Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 5

Me ni mubi ja ba ngu̷sku̷ji e Diosi

Me ni mubi ja ba ngu̷sku̷ji e Diosi

1, 2. a) ¿Pje mbe kʼo kjapu̷ me ni mubi ma pje ra dyakʼu̷ji? b) ¿Pje o dyaku̷ji Mizhokjimi ke xenrra ni mubi?

¿I MBEÑE pje nge kʼo o dyakʼu̷ji ke me na joo? Dya ni jyodʼu̷ ra ngontrʼu̷ji na mizhi ma pje kʼo ra dyakʼu̷ji. Me na mubi kʼo dyakʼu̷ji ma nge kʼu̷ ni jyonkʼu̷ ñe ma kjakʼu̷ ri ma̷ja̷. Ma ra dyakʼu̷ji, me ri jyodʼu̷ ja rgi unu̷ po̷jo̷ kʼe ntee.

2 Texe kʼo o dyaku̷ji Mizhokjimi, bʼu̷bʼu̷ naja ke xenrra ni jyongu̷ji ñe ke me ni mubi. Nuba kja ne xo̷ru̷, ra pjechiji ke e Jehová go pejñe o Tʼii kʼu̷ ngeje e Jesucristo ngekʼua so̷o̷ ra mimiji texe yo paa (xo̷ru̷ Mateo 20:28). E Jehová me sʼiyazgo̷ji ngekʼua go pejñe e Jesús kja ne xoñijomu̷ ro ne̱ ndu̱u̱ ñe ro ngu̷xku̷ji kja ne nzhubu̷ ngekʼua dya kja ra tu̱ji.

¿PJENGA MI JYODʼU̸ RO NGU̸SKU̸JI?

3. ¿Pjenga tu̱u̱ yo ntee?

3 Ma e Mizhokjimi go pejñe o tʼii kja ne xoñijomu̷ o ngu̷xku̷ji kja nu e nzhubu̷ ngekʼua dya kja ra tu̱ji (Efesios 1:7). Ra xitsʼi pjenga mi jyodʼu̷ kjo ro ngu̷xku̷ji. Ya kjogu̷ na punkju̷ kje̷e̷ ma e Adán ñe e Eva go mimibi kja kʼe jardín Edén, angezebi go tsjabi kʼo na sʼoo ngekʼua o mbe̷sʼibi nzhubu̷, kjanu o ndu̱bi. E Adán ñe e Eva o zoku̷zu̷ji e nzhubu̷ ngekʼua ri tu̱ji nzakja angezebi (jñanrra nu nota 9 kja nu página 210).

4. ¿Kjo mi ngeje e Adán? ¿Ja ma mimi angeze?

 4 E Jehová go dya̷trʼa̷ nu otrʼu̷ bʼe̷zo kʼu̷ mi chju̱u̱ Adán, go unu̷ kʼo me ma mubi. E Adán dya mi pe̷sʼi nzhubu̷, me ma joo ma mbeñe, dya mi so̷dye, dya mi tita ni xo ro ndu̱u̱. E Jehová o dya̷trʼa̷ e Adán ngekʼua mi ngeje o trʼii (Lucas 3:38). E Jehová pama mi ñabi e Adán. E Mizhokjimi go xipji e Adán pje mi tebʼe ro tsjaa angeze ñe go unu̷ na bʼe̷pji kʼu̷ ro tsjapu̷ ro ma̷ja̷ (Génesis 1:28-30; 2:16, 17).

5. ¿Pje nee ra mama ke e Mizhokjimi go dya̷trʼa̷ e Adán ja ma kjaa angeze?

5 E Mizhokjimi go dya̷trʼa̷ e Adán ja ma kjaa angeze (Génesis 1:27). Ngekʼua e Adán mi sʼiya o minte, me mi pa̱ra̱, ma jonte ñe ma ze̷zhi. E Adán dya mi chjenjui nzakja dʼa máquina, angeze mi so̷o̷ ro juajnu̷ pje ro tsjaa. E Mizhokjimi go dya̷trʼa̷ e Adán ngekʼua mi so̷o̷ ro juajnu̷ ro tsjaa kʼo na joo o kʼo na sʼoo. Ma e Adán ro juajnu̷ ro dya̷ta̷ Mizhokjimi, ro so̷o̷ ro mimi ndexe yo paa kja nu xoñijomu̷ kʼu̷ ma zo̷o̷.

