Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 2

Ne Biblia ngeje o Jñaa e Mizhokjimi

Ne Biblia ngeje o Jñaa e Mizhokjimi

1, 2. ¿Pjenga ri mango̷ji ke me na mubi ne Biblia kʼu̷ o dyaku̷ji Mizhokjimi?

¿JA GI so̷ge ma naja ke i jogebi pje kʼo o dyakʼu̷? Dabadiji i nee ri jñanrra pje mbe. Me i ma̷ja̷, ri unu̷ po̷jo̷ nu kʼu̷ go dyakʼu̷ ñe kjaku̷ ri mbeñe ke me sʼiyatsʼu̷.

2 E Diosi o dyaku̷ji ne Biblia, kʼo mamanu dya ra to̷trʼu̷ji kja nʼaño libro. Nunu mama ke nge e Diosi kʼu̷ o dya̷trʼa̷ texe yo bʼu̷bʼu̷ kja e jensʼe ñe texe yo bʼu̷bʼu̷ kja ne xoñijomu̷, mama o dya̷trʼa̷ na bʼe̷zo kʼu̷ mi chju̱u̱ Adán ñe na nrrinxu kʼu̷ mi chju̱u̱ Eva. Ne Biblia jitsʼko̷ji pje ra kjaji ma ri kjogu̷ji nrrumu̷. Xo mama e Diosi ra tsjaa ne xoñijomu̷ me na zo̷o̷ ja ma nee mi jingua. ¡Me ni mubi o Jñaa Mizhokjimi kʼu̷ o dyaku̷ji!

3. ¿Pje ri pa̱ra̱ ma ri xo̷ru̷ ne Biblia?

3 Ma ri xo̷rge ne Biblia ri pa̱rge ja ga kjaa Mizhokjimi. Ma dya ri jye̷zi ri xo̷rge ne Biblia, jmanchʼa jmanchʼa ri jogebi.

4. ¿Pjenga me ri dya̷trjoji ma ri pa̱ra̱ji ja gua dya̷trʼa̷ji ne Biblia?

4 Ixi kjogu̷ 2.600 idioma ke o dyopju̷ji ne Biblia. Ya na punkju̷ millón Biblia yo ya jñusʼu̷ji. Nudya na punkju̷ ntee so̷o̷ ra xo̷ru̷ji nu Biblia kja o idioma. Chju̷ma chju̷ma ixi kjogu̷ na millón ntee kʼo nuji pje ra tsjaji ngekʼua ra mbe̷sʼiji na Biblia. Dya bʼu̷bʼu̷ na libro nzakja ne Biblia.

5. ¿Ja rga pa̱rgo̷ji ke ne Biblia “ngeje o jñaa Mizhokjimi”?

5 Ne Biblia nge o Jñaa Mizhokjimi, nange kʼo bʼe̷zo kʼu̷ o dyopju̷ji, “nge o [e]spíritu Mizhokjimi o ñʼu̷nbu̷  o mu̷bʼu̷ji o dyopju̷ji” (xo̷ru̷ 2 Timoteo 3:16). Pe bʼu̷bʼu̷ ntee kʼo kjatsje̷ji ne trʼo̷nu̷: “¿Pjenga ne Biblia ba e̱je̱ kja Mizhokjimi ma nge kʼo bʼe̷zo kʼo o dyopju̷ji?”. Ne Biblia mama ga kjaba: “Kʼo profeta, dya ngijñitsje̷ji kʼo jñaa kʼo o dyopju̷ji; ngetsje̷ o [e]spíritu Mizhokjimi o ñʼu̷nbu̷ o mu̷bʼu̷ji o pa̷tpa̷ji Mizhokjimi” (2 Pedro 1:21). Nge nzakja ma na guelo o̷tu̷ o bʼe̷che ra dyopju̷ na carta. ¿Kjo nge o jñaa kʼu̷ o dyopju̷ji kja kʼe carta? Zo̷ o dyopju̷ kʼe bʼe̷che pe dya nge o jñaa angeze, nge o jñaa nu guelo. Nge ga kjanu kʼo o tsjaa e Diosi ngekʼua kʼo mama ne Biblia dya nge o pjeñe yo bʼe̷zo, e Diosi o mbo̷sʼu̷ yo bʼe̷zo ro dyopju̷ji o jñaa angeze. Ixi na kjuana ne Biblia “ngeje o jñaa Mizhokjimi” (1 Tesalonicenses 2:13; jñanrra nu nota 2 kja nu página 207).

