kjo ra pitsʼko̷ji ñe dya kjo ra su̱ji. Texe yo paa ra ka̱rgo̷ji na joo (xo̷ru̷ Isaías 32:18; * Miqueas 4:4). *

19. ¿Pjenga ri ejmeji ke e Mizhokjimi ra tsjaa kʼu̷ ra bʼu̷bʼu̷ na punkju̷ jñona kja ne xoñijomu̷ kʼu̷ me rga zo̷o̷?

19 Ra bʼu̷bʼu̷ na punkju̷ kʼo ra siji. “Me ra jya̷ʼa̷ o semia kja ne xoñijomu̷; kja yo trʼeje xo ra jya̷sʼa̷ kʼo ra sigo̷ji. Me ra ngisʼi lulu ra jñetseji nzakja ma nzha̷jna̷ nu Líbano ñe kja yo nrrajñiñi ra iji yo ntee nzakja ma nzha̷jna̷ yo nrra̷jna̷ kja ne xoñijomu̷” (Salmo 72:16). E Jehová, “in Mizhokjimigo̷ji ra mbo̷xku̷go̷ji” ñe “kja ne xoñijomu̷ ra jya̷ʼa̷ kʼo ra siji” (Salmo 67:6).

20. ¿Ja ga pa̱rgo̷ji ke me rga zo̷trjo nu xoñijomu̷?

20 Texe nu xoñijomu̷ me rga zo̷o̷. Yo ntee ra mbe̷sʼi ngumu̷ ñe jardín kʼu̷ me rga zo̷o̷ (xo̷ru̷ Isaías 65:21; * Apocalipsis 11:18). Texe nu xoñijomu̷ me rga zo̷o̷ ja ma ngeje kʼe jardín Edén. Texe yo paa e Jehová ra dyaku̷ji yo rni jyongo̷ji. Ne Biblia mama: “Gi kʼuana in dye̷e̷ ñe gi unu̷ kʼo nee nrrexe yo bʼu̷bʼu̷” (Salmo 145:16).

21. ¿Ja ga pa̱rgo̷ji ke yo añimale ñe yo ntee ra nga̱ra̱ji na joo?

 21 Yo añimale ñe yo ntee ra nga̱ra̱ji na joo. Yo añimale dya kja pje ra tsjapu̷ji yo ntee. Yo padya ka̱ra̱ yo añimale yo na sate, pe kja nu xoñijomu̷ kʼu̷ me rga zo̷o̷ yo tsʼitrʼi dya ra zu̱jikʼo, dya pje ra kjogu̷ji (xo̷ru̷ Isaías 11:6; * 65:25). *

22. ¿Ja rga mbo̷sʼu̷ e Jesús kʼo ntee kʼo ri so̷dye?

22 Dya kja ra so̷dyeji. Ma e Jesús mi bʼu̷bʼu̷ kja ne xoñijomu̷, angeze go jokʼu̷ na punkju̷ ntee kʼo mi so̷dye (Mateo 9:35; Marcos 1:40-42; Juan 5:5-9). Ma ra manda e Jesús kja o Reino Mizhokjimi, ra jokʼu̷ texe kʼo ntee kʼo ri so̷dye. Dya kjo ra mama: “Ri so̷dyego̷” (Isaías 33:24; 35:5, 6).

23. ¿Ja rga mbo̷sʼu̷ Mizhokjimi kʼo ya nrru̱u̱?

23 E Mizhokjimi ra xosu̷ kʼo ntee kʼo ya nrru̱u̱. E Mizhokjimi mama kʼe na kjuana ra xosu̷ na punkju̷ ntee kʼo ya nrru̱u̱. “Ri kreogo̷ kʼu̷ o mama Mizhokjimi ra teʼe kʼo ya ndu̱u̱, kʼo o tsjaa na joo ñe kʼo o tsjaa na sʼoo” (xo̷ru̷ Juan 5:28, 29; Hechos 24:15).

