Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 4

¿Kjo ngeje e Jesucristo?

¿Kjo ngeje e Jesucristo?

1, 2. a) ¿Ma i pa̱rge pje ni chju̱u̱ yo ntee yo pje̷zhi na nojo nee ra mama ke xo i pa̱rge ja ga kjaji? b) ¿Pje manji yo ntee kjo ngeje e Jesucristo?

KJA ne xoñijomu̷ bʼu̷bʼu̷ ntee kʼo pje̷zhi me na nojo, bʼu̷ma gi unu̷ nguenrra ke na punkju̷ ntee pa̱ra̱ji pje ni chju̱u̱. Po xo ñetsʼkʼe gi pa̱rge pje ni chju̱ji, pe nujyo dya nee ra mama ke i pa̱rge ja ga ngeji, pje kjaji ñe ja ga mimiji.

2 Po gi unkʼe nguenrra ke na punkju̷ ntee manji pa̱ra̱ji e Jesucristo. Zo̷ ya kjogu̷ na 2.000 kje̷e̷ ma mi bʼu̷bʼu̷ kja ne xoñijomu̷, xe na̷dʼa̷trjoji. Pe dya pa̱ra̱ji ja ba mimi, pje go tsjaa ñe ja ma ngeje. Na punkju̷ ntee manji me ma jonte, bʼu̷bʼu̷ ntee ke mbeñeji mi ngeje na profeta, bʼu̷bʼu̷ ntee kʼo manji ke ngeje Mizhokjimi. ¿Nutsʼkʼe pje i mange? (Jñanrra nu nota 12 kja nu página 211).

3. ¿Ja rga mbo̷xkʼu̷ ma ri pa̱rge ja ga kjaa e Jehová ñe e Jesús?

3 Me na joo ke ri pa̱rge kʼo na kjuana ja ga ngeje e Jesús. ¿Pjenga? Ne Biblia mama: “Sido ra bʼu̷bʼu̷tjoji nangeje pa̱kʼa̱ji, nutsʼkʼe ngetjotsʼu̷ge i Mizhokjimige kʼu̷ na kjuana. Sido ra bʼu̷bʼu̷tjoji nangeje xo pa̱ka̱ji, nutsʼko̷ e Jesucristo gui cha̷kja̷go kja ne xoñijomu̷” (Juan 17:3). Me na joo ri pa̱rge ja ga nge e Jehová ñe e Jesús, kʼo kjaji ga kjanu ra mimiji texe yo paa kja ne xoñijomu̷ ma me rga zo̷o̷ (Juan 14:6). Nzakja ma o mimi kja ne xoñijomu̷ me ma jonte, mi juentse kʼo ntee kʼo mi supjre ñe mi pjo̷sʼu̷ji. Ma ri xo̷ru̷kʼo ra mbo̷xkʼu̷ ri tsjage nzakja angeze (Juan 13:34, 35). Kja nu xo̷ru̷ 1, ro xo̷ru̷ji ja ga kjaa Mizhokjimi. Nuba ra nuji kʼo mama ne Biblia ja ga ngeje e Jesús.

 ¡RO PA̱RGOJME KʼE MESÍAS!

4. ¿Pje nee ra mama Mesías o Cristo?

4 Na punkju̷ kje̷e̷ ma dya bʼe ma e̱je̱ e Jesús kja ne xoñijomu̷, e Jehová ya bi na̷dʼa̷kʼu̷, go mama ro pejñe naja ke me ni mubi ngekʼua yo ntee mi tebʼejikʼu̷, mi xiji Mesías ñe Cristo. Mi xiji Mesías kja kʼe jñaa hebreo, ñe mi xiji Cristo kja kʼe jñaa griego. Yo yeje jñaayo nee ra mama kʼu̷ e Mizhokjimi ra unu̷ e Mesías o Cristo ra tsjaa na bʼe̷pji kʼu̷ me na mubi. Texe kʼo mama Mizhokjimi ra za̷dʼa̷, nange e Mesías ra tsjaa kʼo nee Mizhokjimi. Na punkju̷ kʼo na kjadya e Jesús kʼu̷ pjo̷xku̷ji. Mi jingua ma dya bʼe mi teʼe e Jesús, na punkju̷ ntee mi nee ro mba̱ra̱ji kjo mi ngeje e Mesías.