6. ¿Pje go bʼe̷zhi e Adán ma dya kja go dya̷ta̷ Mizhokjimi?

6 Ma e Adán dya go dya̷ta̷ Mizhokjimi go tsjaa kʼo na sʼoo. Go za̷dʼa̷ ja nzi ba mama Mizhokjimi kʼu̷ ro ndu̱u̱ ñe go bʼe̷zhi ndexe kʼo mi pe̷sʼi. Angeze dya kja mi jobi e Jehová, dya kja so̷o̷ ro mimi ndexe yo paa ñe go pjongu̷ji ja mi bʼu̷bʼu̷ (Génesis 3:17-19).

7, 8. ¿Pje o kjogu̷zu̷ji nange e Adán dya kja o dya̷ta̷ Mizhokjimi?

7 Ma e Adán ñe e Eva dya go dya̷ta̷bi Mizhokjimi, dya kja mi bʼu̷bʼu̷ kjo xe ro mbo̷sʼu̷bi. E Adán go tsjaa kʼo ma sʼoo “ngekʼua je ba tekʼua e nzhubu̷ kja ne xoñijomu̷. Je ga kjanu ba mbu̷ru̷ kʼu̷ ri tu̱ji. Ngekʼuadya, nde ri tu̱ji, nangeje nde ri kjaji kʼo na sʼoo” (Romanos 5:12). Ma e Adán dya kja o dya̷ta̷ Mizhokjimi o  mbe̷pi e nzhubu̷ nzakja kʼu̷ ro ngeje o “jmuʼu”, dya ngextrjo angeze, xo ñe texe kʼo o trʼii kʼo ro ñʼeje ngekʼua ba nrru̱ji (Romanos 6:16). ¿Bʼu̷bʼu̷ kjo ra ngu̷xku̷ji? Ja̱a̱, bʼu̷bʼu̷ naja.

8 Dya mi bʼu̷bʼu̷ na ntee kʼu̷ ro ngontrʼu̷ texe kʼo na sʼoo kʼo go tsjaa e Adán, ngekʼua e Jehová go ñʼeme naja kʼu̷ ro ngontrʼu̷ kʼe nzhubu̷ kʼu̷ go zoku̷zu̷ji e Adán ngekʼua dya kja ra tu̱ji. Ra pjechiji ja ba tsjaa e Jehová ngekʼua ro ngu̷xku̷ji ñe ra nuji ja ga mbo̷xku̷jikʼo.

¿PJE O TSJAA E JEHOVÁ NGEKʼUA RO NGU̸XKU̸JI?

9. ¿Ja rgua ngontrʼu̷ji kʼo go tsjaa e Adán?

9 Dya bʼu̷bʼu̷ na ntee kʼu̷ ro so̷o̷ ro nzhoku̷zu̷ji kʼo o bʼe̷zhi e Adán ma o mbe̷sʼi nzhubu̷, ¿pjenga? Nangeje texezu̷ji ri pe̷sʼiji nzhubu̷ (Salmo 49:7, 8). Ngextrjo na ntee kʼu̷ dya ro mbe̷sʼi nzhubu̷ ro so̷o̷ ro ngontʼu̷ kʼo o tsjaa e Adán. Ke ntekʼu̷, mi nge e Jesús kʼu̷ dya mi pe̷sʼi nzhubu̷ ñe “o pa̷tko̷ji ba ndu̱u̱ ba ngontʼku̷ji kʼo na sʼoo” (1 Timoteo 2:6). Kʼo go ngontrʼu̷ e Jesús ixmi chjentjui kʼo o bʼe̷zhi e Adán.

10. ¿Pe go tsjaa e Jehová ngekʼua ro ngu̷xku̷ji?

