Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XORU̸ 25

Ra echʼeji e Jeoba kja in mu̷bʼu̷ji, ra mimiji na joo ñe ra potka sʼiyaji

Ra echʼeji e Jeoba kja in mu̷bʼu̷ji, ra mimiji na joo ñe ra potka sʼiyaji

E Santiago, e Pedro, e Juan ñe e Judas o opju̷ji carta kʼu̷ mi pjosʼu̷ kʼo cristiano

E SANTIAGO ñe e Judas mi nge o medio kjuarma e Jesús. E Pedro ñe e Juan mi ngeje o apóstole e Jesús. Kʼo nziyokʼo o opju̷ji yencho carta je ri totrʼu̷ji kja Escrituras Griegas Cristianas, nzi na cartakʼo o jñusbu̷ji o trju̱u̱ kʼo apóstol. Kʼo cartakʼo go mbosʼu̷ji yo kjuarma, ngekʼo dya ro jyeziji ro sʼiyaji Mizhokjimi sido ro tsjaji kʼo mi nee angeze, ñe dya ro jyombeñe nu Reino Mizhokjimi.

Nu kʼo ri echʼe kja in mu̷bʼu̷. Dya ngextrjo ra manji ri echʼego Mizhokjimi, xo ri tsjaa kʼo nee angeze. E Santiago o mama: “Na ntee, ma dya kjaa kʼo na joo, nuʼma, dya xo ni mubi ma kʼu̷ ni mama kreo” (Santiago 2:26). Ma ri pe̷sʼi na nrrumu̷ kʼu̷ me ri supjre, sido ri dyeme e Jeoba, nuʼma, ma ra e̱je̱ kʼo xe na se̷zhi más ri zezhi. Ma dya i̱ pa̱rge pje ri tsjaa, ri dyotu̷ ko texe in mu̷bʼu̷ge e Jeoba kʼu̷ pa̱ra̱ pje ri tsjaa. Ma ri guanta, me ta ma̷ja̷ o mu̷bʼu̷ e Jeoba (Santiago 1:2-6, 12). E Mizhokjimi dya jezi yo ntee kʼo kjaji akjanu, ga mbosʼu̷. Ngekʼua e Santiago o mama: “Chezhgeji a jmii Mizhokjimi; angeze xo ra chezhi in jmigeji” (Santiago 4:8).

Texe yo cristiano ra ñechʼe o mu̷bʼu̷ kʼo mama Mizhokjimi, ngekʼua dya ra kjaji kʼo dya joo kʼo nee in mu̷bʼu̷ji, jaga tsjaji yo ntee kʼo ka̱ra̱ji kja ne Xoñijomu̷. Kʼo paa kʼo go mimi e Judas xo mi ka̱ra̱ ntee kʼu̷ mi kjaji kʼo na sʼoo. Mi tsja̱ja̱ji nrrinxu mi tsja̱ja̱ji bʼe̷zo. E Judas o mama: “Ri sido ri kreogeji kʼo jñaa kʼo otrʼu̷ o jitsʼiji, dya ri jyezgeji kjo ra dyonkʼu̷geji” (Judas 3).

Ra mimi jaga nee e Jeoba. Angeze nee ke texe yo ntee kʼu̷ a̷ta̷ji dya ra tsjaji kʼo na sʼoo. E Pedro o mama: “Ngekʼua xo rra joo texe kʼo ri tsjaji. Nange ya tʼopju̷ akjaba kja o jñaa Mizhokjimi: Ri tsjaji jakʼo nzi rga neego kʼo na joo, na ngetsʼkʼo na jozgo” (1 Pedro 1:15, 16). Ma ri nee ri mimi jaga mama yo jñaayo, e Pedro o mama: “Ri tsjaji kʼe tju̱ru̷ jakʼo nzi ba tsjaa e Jesucristo. O supjre por nutsʼkʼoji. Nutsʼkʼeji xo ri tsjaji na joo, zo ri supjregeji” (1 Pedro 2:21). Ma gi nee ri bʼu̷bʼu̷ge na joo ko Mizhokjimi ri jyezi kʼo na sʼoo ri tsjage kʼo mama o Jñaa e Mizhokjimi (1 Pedro 3:16, 17). E Pedro o mama ra mimiji jaga nee Mizhokjimi. Ra kjaji kʼo nee angeze jesta ma ra sa̷ja̷ kʼe paa ma ra jñu̷nkʼu̷ji nguenrra Mizhokjimi texezgoji. Nuʼma, ra tsjaa ne Xoñijomu̷ dʼadyo. Ma ra za̷dʼa̷ kʼe paakʼu̷, “texe kʼo ra tsjajinu, nde na jookʼo” (2 Pedro 3:11-13).

“Chezhgeji a jmii Mizhokjimi; angeze xo ra chezhi in jmigeji.” (Santiago 4:8)

Ra potka sʼiyaji. E Juan o mama: “Mizhokjimi me sʼiyazu̷ji ri texeji”, ngekʼua o “nda̷ja̷ kʼu̷ o trʼii o ñe̱e̱ ngotkʼu̷ji in nzhubu̷ji [pekadoji]”. Ma je ga kjanu kʼu̷ sʼiyazgoji Mizhokjimi, ¿pje ra kjajima? E Juan o mama: “Nange kʼu̷ o sʼiyazu̷ji akjanu Mizhokjimi, xo ni jyodʼu̷ ra potu̷ rga sʼiyaji” (1 Juan 4:8-11). Ngekʼua ma i̱ sʼiya ni kjuarma, ri jonte ma ra sa̷ji kja in nzunge ri unu̷ ja ra oxu̷, ri uiñi (3 Juan 5-8).

Ma yo cristiano sʼiyaji e Jeoba, kjaji kʼo o mama Juan kʼu̷ o mama ga kjaba: “Ma ri neeji Mizhokjimi, ri kjaji jakʼo nzi ga mama. Dya ri sogoji na jyu̷u̷ kʼo jñaa kʼo mama angeze ra kjaji” (1 Juan 5:3; 2 Juan 6). E Mizhokjimi me sʼiya yo ntee kʼo kjaji kʼo nee angeze ñe ra tsjapu̷ “ri mimigeji nrrexe yo paa” (Judas 21NM).

(Nu kʼo gua e̱je̱ba xo ri jyodʼu̷ kja Santiago, 1 Pedro, 2 Pedro, 1 Juan, 2 Juan, 3 Juan ñe Judas.)