5. ¿Pje mi mbeñe kʼo discípulo kjo mi ngeje e Jesús?

5 Kʼo discípulo e Jesús o ñejmeji ke angeze mi ngeje e Mesías (Juan 1:41). Nzakja na nu paa e Pedro go xipji e Jesús: “Nutsʼko̷ ri mango̷ ngetsʼkʼe e Cristo” (Mateo 16:16). ¿Ja ba mba̱ra̱ji ke e Jesús mi nge e Mesías?

6. ¿Ja gua mbo̷sʼu̷ e Jehová kʼo ntee ngekʼua ro mba̱ra̱ji e Mesías?

6 Mi bʼu̷bʼu̷ profeta kʼo o mimiji ma dya bʼe mi teʼe e Mesías, angezeji go manji pje ro tsjaa ñe ja rgua mimi, ga kjanu kʼo ntee ro unu̷ji nguenrra kjo mi ngeje kʼe Mesías. ¿Ja ga mbo̷xku̷ji kʼo go manji? Nge nzakja ma na ntee ro dyo̷tkʼu̷ rgui ma chju̷ru̷ na ntee nu ja ba sa̷ja̷ yo camión. Zo̷ dya i pa̱rge kjo ngekʼu̷, ri cho̷trʼu̷ ma ra xitsʼiji na joo ja ga kjaa angeze. E Jehová go xipji na joo yo profeta ja rgua kjaa kʼe Mesías ñe pje ro tsjaa. Ga kjanu kʼo ntee kʼo mi a̷ta̷ji Mizhokjimi ma go jñanrraji ke e Jesús mi kjaa ñe kʼu̷ go kjogu̷ texe ja nzi ba mama kʼo profeta, go unu̷ji nguenrra ke angeze mi nge kʼe Mesías nu kʼu̷ bi mama Mizhokjimi ro pejñe.

7. ¿Ja ba za̷dʼa̷ yeje jñaa kja e Jesús ke o jñetse mi nge kʼe Mesías?

7 Nuba ra nuji yeje jñaa kʼo ro za̷dʼa̷ kja e Jesús. Otrʼu̷ ra  xitsʼi kʼo go mama e Miqueas, angeze go mama ke e Mesías ro teʼe kja ke tsʼijñiñi Belén, go mamakʼo 700 kje̷e̷ ma dya bʼe mi teʼe e Jesús (Miqueas 5:2). ¡E Jesús go teʼe a Belén ja nzi ba mama e Miqueas! (Mateo 2:1, 3-9). Nu na yeje nu ra xitsʼi, ngeje kʼo go mama e Daniel, angeze go mama ke e Mesías ro sa̷ja̷ nu kje̷e̷ 29 d.C. (Daniel 9:25). Dya ngextrjo ba kjogu̷yo e Jesús, xe bʼu̷ntrjo na punkju̷ jñaa ke ro za̷dʼa̷ kja e Jesús, nujyo jñetse ke angeze mi ngeje kʼe Mesías (jñanrra nu nota 13 kja nu página 211).

Ma e Jesús o jii kja nrreje o mbe̷zhi Mesías o Cristo

8, 9. ¿Pje go kjogu̷ ma go jii e Jesús kja nrreje ke o jñetse mi ngeje e Mesías?

8 E Jehová go mama ke e Jesús mi nge kʼe Mesías. Angeze go xipji e Juan kʼu̷ mi jiʼchi kʼo ntee ja rgua mba̱ra̱ kʼe Mesías. Ma e Juan o jiʼchi e Jesús kja nu nrrare Jordán kja nu kje̷e̷ 29 d.C. nge ma kja go unu̷ nguenrra ke e Jesús mi ngeje e Mesías: “Nukʼua ma nzi ba nguaru̷ ba jii e Jesús, kjanu o mbesʼe kja kʼe ndare. O xogu̷kʼua ajensʼe, y o jñanda e Jesús ma sjo̷bu̷ o [e]spíritu Mizhokjimi nzakja na mbaro, ma e̱je̱ ro ne̱ nda̷ga̷ axesʼe angeze. Kjanu o dya̷ra̷jikʼua naja kʼu̷ mi ñaa ajensʼe, o mama: ‘Nujnu ngenu in chʼigo nu ri sʼiya, ngenu rga ma̷kjonu’” (Mateo 3:16, 17). Ma e Juan go jñanrra ñe go dya̷ra̷kʼo, go unu̷ nguenrra ke e Jesús mi ngeje e Mesías (Juan 1:32-34). Kʼe pakʼu̷, e Jehová o unu̷ o espíritu e Jesús, ga kjanu go mbe̷zhi Mesías. O jñetsekʼua e Jehová bi  juajnu̷ angeze ngekʼua ro manda kja o jñiñi ñe ro tsjaa Rey (Isaías 55:4).