10 ¿Ja rgua ngu̷xku̷ji e Jehová? Angeze o nda̷ja̷ kja ne xoñijomu̷ o trʼii kʼu̷ me mi sʼiya. Nujnu, mi nge o trʼii kʼu̷ otrʼu̷ go dya̷trʼa̷, mi chju̱u̱ Jesús (1 Juan 4:9, 10). E Jesús o nee ro e̱je̱ kja ne xoñijomu̷, ngekʼua go jye̷zi ajensʼe nu ja mi bʼu̷bʼu̷bi nu Tata (Filipenses 2:7NTD). Ma e Jehová o nda̷ja̷ e Jesús kja ne xoñijomu̷ o tsjapu̷ ro ndunte na ndinxu ngekʼua ma o teʼe e Jesús dya mi pe̷sʼi nzhubu̷ (Lucas 1:35).

E Jehová o unu̷ o trʼii ke me mi sʼiya ngekʼua ro ngu̷xku̷ji

11. ¿Ja rgua so̷o̷ ro ngu̷xku̷ji ri texeji natrjo ntee?

11 Kʼu̷ otrʼu̷ bʼe̷zo kʼu̷ mi chju̱u̱ Adán dya go dya̷ta̷ e  Jehová, o zoku̷zu̷ji e nzhubu̷ ngekʼua dya kja so̷o̷ ra mimiji texe yo paa. ¿Ro bʼu̷bʼu̷ na ntee ke so̷o̷ ro ngu̷xku̷ji? Ja̱a̱ (xo̷ru̷ Romanos 5:19). E Jesús dya mi pe̷sʼi nzhubu̷, go unu̷ o bida ngekʼua ba ngu̷xku̷ji (1 Corintios 15:45). Kʼo go tsjaa e Jesús o ngu̷sʼbʼu̷ o nzhubu̷ texe yo o trʼii e Adán ngekʼua dya kja ra ndu̱ji (1 Corintios 15:21, 22NTD).

12. ¿Pjenga go se̷chi na punkju̷ e Jesús?

12 Kja ne Biblia mama kʼu̷ e Jesús go se̷chi na punkju̷ ndumu̷ ma go mbo̷trʼu̷ji. Go ndasʼu̷ji na punkju̷, go nda̷tʼa̷ji kja zaʼa ñe go zichʼi na punkju̷ ba ndu̱u̱ (Juan 19:1, 16-18, 30TNM). ¿Pjenga go se̷chi na punkju̷ e Jesús? Go se̷chi nange e Satanás go mama ke dya ro bʼu̷bʼu̷ na ntee ke ro dya̷ta̷ Mizhokjimi ma ro kjogu̷ ndumu̷. Kʼo go tsjaa e Jesús xo jñetse ke na ntee kʼu̷ dya pe̷sʼi nzhubu̷ ra so̷o̷ ra dya̷ta̷ Mizhokjimi ma ra kjogu̷ ndumu̷ ke na sʼe̷zhi. ¡Me go ma̷ja̷ e Jehová ma go jñanrra kʼo go tsjaa e Jesús! (Proverbios 27:11; jñanrra nu nota 15 kja nu página 213).

13. ¿Ja gua ngu̷xku̷ji e Jesús?

13 ¿Ja gua ngontrʼu̷ji in nzhubu̷ji? Kʼe paa 14 ne zana nisán kja nu kje̷e̷ 33 kja nu calendario judío, e Jehová go jye̷zi ke kʼo ntee kʼo mi u̷mbu̷ji e Jesús ro mbo̷trʼu̷ji (Hebreos 10:10). Ma go kjogu̷ jñii paa kʼu̷ bi ndu̱u̱ e Jesús e Jehová go xosu̷, pe dya kja mi ngeje na bʼe̷zo mi ngeje na espíritu. E Jesús go nzhogu̷ ajensʼe ngekʼua ro so̷o̷ ro ngontrʼu̷ ne nzhubu̷ (Hebreos 9:24). Nuʼma e Mizhokjimi na joo ba jñanrra ke e Jesús o unu̷ o bida ngekʼua ro ngu̷xku̷ji. Nudya ke ya ngontrʼu̷ in nzhubu̷ji so̷o̷ ra mimiji texe yo paa (xo̷ru̷ Romanos 3:23, 24).

 ¿JA GA MBO̸XKU̸JI KʼO GO TSJAA E JESÚS?

14, 15. ¿Pje ra kjaji ngekʼua ra perdonaozu̷ji Mizhokjimi?