Ne Traducción del Nuevo Mundo de las Santas Escrituras o dyopju̷ji kja na punkju̷ idioma

 NE BIBLIA MAMA KʼO NA KJUANA

6, 7. ¿Pjenga ri mango̷ji ke kʼo o dyopju̷ji ne Biblia nge natrjo ma mbeñeji?

6 O mezheji mil seisciento kje̷e̷ ba dyopju̷ji ne Biblia. Kʼo bʼe̷zo me jyadʼu̷ na punkju̷ kje̷e̷ ba minji. Bʼu̷bʼu̷ kʼo go maa kja ngunxo̷ru̷, pe go bʼu̷bʼu̷ kʼo iyo. Na bʼe̷zo kʼu̷ o dyopju̷ ne Biblia mi nge doctor, dyaja kʼo mi pe̷pjiji kja juajma, dyaja kʼo mi mbe̷jmo̱ji, dyaja kʼo mi kʼasʼu̷ji nzhenchju̷ru̷, dyaja kʼo mi nge profeta, dyaja kʼo mi nge juez, dyaja kʼo mi nge arkate. Zo̷ dya mi chjenjui ja ma ngeji ñe ja ma minji, texe kʼo o dyopju̷ji kja ne Biblia nzakja kʼu̷ natrjo ma mbeñeji. Kʼo go dyopju̷ji kja na capítulo dya ri to̷trʼu̷ji kʼu̷ nʼaño ri mama. *

7 Nu ja pju̷ru̷ ne Biblia, kja kʼe libro Génesis mama ke e Mizhokjimi o dya̷trʼa̷ e Adán ñe e Eva. Mama ke angezebi dya o dya̷ta̷bi Mizhokjimi o tsjabi kʼo na sʼoo, ga kjanu o mbu̷ru̷ kʼo ndotkʼijeme, ri titaji ñe ri tu̱ji. O kjogu̷ 4.000 kje̷e̷ ma kʼe apóstol Juan o dyopju̷ nu libro nu ni nguaru̷ ne Biblia, o dyopju̷ ke e Mizhokjimi ra mbo̷xku̷ji ngekʼua dya kja ra so̷dyeji, ra minji texe yo paa ñe me ra ma̷ji. Ra za̷dʼa̷kʼo nange texe kʼo ri xo̷ru̷ji kja ne Biblia ri unu̷ji nguenda ke e Mizhokjimi kjaa kʼua ja nzi ga mama.

8. ¿Ja rga unu̷ji nguenrra ke ne Biblia mama yo na kjuana ja ga kjaa texe yo bʼu̷bʼu̷?

8 Ne Biblia dya o dyopju̷ji ngekʼua ra pjechiji ja ga kjaa texe yo bʼu̷bʼu̷ ni xo dyopju̷ji ngekʼua ra jichiji yo poji kja escuela. Pe texe kʼo mama me joo ba jñu̱sʼu̷ji ñe dya mama bʼe̷chjine. Nzakja ma ga mama ja ga kjaa texe kʼo bʼu̷bʼu̷, mama kʼo na kjuana. Nge ga kjanu nange ne Biblia je ni ñe̱je̱ kja Mizhokjimi. Nzakja ne libro Levítico junsʼu̷ kʼo o  mama Mizhokjimi ja rgua mbo̷ru̷ji kʼo mi so̷dyeji ngekʼua dya ro zo̷dye kʼo dyaja. Ne Biblia mi mamakʼo, kʼo pakʼo yo ntee dya bʼe mi pa̱ra̱ji ja ma pe̷pji yo bacteria ñe yo virus kʼo kjapu̷ ra zo̷dyeji yo ntee. Ne Biblia mi mama ja ga kjaa ne Xoñijomu̷ xo o mama ke dya kjo mi tunsʼu̷ (Job 26:7). Kʼo pakʼo, kʼo ntee dya mi pa̱ra̱ji ja ma kjaa ne Xoñijomu̷, pe kja ne Biblia mi junsʼu̷ ke ne Xoñijomu̷ mi nzakja na mbelota (Isaías 40:22).

9. ¿Ja rga nugo̷ji ne Biblia ma ri pa̱rgo̷ji kʼu̷ o jñusʼu̷ji texe kʼua ja nzi ba kjogu̷?