9 Texe kʼo jñaa kʼo ro za̷dʼa̷ kja e Jesús, kʼo o mama e Jehová ma o jii kja ndeje e Jesús ñe ma o zo̷bu̷ o espíritu e Mizhokjimi Jehová, o jñetse ke na kjuana e Jesús mi nge e Mesías. Pe ¿ja mi bʼu̷bʼu̷ e Jesús ma dya bʼe ma e̱je̱  kja ne xoñijomu̷ ñe ja ma kjaa? Ra nuji pje mama ne Biblia.

¿JA BI ÑE̱JE̱ E JESÚS?

10. ¿Pje mama ne Biblia ja mi bʼu̷bʼu̷ e Jesús ma dya bʼe ma e̱je̱ kja ne xoñijomu̷?

10 Ne Biblia mama ke ma dya bʼe ma e̱je̱ e Jesús kja ne xoñijomu̷ ya ix mi bʼu̷bʼu̷ ajensʼe. E Miqueas go mama ke e Mesías ya “ix mi bʼu̷bʼu̷ mi jingua” (Miqueas 5:2). E Jesús xo go mama kʼu̷ ma dya bʼe mi teʼe kja ne xoñijomu̷, angeze ax mi bʼu̷bʼu̷ na punkju̷ kje̷e̷ ajensʼe (xo̷ru̷ Juan 3:13; 6:38, 62; 17:4, 5). Texe kʼo kje̷e̷ kʼu̷ o bʼu̷bʼu̷nu o mba̱ra̱ na joo e Jehová ñe me o jobi.

11. ¿Pjenga e Jehová me sʼiya e Jesús?

11 E Jehová me sʼiya e Jesús. ¿Pjenga me sʼiya? Nange nge kʼu̷ otrʼu̷ go dya̷trʼa̷. Ne Biblia mama: “E Mizhokjimi otrʼu̷ go dya̷trʼa̷ e Jesucristo ma dya bʼe mi trʼa̷trʼa̷ e jensʼe ñe ne xoñijomu̷” (Colosenses 1:15TNM). * E Jehová go dya̷trʼa̷tsje̷ e Jesús ngekʼua me sʼiya. Ne Biblia mama ke e Jesús nge “nu Tʼii kʼu̷ natjo” (Juan 3:16). Ngextrjo e Jesús go mbo̷sʼu̷ e Jehová ro dya̷trʼa̷ texe (Colosenses 1:16TNM). Ngextrjo e Jesús ngeje e “Jñaa” nange e Jehová mi pejñe angeze ro ma xipji yo anxe ñe yo ntee pje ro tsjaji (Juan 1:14).

12. ¿Ja gi pa̱rge ke e Jehová ñe e Jesús dya natrjobi?

12 Na punkju̷ ntee manji ke e Mizhokjimi ñe e Jesús natrjobi. Pe ne Biblia dya mama ga kjanu. Ne Biblia mama ke e Mizhokjimi o dya̷trʼa̷ e Jesús, ga kjanu ri pa̱ra̱ji ja ba mbu̷ru̷ o bʼu̷bʼu̷ e Jesús. Pe e Jehová go dya̷trʼa̷ texe, angeze dya bʼu̷bʼu̷ na paa ma go mbu̷ru̷ go bʼu̷bʼu̷  (Salmo 90:2). E Jesús nge o trʼii Mizhokjimi, e Jesús dya o mama kʼu̷ mi ngeje Mizhokjimi. Ne Biblia mama ke xe na nojo e Tata ke o trʼii (xo̷ru̷ Juan 14:28; 1 Corintios 11:3). Ngextrjo e Jehová “pe̷sʼi texe kʼu̷ na ze̷zhi” (2 Corintios 6:18NTD). Ngextrjo e Jehová me na nojo ñe ngextrjo angeze pe̷sʼi texe kʼu̷ na ze̷zhi kja texe kʼo bʼu̷bʼu̷ ajensʼe ñe kja ne xoñijomu̷ (jñanrra nu nota 14 kja nu página 213).