24. ¿Ja gi so̷ge ma gi pa̱rge ke ra so̷o̷ ri minkʼe kja ne xoñijomu̷ kʼu̷ me rga zo̷o̷?

24 Nrrexezu̷ji so̷o̷ ra juajnu̷ji ma ri nego̷ji ra pa̱ra̱ji e Jehová ñe ra pe̷piji angeze o ngextrjo ra kjago̷ji kʼo ri nego̷ji. Ma ra juajnu̷ji ra kjaji kʼo nee e Jehová, ra so̷o̷ ra mimiji kja nu xoñijomu̷ kʼu̷ me rga zo̷trjo. Ma na bʼe̷zo go dyo̷tu̷ e Jesús dya ro jyombeñe ma ro nrru̱u̱, e Jesús go xipji: “Ix na kjuana ri bʼu̷nkʼe ko nutsʼko̷ kja ne xoñijomu̷ ma me rga zo̷o̷” (Lucas 23:43TNM). Xe ra pjechiji ja ga kjaa e Jesucristo ñe pje ra tsjaa ngekʼua ra za̷dʼa̷ kʼo mama Mizhokjimi.

^ par. 6 Génesis 3:4, 5: “Nuʼma, kʼe kʼijmi o xipji nu ndinxu: ‘Ix na kjuana dya ri chu̱bi. Nange e Mizhokjimi pa̱ra̱ na joo ke ma ri sibi yo kisʼi kja ne zaʼa, ra xogu̷ in cho̷gebima ñe ri pje̷zhibi nzakja Mizhokjimi, ri pa̱ra̱bi kʼo na joo ñe kʼo na sʼoo’”.

^ par. 10 Proverbios 27:11: “In chʼitsʼko̷, tsjage kʼo na joo ngekʼua ra ma̷kjo̷ nange bʼu̷bʼu̷ kʼu̷ me nugo̷ na u̷u̷, ngekʼua ma pje ra xitsi ra so̷o̷ ra trju̷ntʼu̷”.

^ par. 14 Daniel 2:44: “Ma xe ri manda kʼo reykʼo, e Mizhokjimi ajensʼe ra ñʼesʼe naja kʼu̷ ra manda kja o reino, dya ra nguaru̷ rga manda. Kʼe reino ra chjotu̷ texe kʼo dyaja reino. Dya kjo xe ra bʼu̷bʼu̷ kʼu̷ ra manda, ngextrjo o reino Mizhokjimi ra manda”.

^ par. 18 Isaías 32:18: “Yo in ntego̷ ra mimiji na joo kja o ngumu̷ji, ra soyaji ñe dya pje ra kjogu̷ji kʼo na sʼoo”.

^ par. 18 Miqueas 4:4: “Nzi na ntee ra mimi ja neʼe o zaʼa kʼo kisʼi uva ñe kja o zaʼa kʼo kisʼi higo. Dya ra zu̱ji kʼo dyaja ntee. Ngejyo go mama e Jehová kʼu̷ manda yo xundaro”.

^ par. 20 Isaías 65:21: “Ra jya̷bʼa̷ji ngumu̷ nu ja ra mimiji, ra ngamaji viña ñe ra ziji kʼo lulu”.

^ par. 21 Isaías 11:6: “Nu lobo me na joo rga dyoru̷ na nrrajme a jmii nu tsʼime, nu tsʼichibo me na joo rga dyobʼu̷ a jmii nu leopardo, nu kʼelo, nu león ñe yo añimale kʼu̷ na pii me na joo rga nga̱ra̱ji; dʼa tsʼitrʼi ra so̷o̷ ra mbo̷ru̷kʼo”.

^ par. 21 Isaías 65:25: “‘Nu lobo me na joo rga dyoru̷bi nu tsʼime, nu león ra zaa paxa nzakja nu nzhu̷nu̷. Kʼo kʼijmi ra zii o xijomu̷. Nrrexeji dya kja ra tsjaji kʼo na sʼoo kja in chʼeje kʼu̷ me santo’, eñe e Jehová”.