9 Kja ne Biblia mama pje o kjogu̷ mi jingua ñe dya mama bʼe̷chjine, pe dya nge ga kjanu yo Libro kʼo kjaji yo ntee. Angezeji mi junsʼu̷ji kʼo mi kjaji na joo, pe kʼo ma sʼoo kʼo mi kjaji dya mi junsʼu̷ji. Pe kʼo bʼe̷zo kʼo o dyopju̷ji ne Biblia o jñusʼu̷ji texe kʼua ja nzi ba kjogu̷, o jñusʼu̷ji ma o bʼe̷zhiji chu̱ʼu̱ ñe kʼo na sʼoo kʼo go tsjaji. Nzakja kja nu libro Números, e Moisés o dyopju̷ kʼo na sʼoo kʼo go tsjaa xo mamanu ja ba gue̷nchʼi Mizhokjimi (Números 20:2-12). Texe kʼo mama ne Biblia ba e̱je̱ kja Mizhokjimi, angeze o ñʼeme bʼe̷zo ngekʼua ro dyopju̷ji kʼo na kjuana. Ra enchʼeji kja in mu̷bʼu̷ji kʼo mama ne Biblia.

NE BIBLIA JITSʼKO̸JI KʼO ME NA JOO

10. ¿Ja ga mbo̷xku̷ji ne Biblia yo padya?

10 Ne Biblia nge o Jñaa Mizhokjimi, ‘pjo̷xku̷ji ja rga jichiji yo ntee, zoku̷ji ma ri kjaji kʼo na sʼoo ñe jitsʼko̷ji pje ni mbe kʼo na joo kʼo ra kjaji’ (2 Timoteo 3:16). Ixi nge ga kjanu ne Biblia, pjo̷xku̷ji yo padya. E Jehová o dya̷ko̷ji ngekʼua pa̱ra̱ na joo ja ga so̷go̷ji ñe kʼo ri mbeñeji. Bʼu̷bʼu̷ paa ma dya ri pa̱rgo̷ji ja ga kjaa kʼo ri so̷go̷ji, pe angeze pa̱ko̷ji na joo ñe nee ke ra ma̷ji. Ne Biblia mama ja rga minji na joo ñe kʼo dya ra kjaji.

11, 12. a) ¿Pje o mama e Jesús kja Mateo nu capítulo 5 a 7? b) ¿Pje nge kʼo xe ri pjechi ma ri xo̷rge ne Biblia?

 11 Me na joo texe kʼo junsʼu̷ kja ne Biblia ñe me pjo̷xku̷ji ra minji na joo. Kja Mateo nu capítulo 5 a 7 go mama e Jesús pje ra kjaji ngekʼua ra ma̷ji, pje ra kjaji ngekʼua ra jogo̷ji yo ntee, xo go mama ja rga o̷tu̷ji Mizhokjimi ñe ja rga nuji ne merio. Zo̷ ya kjogu̷ 2.000 kje̷e̷ ma go dyopju̷jikʼo, ma ri zopjko̷ji kʼo mamanu me pjo̷xku̷ji ra minji na joo.

12 E Jehová jitsʼko̷ji kja ne Biblia ja rga minji na joo ko in pjamilia, pjo̷xku̷ji ra pe̷pjiji na joo ñe dya ra chu̱ji in minte. Kʼo mama ne Biblia pjo̷xku̷ji zo̷ pje ri pje̷zhiji, zo̷ ja ri menzumu̷ji, zo̷ pje ma nrrumu̷ yo ri kjogu̷ji (xo̷ru̷ Isaías 48:17; * jñanrra nu nota 3 kja nu página 207).

ÑEJME RA ZA̸DʼA̸ KʼO MAMA NE BIBLIA

Kja ne Biblia junsʼu̷ kʼo o mama e Isaías ja rba kjuatu̷ji kʼe nrrajñiñi Babilonia

13. ¿Pje o mama Isaías ro kjogu̷ kja nu nrrajñiñi Babilonia?