13. ¿Pjenga mama ne Biblia “kʼua ja nzi ga kjaa [e Jehová] je xo ga kjatrjonu e Jesucristo”?

13 E Jehová ñe e Jesús go mimibi na punkju̷ millón kje̷e̷ ma dya bʼe mi trʼa̷trʼa̷ e jensʼe ñe ne xoñijomu̷. Angezebi me mi potka sʼiyabi (Juan 3:35; 14:31). E Jesús mi kjaa ja ga tsjaa e Jehová, ne Biblia mama: “Kʼua ja nzi ga kjaa angeze je xo ga kjatrjonu e Jesucristo” (Colosenses 1:15TNM).

14. ¿Pje go tsjaa e Jehová ngekʼua e Jesús ro mimi kja ne xoñijomu̷?

14 E Jehová mi nee o trʼii ñe mi bʼu̷bʼu̷bi na joo ajensʼe, kjanu go pejñe ro e̱je̱ kja ne xoñijomu̷. Pe ¿ja ba tsjaakʼo Mizhokjimi ma e Jesús mi bʼu̷bʼu̷ ajensʼe? E Jehová go tsjaa na milagro. Angeze go tsjaa ke o trʼii kʼu̷ mi bʼu̷bʼu̷ ajensʼe ro e̱ bʼu̷bʼu̷ kja o pjeme e María, ngekʼua o tata e Jesús dya mi nge na bʼe̷zo kja ne xoñijomu̷. E María go musʼu̷ na tsʼimbane kʼu̷ dya mi pe̷sʼi nzhubu̷, kjanu o jñusbʼu̷ Jesús (Lucas 1:30-35).

¿JA MA KJAA E JESÚS?

15. ¿Pje ra mbo̷xkʼu̷ ri pa̱rge ja ga kjaa e Jehová?

15 Kja ne Biblia kja yo libro Mateo, Marcos, Lucas ñe Juan, ri pjechi ja ma kjaa e Jesús, ja gua mimi ñe pje go tsjaa ma mi bʼu̷bʼu̷ kja ne xoñijomu̷, yo libro xiji Evangelio. Ma ri xo̷rge yo libro, ra mbo̷xkʼu̷ ri pa̱rge ja ga kjaa e Jehová nange e Jesús nge nzakja nu Tata. Na nu paa e  Jesús go mama: “Nu kʼu̷ ya o jñandga, ya xo jñanda mi Tatago” (Juan 14:9).

16. ¿Pje mi jichi e Jesús kʼo ntee ñe kjo mi nge o jñaa kʼo mi jizhi e Jesús?

16 E Jesús mi xipjiji “xo̷pu̷te” (Juan 1:38; 13:13). Angeze mi nuu ke me na mubi ro jichi kʼo ntee “ja rba manda nu kʼu̷ bi ñʼeme Mizhokjimi ajensʼe”. ¿E Mizhokjimi ra ñʼeme kjo ra manda? Ja̱a̱, angeze ra ñʼeme o Reino ajensʼe ngekʼua ra manda kja ne xoñijomu̷, ga kjanu ra mbo̷sʼu̷ kʼo ntee kʼo a̷ta̷ angeze (Mateo 4:23). Texe kʼo mi jichi e Jesús mi nge o jñaa e Jehová. E Jesús o mama: “Nu yo rra̱ xo̷pu̷ yo ntee, dya ri mamatsje̷je̷goyo. Nu kʼu̷ o nda̷kja̷go nge kʼu̷ je o xo̷ku̷gokʼu̷” (Juan 7:16). E Jehová nee ke yo ntee ra mba̱ra̱ji pje ra tsjaa o Reino ma ra manda kja ne xoñijomu̷, e Jesús mi pa̱ra̱ ke je ga kjanu ga nee e Jehová.

