Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XORU̸ 5

E Mizhokjimi o mbosʼu̷ e Abrahán ñe nu pjamilia

E Mizhokjimi o mbosʼu̷ e Abrahán ñe nu pjamilia

E Mizhokjimi o mbosʼu̷ o pjamilia e Abrahán, xi go mbosʼu̷ e José ma o zidyiji a Egipto

E JEOBA ax mi pa̱ra̱ ke ro sa̷ja̷ kʼe paa ma o Trʼii kʼu̷ me sʼiya ro mbotrʼu̷ji ngekʼua ro mboxkʼu̷goji, nge kʼo ri tendioji ma ra xoru̷ji Génesis 3:15. E Jeoba o xipji e Abrahán: Potrʼu̷ in chʼiige e Isaac, kʼu̷ me kʼi sʼiya, ri dyakʼu̷. Nudya junsʼu̷ kja ne Bibliakʼo, ngekʼua ma ra xoru̷ji ra pjechiji jagua zoʼo Mizhokjimi ma o mbotrʼu̷ji o trʼii.

E Mizhokjimi o xipji e Abrahán ke kja o pjamilia e Isaac je rgui ñe̱je̱ kʼe Ntee ke ro salvazu̷goji. E Abrahán mi ejme kja o mu̷bʼu̷ kʼo o xipji Mizhokjimi, ngekʼua ma e Mizhokjimi o xipji ro mbotrʼu̷ o trʼii, angeze dya go su̱u̱, mi pa̱ra̱ ke e Mizhokjimi ro xosu̷ e Isaac. E Abrahán o tsjaa kʼo o mama Mizhokjimi o zidyi o trʼii ro mbotrʼu̷, pero e Jeoba o mbejñe na anxe o maa xipji e Abrahán ke dya ro mbotrʼu̷ e Isaac. E Mizhokjimi me ko ma̷ja̷ na punkju̷ nange e Abrahán o tsjaa kʼo mi nee angeze, nrro go xipjinu ke ro bendecio.

E Isaac mi ñʼeje yeje trʼii, mi ngeje e Esaú ñe e Jacob. Ngextrjo e Jacob mi nzhodʼu̷ kja o ñiji Mizhokjimi ngekʼua e Mizhokjimi o mbosʼu̷kʼu̷. E Jeoba o potrpu̷ o trju̱u̱ e Jacob o jñusbʼu̷ Israel. E Jacob mi siji dyechʼa yeje trʼii, go iiji na punkju̷kʼo nzakja na nación, kʼo nzi naja kʼo trʼii mi nge na tribu, ra nujiba jagua iitrjoji na punkju̷ o pjamilia e Jacob.

O kjuarma e José dya mi neeji me mi u̷mbu̷ji, mi ngeje na tsʼitrʼi ma go mbo̷ʼo̷ji, yo ntee kʼo go nrromu̷ji e José o zidyiji kja Egipto. Nujnu angeze mi pepji na punkju̷, me ko sechʼi na punkju̷, pero dya go tsjaa kʼo na sʼoo ngekʼua e Mizhokjimi dya go jyezi o mbosʼu̷. Na nu paa e faraón o unu̷ na bʼepji e José o xipji ro jmutu̷ na punkju̷ nzhexu̷. Ngekʼua ma o kjogu̷ na trjijmi, e Jacob o pejñe o trʼii ro maa nrromu̷ji nzhexu̷ a Egipto. Ma o za̷tʼa̷jinu o chjeji ko e José, me ko ma̷ja̷ji o xipjiji ro pongatrjo kʼu̷ o tsjapu̷ji. E José mi pa̱ra̱ kʼe promesa kʼu̷ bi xipji e Mizhokjimi e Abrahán. Ma o jñanrra o kjuarma me ma nzhumu̷ji o xipjiji: Dya kja nrrumu̷ e Mizhokjimi o jyezi ro tsʼaa ga kjanu ngekʼua dya ra tu̱u̱ji, nudya nu kjogu̷ ne trjijmi. Ri moji ri maa siji in tatago ñe ni pjamiliaji. Ma o mba̱ra̱kʼo, e faraón o unu̷ juajma kʼu̷ me ma joo ngekʼua ro mimijinu o pjamilia e José ñe o añimale.

E Jacob ñe o pjamilia o maa mimiji a Egipto, nujnu nge nu o maa nrru̱u̱ e Jacob. Ma a ro nrru̱u̱ o mama kʼe Ntee ke ro ne̱e̱ mbosʼu̷ yo ntee je rgui ñe̱je̱ kja o pjamilia e Judá, me ro zezhi ro manda nrrexe kja ne Xoñijomu̷ ro mbe̷zhi rey ro manda na joo. Ma o kjogu̷ yo kje̷e̷ e José go mama ke nu pjamilia dya ro mimiji nrrexe yo paa a Egipto, e Mizhokjimi ro mbosʼu̷jikʼo ro mbe̷dye̷jinu ro moji.

(Nu kʼo gua e̱je̱ba xo ri jyodʼu̷ kja Génesis nu capítulo 20 ra za̷trʼa̷ nu capítulo 50 ñe kja Hebreos 11:17-22.)