14 Ra xo̷ru̷ji ja ga mbo̷xku̷jidya kʼo go dyaku̷ji e Mizhokjimi ñe ja rga mbo̷xku̷ji yo paa yo ba e̱je̱.

15 Ra perdonaozu̷ji in nzhubu̷ji. Na sʼe̷zhi ra kjaji kʼo na joo. Ri kjaji kʼo na sʼoo ñe dya ri pjo̷nguenrraji ma ri ñaji (Colosenses 1:13, 14NTD). ¿Ra perdonaozu̷ji Mizhokjimi ma ra kjaji kʼo na sʼoo? Ja̱a̱, pe ngextrjo ma ra nzhogu̷ in mu̷bʼu̷ji, dya kja ra kjaji kʼo na sʼoo ñe ra o̷tu̷ji e Jehová ko texe in mu̷bʼu̷ji kʼu̷ ra perdonaozu̷ji. Ma ra kjaji ga kjanu, ra enchʼe in mu̷bʼu̷ji ke ra perdonaozu̷ji Mizhokjimi (1 Juan 1:8, 9).

16. ¿Pje ra kjaji ngekʼua dya ra so̷xi in mu̷bʼu̷ji?

16 Dya ra so̷xi in mu̷bʼu̷ji nange e Diosi ra sa̷kjo̷ji. Ma ri kjaji yo na sʼoo bʼu̷ma me ri so̷xiji, ri so̷go̷ji ke dya kja ni mubizu̷ji ñe ke dya kja so̷o̷ ra kjaji yo na joo. Pe dya ngeje ga kjanu, dya ra je̷ziji ra to̱gu̷ in mu̷bʼu̷ji. Ma ra o̷tu̷ji e Jehová, angeze ra dya̷ra̷ yo ra xipjiji ñe ra perdonaozu̷ji (Hebreos 9:13, 14). E Jehová nee ke ra xipjiji yo ndumu̷ yo ri pe̷sʼiji ñe yo kʼaxku̷ji ra kjaji yo na joo (Hebreos 4:14-16). Ga kjanu dya ra so̷xi in mu̷bʼu̷ji.

17. ¿Pje ra dyaku̷ji Mizhokjimi nangeje e Jesús go ndu̱u̱?

17 Ri tebʼeji ra mimiji ndexe yo paa. “Nu kʼu̷ ra ndu̷ntʼu̷ axu̷tju̷ e nzhubu̷, ra ndu̱kʼu̷. Ngeje kʼu̷ je tsʼo̱ʼtʼu̷kʼu̷. Nu kʼu̷ tju̷ntʼu̷ axu̷tju̷ e Jesucristo kʼu̷ in Jmuji, sido ra bʼu̷bʼu̷tjokʼu̷, dya ra ndu̱u̱. Ngeje kʼu̷ je unu̷ Mizhokjimi” (Romanos 6:23). E Jesús go ndu̱u̱, ngekʼua dya kja ra so̷dyego̷ji ñe ra mimiji texe yo paa (Apocalipsis 21:3, 4). Pe ¿pje ra kjaji ngekʼua e Jehová ra dyaku̷jiyo?

 ¿GI EJME KE E JESÚS O NDU̱U̱ BA MBO̸XKU̸JI?

18. ¿Pjenga ri pa̱rgo̷ji ke me sʼiyazu̷ji e Jehová?

18 Mbeñe ja gi so̷ge ma ra dyakʼu̷ji kʼo me na joo. Pe dya kjo pje dʼaku̷ji nzakja kʼo go dyaku̷ji Mizhokjimi Jehová, ngekʼua me ra unu̷ji po̷jo̷ angeze. Kja Juan 3:16 mama ga kjaba: “Mizhokjimi me sʼiya texe yo ka̱ra̱ kja ne xoñijomu̷. Ngekʼua ba nzho̷o̷ kʼu̷ nu Tʼii kʼu̷ natjo”. Ja̱a̱, e Jehová me sʼiyazu̷ji ngekʼua ba unu̷ o tʼii ro ndu̱u̱ ngekʼua ro ngu̷xku̷ji. Xo ri pa̱rgo̷ji ke e Jesús me sʼiyazu̷ji ngekʼua o ne̱ pa̷tko̷ji ba ndu̱u̱ (Juan 15:13). Texe kʼo o tsjaa e Jehová ñe e Jesús ngekʼua ro ngu̷xku̷ji, ra mbo̷xkʼu̷ ri jñuntrʼu̷ kja in mu̷bʼu̷ ke angezebi me sʼiyatsʼu̷ (Gálatas 2:20TNM).