17. ¿Ja mi jichi e Jesús kʼo ntee ñe pjenga go pe̷pji na ze̷zhi?

17 ¿Ja mi jichi e Jesús kʼo ntee? Mi jichi kʼo ntee kʼua ja mi chje̷ji, kja yo nrrajñiñi, kja yo jñiñi, kja yo chomu̷, kja o ngumu̷ji ñe nu ja mi jmuru̷ji ngekʼua mi matrʼu̷ji Mizhokjimi. Angeze dya mi tebʼe ro sa̷ja̷ kʼo ntee ja mi bʼu̷bʼu̷, angeze mi jodʼu̷ kʼo ntee ja mi bʼu̷bʼu̷ji (Marcos 6:56; Lucas 19:5, 6). E Jesús go pe̷pji na ze̷zhi, me mi kjakjuana ro tsjaa kʼe bʼe̷pji zo̷ ya mi mbokue̷. ¿Pjenga mi kjakʼo? E Jesús mi jichi kʼo ntee nange e Jehová mi nee ke ro tsjaa ke bʼe̷pji, e Jesús go tsjaa nrrexe kʼo mi nee o Tata (Juan 8:28, 29). Xo mi jichi kʼo ntee nangeje me mi juentse (xo̷ru̷ Mateo 9:35, 36). E Jesús mi unu̷ nguenrra ja ma tsjaa kʼo xo̷pu̷te judío ma dya mi jichiji kʼo ntee kʼo ma kjuana ñe dya mi xipjiji pje ra tsjaa o Reino Mizhokjimi. Ngekʼua e Jesús go pe̷pji na ze̷zhi, mi nee ke nrrexe kʼo ntee ro mba̱ra̱ji kʼo ra tsjaa o Reino Mizhokjimi.

18. ¿Pje mbe kʼo kjakʼu̷ ri dya̷trjo kʼo go tsjaa e Jesús?

 18 E Jesús me mi sʼiya kʼo ntee ñe me mi pjo̷sʼu̷, me ma jonte, na punkju̷ ntee mi che̷zhi ja mi bʼu̷bʼu̷ angeze, dya mi su̱u̱ ro zopju̷ji ñe kʼo tsʼitrʼi ixmi che̷zhiji a jmii e Jesús (Marcos 10:13-16). E Jesús mi kjaa kʼo ma joo. Dya mi nuu na joo kʼo ntee kʼo mi jotrʼu̷ nu minte ngekʼua ro jñu̷nbu̷ o merio ñe kʼo mi kjapu̷ ro supjre nʼaño ntee (Mateo 21:12, 13). Kʼo pakʼo dya mi respetaoji kʼo nrrinxu, pe e Jesús dya mi kjaa nzakja kʼo ntee, angeze mi respetao kʼo nrrinxu ñe mi zopju̷ na joo (Juan 4:9, 27). E Jesús dya mi kjapu̷ na nojo, nzakja na nu xomu̷ go tsjaa na bʼe̷pji kʼu̷ ngextrjo mi kjaji kʼo mbe̷pjinte, go mbechbʼe o nguaa kʼo o discípulo (Juan 13:2-5, 12-17).

E Jesús mi jichi texe kʼo ntee

19. ¿Pje go tsjaa e Jesús ke go jñetse ke mi juentse kʼo ntee kʼo mi supjre?

19 E Jesús mi pa̱ra̱ ja rgua mbo̷sʼu̷ kʼo ntee. E Mizhokjimi bi unu̷ o ze̷zhi ngekʼua go tsjapu̷ ro kʼueñe o ngijeme na punkju̷ ntee (Mateo 14:14). Nzakja na nu paa e Jesús go chje̷bi na bʼe̷zo kʼu̷ mi so̷ʼo̷ lepra, kʼe bʼe̷zo go xipji e Jesús: “Nu ma i nee, ra so̷o̷ ri joku̷zu̷ ne lepra”, e Jesús mi pa̱ra̱ ja ma zo̷ʼo̷ kʼe bʼe̷zo me kʼo juentse ngekʼua go mbo̷sʼu̷. Go penchʼbʼi o dye̷e̷ kjanu go xipji: “Ri nego ra jogu̷tsʼu̷, eñe”, kjanu o nrrisʼikʼua kʼe bʼe̷zo (Marcos 1:40-42). ¿So̷o̷ ri mbeñe ja ba zo̷ʼo̷ kʼe bʼe̷zo ma go jogu̷?