13 Na punkju̷ jñaa kʼu̷ o mama ne Biblia o za̷dʼa̷ mi jingua. E Isaías o mama ke ro kjuatu̷ji kʼe nrrajñiñi Babilonia (Isaías 13:19). O mama na joo ja rgua nrro̱mpu̷ji. Atrjii kʼe nrrajñiñikʼu̷, mi kjogu̷ na nrrareje ñe o mba̷trʼa̷ji na trʼangoxtrʼi kʼu̷ dya kjo mi so̷o̷ ro kjogu̷. Pe e Isaías o mama ke ma ro nrro̱mpu̷ji kʼe nrrajñiñi, ro dyotrʼu̷ nu nrrareje ñe ri soku̷trjo kʼe ngoxtrʼi. Xo o mama kʼu̷ ma ro nrro̱mpu̷ji kʼe jñiñi kʼo ntenu dya ro chu̱ji. Zo̷ dya bʼe mi za̷dʼa̷kʼo, e Isaías ixko mama ke e bʼe̷zo kʼu̷ ro nrro̱mpu̷ kʼe nrrajñiñi Babilonia ro jñusbʼu̷ji Ciro (Isaías 44:27–45:2; jñanrra nu nota 4 kja nu página 208).

14, 15. ¿Ja ba za̷dʼa̷ kʼo o mama e Isaías ma ro kjuatu̷ji e Babilonia?

14 O kjogu̷ 200 kje̷e̷ ma o za̷dʼa̷ kʼo o mama kʼe profeta Isaías. O sa̷ji a Babilonia na punkju̷ xundaro ngekʼo ro  kjuatu̷ji. ¿Kjo nge kʼu̷ mi manda kʼo xundaro? Kʼua ja nzi ba na̷dʼa̷ e Isaías, mi nge e Ciro kʼu̷ mi manda a Persia. O za̷dʼa̷ kʼua ja nzi ba mama e Isaías, pe xi mi bʼe̷zhi kʼo ro kjogu̷.

15 Kʼe xomu̷ ma o sa̷ji kʼo xundaro a Babilonia, kʼo ntenu ma kjaji mbaxkua. Mi pezhiji kʼu̷ dya kjo mi so̷o̷ ro datrʼu̷  kʼe nrrareje ñe kʼe trʼanrru̷ngumu̷ kʼu̷ mi kotʼu̷ ke nrrajñiñi, mi mbeñeji kʼu̷ dya kjo mi so̷o̷ ro kjogu̷nu. Pe atrjii mi bʼu̷bʼu̷ o xundaro e Ciro, o dyoʼbʼu̷ji ja kʼo ro maa nu nrrareje, ga kjanu o so̷o̷ ro mbesʼe kʼo xundaro. Pe ¿ja rgua kjogu̷ji kja kʼe trʼanrru̷ngumu̷? O za̷dʼa̷ kʼo bo mama e Isaías, kʼe pakʼu̷ dya o ngotrʼu̷ji kʼe ngoxtrʼi. Zo̷ dya o chu̱ji yo xundaro, o tsjapu̷ji in tsjaji kʼe nrrajñiñi.

16. a) ¿Pje o mama e profeta Isaías kʼe xi ro kjogu̷ kʼe nrrajñiñi Babilonia? b) ¿Ja rga pa̱rgo̷ji ke o za̷dʼa̷ kʼo o mama e Isaías?

16 Ro kjuatu̷ji na joo a Babilonia, e Isaías o mama: “Dya kja ra mimiji ntenu, ndexe yo paa yo ra e̱je̱ dya kjo ra miminu” (Isaías 13:20). ¿Go za̷dʼa̷ kʼo o mama kʼe profeta Isaías? Ja̱a̱, go za̷dʼa̷. Kʼe nrrajñiñi Babilonia ni jyadʼu̷ na 80 kilómetro a Bagdad nu jñiñi a Irak, nudya so̷o̷ ri jñanrra ke dya kjo ka̱ra̱nu, dya pje go mbonkju̷. Chjenjui ke e Jehová go jñu̷̱u̷̱ na bʼaxu̷ ñe go paxu̷ na joo (Isaías 14:22, 23).

O kjuatu̷ji Babilonia

17. ¿Pjenga ra ejmeji ke ra za̷dʼa̷ kʼo mama e Mizhokjimi?

17 Texe kʼo mama ne Biblia kʼu̷ ro kjogu̷ mi jingua, go za̷dʼa̷, nukʼo pjo̷xku̷ji ra ejmeji ke yo mama ne Biblia xo ra za̷dʼa̷, nzakja ma e Jehová ra tsjaa ne xoñijomu̷ me rga zo̷o̷  (xo̷ru̷ Números 23:19). * Kʼo ya mama ra tsjaa e Jehová, ra za̷dʼa̷kʼo nange angeze dya “mbe̷chjine” (Tito 1:2). *

NE BIBLIA PJO̸XKU̸JI RA MINJI NA JOO

18. ¿Pje o mama e Pablo ja ga kjaa “o jñaa Mizhokjimi”?