Ma xe ra pa̱rgo̷ji e Jehová, ra joji na joo angeze ñe me ra sʼiyaji

19, 20. a) ¿Pje ri tsjaa ngekʼua ri jogebi na joo e Jehová? b) ¿Pje ri tsjaa ngekʼua ra jñetse ke gi ejme ke e Jesús o ngu̷xku̷ji?

19 Nudya ke ya gi pjechi ke e Mizhokjimi me sʼiyazu̷ji, ¿pje ri tsjaa ngekʼua ri jogebi Mizhokjimi? Dya so̷o̷ ri sʼiyage na ntee ke dya gi pa̱ra̱. Ngekʼua kja Juan 17:3 mama ke ni jyongu̷ji ra pa̱rgo̷ji ja ga kjaa e Jehová. Ma ri pa̱rge e Jehová, me ri sʼiya angeze, ri ñee ri tsjaa yo mama ñe ri jogebi na joo. Dya ri jye̷zi ri xo̷ru̷ ne Biblia ngekʼua ri pa̱rge ja ga kjaa e Jehová (1 Juan 5:3).

20 Ñenchʼe kja in mu̷bʼu̷ ke e Jesús o ngu̷xku̷ji. Ne Biblia mama ga kjaba: “Nu kʼu̷ enchʼe o mu̷bʼu̷ e Jesucristo kʼu̷ nu Trʼii Mizhokjimi, ra bʼu̷bʼu̷tjo” (Juan 3:36). ¿Pje ra kjaji ngekʼua ra jñetse ke ri enchʼeji kja in mu̷bʼu̷ji e Jesucristo? Ra kjaji kʼo o jitsʼko̷ji e Jesús (Juan 13:15). Dya ngextrjo ra manji ke ri enchʼeji kja in mu̷bʼu̷ji e Jesús, xe bʼu̷bʼu̷ pje ni jyodʼu̷ ra kjaji ngekʼua ra ejmeji ke angeze o ngu̷xku̷ji. Kja Santiago 2:26 mama ga kjaba:  “Na ntee, ma dya kjaa kʼo na joo, nuʼma, dya xo ni mubima kʼu̷ ni mama kreo”.

21, 22. a) ¿Pjenga na joo ke tsje̷ma ra mbeñeji kʼe paa ma o ndu̱u̱ e Jesús? b) ¿Pje ra nuji kja nu xo̷ru̷ 6 ñe 7?

21 Ra jmuru̷ji ra mbeñeji ma go ndu̱u̱ e Jesús. Kʼe xomu̷ ma dya bʼe mi tu̱u̱ e Jesús o mama ke mi jyodʼu̷ ro mbeñeji ma ro ndu̱u̱. Tsje̷ma ri jmurgo̷jme ngekʼua ri mbeñejme kʼe paa ma go ndu̱u̱ e Jesús (1 Corintios 11:20; Mateo 26:26-28). E Jesús dya mi pe̷sʼi nzhubu̷, angeze mi nee ke ro mbeñeji kʼe paa ma go unu̷ o bida ba ngu̷xku̷ji. Angeze o mama: “Dya ri jyombeñe ri tsjagejinu ngekʼua ri mbenzgo̷ji” (xo̷ru̷ Lucas 22:19). Ma ri maa nu ja ri jmurgo̷jme kʼe paa ma ri mbeñejme ma go ndu̱u̱ e Jesús, ra jñetse ke gi enchʼe kja in mu̷bʼu̷ kʼo go tsjaa angeze ñe ke e Jehová me sʼiyazu̷ji (jñanrra nu nota 16 kja nu página 214).

22 Me na mubi kʼo o dyaku̷ji Mizhokjimi ma go ngu̷xku̷ji (2 Corintios 9:14, 15). Kʼo o tsjaa e Mizhokjimi xo ra mbo̷sʼu̷ na punkju̷ ntee kʼo ya ndu̱u̱. Kja nu xo̷ru̷ 6 ñe 7 ra nuji ja ga kjaa.