DYA GO JYE̸ZI BA TSJAA KʼO MI NEE O TATA

20, 21. ¿Ja ba jñetse ke e Jesús na kjuana mi a̷ta̷ Mizhokjimi?

20 E Jesús go dya̷ta̷ nu Tata. Zo̷ me mi u̷mbu̷ji ñe go tsjapu̷ji kʼo me na sʼoo, angeze dya go jye̷zi go tsjaa kʼo ma joo ja nzi ma nee o Tata. Ma e Satanás mi nee ro jyotrʼu̷ e Jesús ngekʼua ro tsjaa kʼo na sʼoo, angeze dya  go tsjapu̷ nguenrra (Mateo 4:1-11). O pjamilia e Jesús dya mi kreoji ke mi ngeje e Mesías, ma mi nuji kʼo mi kjaa mi manji kʼu̷ “ya mi loco”, pe e Jesús dya go jye̷zi o bʼe̷pji Mizhokjimi (Marcos 3:21). Ma kʼo ntee kʼo me mi u̷mbu̷ji me mi xipjiji kʼo me ma sʼoo, e Jesús dya go nzhopkʼu̷ kʼo mi kjapu̷ji ñe dya go jye̷zi go tsjaa kʼo mi nee Mizhokjimi (1 Pedro 2:21-23).

21 Me o tsjapu̷ji ro supjre ma o mbo̷trʼu̷ji, pe angeze dya o jye̷zi o tsjaa kʼo mi nee Mizhokjimi (Filipenses 2:8). Mbeñege ja ba supjre e Jesús kʼe paa ma o nrru̱u̱. Ma o dyo̷tu̷ji nguenda o manji mi kjaa kʼo ma sʼoo, pe dya ma kjuanakʼo. O jya̷sʼa̷ji bʼe̷chjine, kʼo ntee kʼo o dyo̷tu̷ji nguenda dya o tsjaji na joo, me mi trjembeji, kʼo xundaro go dye̷ji, kjanu o nrra̷trʼa̷ji kja na zaʼa kʼu̷ me  ma maja. Ma ya ma tu̱u̱ o mama: “Ya o nguaru̷ texe” (Juan 19:30). Ma ya bi kjogu̷ jñii paa kʼu̷ bi nrru̱u̱, e Jehová o tsjapu̷ ro bʼu̷bʼu̷trjo nzakja na anxe ngekʼua ro so̷o̷ ro bʼu̷bʼu̷ ajensʼe (1 Pedro 3:18). Ma o kjogu̷ ja nzi ngoʼo nrro go nzhogu̷ ajensʼe, “ya mimidya ajensʼe kja o jodye̷ Mizhokjimi”, o nrrebʼe ro za̷dʼa̷ ma e Mizhokjimi ro tsjapu̷ rey (Hebreos 10:12, 13).

22. ¿Ja ga mbo̷xku̷ji ke e Jesús o tsjaa ja nzi ma nee Mizhokjimi?

22 E Jesús o tsjaa ja nzi ma nee Mizhokjimi, ngekʼua nutsʼko̷ji so̷o̷ ra mimiji texe yo paa kja ne xoñijomu̷ ma me rga zo̷o̷. E Jehová ra tsjaa kja ne xoñijomu̷ ja ma nee mi jingua. Kja nu xo̷ru̷ nu ba e̱je̱ ra nuji kʼu̷ e Jesús o nrru̱u̱ ngekʼua ra mbo̷xku̷ji ra minji texe yo paa.

^ par. 11 E Jehová xiji Tata nange o dya̷trʼa̷ texe (Isaías 64:8). E Jehová go dya̷trʼa̷tsje̷ e Jesús ngekʼua ngeje nu tʼii kʼu̷ natrjo. Kʼo anxe ñe e Adán xo nge o trʼii Mizhokjimi Jehová (Job 1:6; Lucas 3:38).