Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XORU̸ 26

E Mizhokjimi ra tsjaa ne Xoñijomu̷ me rga zo̷o̷

E Mizhokjimi ra tsjaa ne Xoñijomu̷ me rga zo̷o̷

Ma ra manda e Cristo, e Jeoba ra kjuatu̷ nrrexe yo ntee kʼu̷ na sʼoo, ga kjanu yo ntee ra mba̱ra̱ji kʼu̷ ngextrjo e Jeoba nge kʼu̷ ra manda

KʼE LIBRO kʼu̷ ni nguaru̷ kja ne Biblia ngeje kʼe Apocalipsis, o Revelación. Kja kʼe libro e Mizhokjimi xipji yo ntee kʼu̷ me supjre kʼu̷ ra sa̷ja̷ kʼe paa ma ra kjuatu̷ nrrexe yo nrrumu̷ kʼu̷ pe̷sʼiji. E Mizhokjimi o tsjapu̷ e apóstol Juan ro jñanrra pje ro kjogu̷ yo paa a maa axojñi, kjanu o opju̷ kʼe libro. Nuja kjuaru̷ kʼe libro mama e Jeoba ra tsjaa ne Xoñijomu̷ jama nee nrrizi ma go tsjaa.

Primero e Juan o jñanrra e Jesús ajensʼe mi xipji kʼo cristiano kja yo congregación ro jyeziji kʼo na sʼoo ñe ro sido ro tsjaji kʼo mi nee e Mizhokjimi. Kjanu o jñanrra o trono e Mizhokjimi ajensʼe, kjanu o opju̷ jama kjakʼu̷, xo o jñanrranu na punkju̷ anxe kʼu̷ mi unu̷ji alabanza e Jeoba.

O jñanrra ma e Mizhokjimi o unu̷ kʼe Tsʼime (Jesucristo) na rollo kʼo mi nu̷tʼu̷ yencho tsʼitrju̷mu̷. Ma o xu̷ku̷ji kʼo nziyo tsʼitrju̷mu̷, o jñanrra nziyo kʼu̷ mi cha̷ga̷ pjadʼu̷. Kʼu̷ primero o mbe̷dye̷ mi cha̷ga̷ na trʼoxpjadʼu̷ mi ngeje e Jesús, kʼu̷ o ñemeji ro tsjaa Rey. Nrro go mbe̷dye̷ji jñii kʼu̷ mi cha̷ga̷ pjadʼu̷ mi nzi na colorkʼo, mi nee ro mama ro tsjaa chu̱ʼu̱ kja ne Xoñijomu̷, me ro supjreji trjijmi, yo ntee ro zodyeji, nge yo ri jantrji yo paadya, ya ba chezhi yo paa ma ra nguaru̷kʼo. Ma o xokʼu̷ji kʼe yencho tsʼitrju̷mu̷ kʼu̷ mi nu̷tʼu̷ kja kʼe rollo, o jñanrra yencho anxe mi ju̷̱u̷̱ji trompeta, ma mi pjebʼi nzi na o trompeta nzi na plaga kʼu̷ ma e̱je̱. O zu̷bu̷ Mizhokjimi kʼo ntee o pejñe yencho plaga.

E Juan o jñanrra ajensʼe na nrrinxu kʼu̷ o musʼu̷ na tsʼitrʼi. ¿Pje nee ra mamayo? Ngeje ma o mbu̷ru̷ o manda o Reino e Mizhokjimi ajensʼe. Kjanu o tsjaa na chu̱ʼu̱ ajensʼe, o pjongu̷ji e Satanás ajensʼe ñe yo demonio, o pa̱ntrʼa̱ji kja ne Xoñijomu̷. Kjanu e Juan o dya̷ra̷ na jñaa kʼu̷ mi mama: “Me ra supjrido texe yo ka̱ra̱ kja ne xoñijomu̷”. ¿Pjenga ra supjreji? E Satanás pa̱ra̱ kʼe dya kja ra mezhe ra mbotrʼu̷ji, ngekʼua me mbekue (Apocalipsis 12:12).

Nukʼua e Juan o jñanrra e Jesús mi bʼu̷bʼu̷ ajensʼe, mi nzakja na tsʼime xo mi bʼu̷bʼu̷nu 144.000 ntee kʼu̷ ra manda, “ra tsjaji jmu ko e Cristo”. Ma ri xoru̷ji kʼe libro Apocalipsis, ri tendioji na joo kʼu̷ yo 144.000 nge yo trʼii kʼe ndinxu kʼu̷ ya ro xoru̷ji kja kʼe libro Génesis 3:15 (Apocalipsis 14:1; 20:6).

Kjanu ra sa̷ja̷ kʼe Armagedón, nrrexe kʼo manda kja ne Xoñijomu̷ ra jmuriji ngekʼua ra tsjaji chu̱ʼu̱ ko e Mizhokjimi ra chjeji ko e Jesús ñe texe kʼo anxe. ¿Jarga nguaru̷ texekʼo? “Ra ndo̱jo̱ Mizhokjimi.” Ra kjuatu̷ nrrexe yo gobierno, kjanu ra pa̱ntrʼa̱ji e Satanás kja na trʼoʼo kʼu̷ me na je̱e̱. Nukʼua e Jesús ñe yo 144.000 ra mandaji mil kje̷e̷. Ma ra nguaru̷ yo mil kje̷e̷ kʼu̷ ra mandaji, ra chjotu̷ji e Satanás (Apocalipsis 16:14; 20:4).

¿Jarga mbosʼu̷ yo ntee e Cristo ma ra manda yo mil kje̷e̷? Kʼe apóstol Juan o mama pje ra tsjaa e Jeoba: “Ra ndintsʼpi texe o ngizhoji. Dya kja ra ndu̱u̱ji. Dya kja pje xe ra mbeñeji. Dya kja xo ra gueji. Dya kja xo ra zoʼoji kʼu̷ rra u̷u̷. Na ngeje texe kʼo me bi supjridoji kja ne xoñijomu̷, dya kja ra supjridoji. Ya nde dʼadyo texe” (Apocalipsis 21:4). ¡Me rga zo̷o̷ ne Xoñijomu̷ jama kjaa kʼe jardín Edén!

Kʼe libro Apocalipsis mama e Jeoba o ñeme e Jesús ra manda kja o Reino. Ngekʼua ra kjuatu̷ yo ntee kʼo dya neeji e Jeoba. Dya kja ra bʼu̷bʼu̷ e Satanás, dya kja ra jñusbʼu̷ bʼechjine e Jeoba. Yo ntee ra manji kʼu̷ ngextrjo e Jeoba manda na joo. Akjanu nguaru̷ o Jñaa e Mizhokjimi kja ne Biblia.

(Nu kʼo gua e̱je̱ba xo ri jyodʼu̷ kja Apocalipsis.)