18 Kʼo mama ne Biblia dya ri cho̷trʼu̷ kja nʼaño libro. Kʼo go dyopju̷ji kja ne Biblia nzakja kʼu̷ dʼatrjo ma mbeñeji, mama kʼo na kjuana ja ga kjaa texe yo bʼu̷bʼu̷ ñe kʼo go kjogu̷ mi jingua. Texe kʼo go mama kʼu̷ ro kjogu̷, go za̷dʼa̷. Kʼo mama ne Biblia xo pjo̷xku̷ji ra mimiji na joo. Pe dya ngextrjokʼo, kʼe apóstol Pablo o mama: “Me na ze̷zhi o jñaa Mizhokjimi kʼu̷ pe̷pji amboo kja in mu̷nko̷ji” (xo̷ru̷ Hebreos 4:12). ¿Pje go nee ro mama kʼe apóstol Pablo?

19, 20. a) ¿Ja ga mbo̷xkʼu̷ ne Biblia ri pa̱ra̱ pje ri tsjaa? b) ¿Pje ri tsjage ngekʼua ra jñetse me ki nege ne Biblia kʼu̷ o dyakʼu̷ e Mizhokjimi?

19 Ne Biblia pjo̷xkʼu̷ ri unu̷ nguenrra pje nge kʼo ri tsjage. Pjo̷xkʼu̷ ri unu̷ nguenrra ma na joo kʼo i mbeñe ñe pjo̷xkʼu̷ ri so̷ge na joo. Nzakja ma i so̷ʼo̷ amboo in mu̷nkʼe ke me gi sʼiyage Mizhokjimi, ma na kjuana i sʼiyage angeze pe̷ski ri mimi ja ga mama ne Biblia, ma ri tsjagekʼo me ri so̷ge na joo.

20 Ixi na kjuana ne Biblia ni ñe̱je̱ kja Mizhokjimi. Angeze nee ke ri zopju̷, nee ke me ri jyodʼu̷ pje nee ra mama kʼo junsʼu̷nu ñe ri sʼiya kʼo mamanu. Ma ri xo̷ru̷ ne Biblia ra jñetse me ki nee kʼo go dyakʼu̷ Mizhokjimi, ga kjanu ri pjechi pje ra tsjaa Mizhokjimi axojñi ngekʼua ra mbo̷kʼu̷. Kja nu xo̷ru̷ nu ba e̱je̱ ra nuji ja rga tsjakʼo.

^ par. 6 Bʼu̷bʼu̷ ntee kʼo manji ke ne Biblia dya chjenjui kʼo junsʼu̷, pe dya kjuanakʼo. Xo̷ru̷ nu página 3 ñe nu página 31 kja nu folleto ke ni chju̱u̱: ¿Pje mama ne Biblia? kʼu̷ o dyopju̷ji yo testigo e Jehová.

^ par. 12 Isaías 48:17: “Nge kʼo mama e Jehová, kʼu̷ go nrromkʼu̷geji, ngeje na Mizhokjimi kʼu̷ me Santo a Israel. ‘Ngezgo̷ e Jehová, in Mizhokjimigeji, kʼu̷ jitsʼiji pje ri tsjageji ngekʼua ri mimiji na joo, ri jitsʼiji nu ñʼii nu na joo nu ri nzhodʼu̷geji’”.

^ par. 17 Números 23:19: “E Mizhokjimi dya nge nzakja na ntee kʼu̷ mama bʼe̷chjine, e Mizhokjimi dya nge nzakja o trʼii yo bʼe̷zo ngekʼua ra potu̷ kʼo mama. Nu kʼo mama ra tsjaa, ¿dya ra tsjaa? Ma angeze xitsʼko̷ji pje ra kjogu̷, ¿kjo dya ra za̷dʼa̷?”

^ par. 17 Go kjuatu̷ji ke nrrajñiñi Babilonia ja nzi ba mama ne Biblia. Ma gi nee ri pa̱ra̱ pje mi mama ne Biblia kʼu̷ ro tsjaa e Jesús, jñanrra nu nota 5 kja nu página 208.